យោងតាមសេចក្តីប្រកាសព័ត៌មានរបស់គ្រឹះស្ថានអង្គរ បានឲ្យដឹងថា រយៈពេល ៤ខែ នៅដើមឆ្នាំ ២០២៦នេះ គ្រឹះស្ថានអង្គរ រកចំណូលបានចំនួន ១៥ ៤៩៧ ៣៣៨ដុល្លារអាមេរិក ពីការលក់សំបុត្រចូលទស្សនារមណីយដ្ឋានអង្គរឱ្យភ្ញៀវទេសចរបរទេស គឺមានការធ្លាក់ចុះ បើប្រៀបធៀបនឹងរយៈពេលដូចគ្នាកាលពីដើមឆ្នាំ២០២៥។
គ្រឹះស្ថានអង្គរ បានឱ្យដឹងថា នៅក្នុងខែមេសា ឆ្នាំ២០២៦នេះ មានភ្ញៀវទេសចរបរទេសមកទស្សនានៅរមណីយដ្ឋានអង្គរចំនួន ៥១ ០៩៣ នាក់ ថយចុះ ៣៣,០២% បើធៀបទៅនឹងខែមេសា ឆ្នាំ២០២៥ ហើយរកចំណូលបាន ២ ៣៩៣ ៣៦១ ដុល្លារ គឺធ្លាក់ចុះ ៣១,៤២ % បើប្រៀបធៀបខែមេសា ឆ្នាំ២០២៥។
ដោយឡែក ចំនួនភ្ញៀវទេសចរបរទេស និងចំណូលដែលទទួលបានពីការលក់សំបុត្រចូលទស្សនា រមណីយដ្ឋានអង្គរ ក្នុងរយៈពេល ៤ខែ ឆ្នាំ២០២៦ នេះ គឺរយៈពេល ៤ខែនេះ មានភ្ញៀវទេសចរបរទេសទិញសំបុត្រសរុប ៣២២ ០០៤ នាក់ ថយចុះ ៣២,១៨% ធៀបទៅនឹងរយៈពេល ៤ខែ កាលពីដើមឆ្នាំ២០២៥ ហើយរកចំណូលសរុបបាន ១៥ ៤៩៧ ៣៣៨ ដុល្លារ គឺថយចុះ ៣០,២២ % បើធៀបទៅនឹងរយៈដូចគ្នាកាលពីឆ្នាំ២០២៥។
រីឯ ស្ថិតិភ្ញៀវទេសចរបរទេស និងចំណូល ដែលទទួលបានពីការលក់សំបុត្រចូលទស្សនានៅរមណីយដ្ឋានអង្គររយៈពេល ៤ខែនេះ គឺត្រូវបានបែងចែកជា ៤ គឺចំណូលបានពីការលក់សំបុត្រសម្រាប់ភ្ញៀវទេសចរទៅកម្សាន្តនៅកោះកែរ នៅបេងមាលា នៅភ្នំក្បាលស្ពាន និងនៅកំពង់ផែចុងឃ្នៀស។
ចំពោះចំណូលបានពីការលក់សំបុត្រទូក (នៅកំពង់ផែចុងឃ្នៀស) ប្រចាំខែមេសា ក្នុងឆ្នាំ២០២៦នេះ គឺរកបាន ៦១ ២១០ ដុល្លារ ដោយក្នុងនោះទាំងទូកតូច ទូកកណ្តាល និងទូកធំ បានដឹកអ្នកជិះកម្សាន្តសរុប ១ ៤៧៤ លើក ហើយសរុបចំណូលលក់សំបុត្រទូករយៈពេល ៤ខែ ក្នុងឆ្នាំ២០២៦នេះ គឺមានចំនួន ៣៥៥ ៣៥១ដុល្លារ ដោយទូកទូច ទូកលណ្តាល និងទូកធំ បានដឹកអ្នកជិះកម្សាន្តសរុប ៧ ៩៨៤ លើក។
សម្រាប់ចំណូលពីការលក់បណ្ណនៅប្រាសាទកោះកែរ នៅខែមេសា ឆ្នាំ២០២៦នេះ មានភ្ញៀវទេសចរបរទេសចំនួន ៨២៦នាក់ ទទួលបានចំណូល ១២ ៣៩០ ដុល្លារ ហើយសរុបចំណូលលក់បណ្ណនៅប្រាសាទកោះកែរ រយៈពេល៤ខែ ឆ្នាំ២០២៦នេះ មានភ្ញៀវទេសចរបរទេស ៦ ៨៣០ នាក់ មានចំណូល ១០២ ៤៥០ដុល្លារ។
ចំណែក ចំណូលបានពីការលក់សំបុត្រ នៅប្រាសាទបេងមាលា ក្នុងខែមេសា គឺមានភ្ញៀវទេសចរទិញសំបុត្រចំនួន ៨៨២នាក់ រកបានចំណូល ៨ ៨២០ដុល្លារ ហើយសរុបចំណូលលក់សំបុត្ររយៈពេល ៤ខែ គឺមានអ្នកទិញសំបុត្រទស្សនាចំនួន ៧ ០៣៨នាក់ ទទួលបានចំណូល ៧០ ៣៨០ដុល្លារ។
ជាមួយគ្នានេះ ចំណូលពីការលក់សំបុត្រ នៅភ្នំក្បាលស្ពាន ក្នុងខែមេសា មានភ្ញៀវទេសចរបរទេសទិញសំបុត្រចំនួន ៧១នាក់ រកចំណូលបាន ៣៥៥ ដុល្លារ ហើយសរុបចំណូលលក់សំបុត្រនៅភ្នំក្បាលស្ពាន រយៈពេល ៤ខែ គឺមានភ្ញៀវទេសចរទិញសំបុត្រចំនួន ៥៦៦នាក់ ទទួលចំណូលបាន ២ ៨៣០ដុល្លារ៕
ដោយ៖khmerhome
