ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) បានជំរុញឱ្យមានការពង្រីកកិច្ចសហប្រតិបត្តិការវិនិយោគជាមួយសាធារណរដ្ឋកូរ៉េ បន្ទាប់ពីថ្នាក់ដឹកនាំជាន់ខ្ពស់បានជួបពិភាក្សាជាមួយគណៈប្រតិភូធុរជនកូរ៉េឈានមុខគេ ដោយឡែក កម្ពុជាកំពុងរៀបចំយុទ្ធនាការគោះទ្វារវិនិយោគដោយផ្ទាល់ទៅកាន់ទីក្រុងសេដ្ឋកិច្ចធំមួយនៅប្រទេសកូរ៉េ ដើម្បីទាក់ទាញក្រុមហ៊ុនយក្ស។
នារសៀលថ្ងៃទី២៥ ខែមីនា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានទទួលជួបគណៈប្រតិភូធុរជនកូរ៉េ ដែលដឹកនាំដោយ លោក Ju-Bong Park ប្រធានសភាពាណិជ្ជកម្ម និងឧស្សាហកម្មទីក្រុងអ៊ីនឈ័ន (Incheon Chamber of Commerce and Industry)។ កិច្ចពិភាក្សានេះ មិនមែនគ្រាន់តែជាការសម្ដែងការគួរសមបែបពិធីការទេ ប៉ុន្តែផ្ដោតខ្លាំងលើការកំណត់ផែនទីបង្ហាញផ្លូវសម្រាប់លំហូរវិនិយោគថ្មី ដោយយកវិស័យឧស្សាហកម្មបច្ចេកវិទ្យាខ្ពស់ជាអាទិភាព។
ឯកឧត្តមឧបនាយករដ្ឋមន្ត្រី បានថ្លែងបញ្ជាក់ពីឆន្ទៈរបស់រាជរដ្ឋាភិបាលកម្ពុជា ក្នុងការបង្វែរទិសដៅសេដ្ឋកិច្ចពីឧស្សាហកម្មវាយនភណ្ឌបែបប្រពៃណី ទៅកាន់វិស័យដែលមានតម្លៃបន្ថែមខ្ពស់ ដូចជា គ្រឿងអេឡិចត្រូនិក យានយន្ត កសិ-ឧស្សាហកម្ម និងបច្ចេកវិទ្យាឌីជីថល។ ក្នុងជំនួបនេះ ឯកឧត្តមក៏បានប្រកាសពីផែនការរៀបចំបេសកកម្មគោះទ្វារវិនិយោគនៅប្រទេសកូរ៉េនាពេលខាងមុខ ដោយស្នើសុំឱ្យសភាពាណិជ្ជកម្មក្រុងអ៊ីនឈ័នចូលរួមសហការយ៉ាងសកម្មក្នុងការផ្សព្វផ្សាយពីសក្តានុពល និងបរិយាកាសវិនិយោគថ្មីរបស់កម្ពុជា។
ឆ្លើយតបនឹងបញ្ហានេះ លោក Ju-Bong Park បានសម្តែងការគាំទ្រយ៉ាងពេញទំហឹង ដោយអះអាងថា ខ្លួននឹងខិតខំសម្របសម្រួលយ៉ាងអស់ពីសមត្ថភាព ដើម្បីឱ្យបេសកកម្មគោះទ្វារនេះទទួលបានជោគជ័យ។ លោកបានបង្ហាញក្តីរំពឹងខ្ពស់ថា កិច្ចសហប្រតិបត្តិការកាន់តែស៊ីជម្រៅរវាង CDC និងសភាពាណិជ្ជកម្មទីក្រុងអ៊ីនឈ័ន នឹងក្លាយជាសន្ទុះដ៏សំខាន់ក្នុងការទាក់ទាញក្រុមហ៊ុនកូរ៉េឱ្យមកបណ្តាក់ទុននៅកម្ពុជាកាន់តែច្រើន។
គួរបញ្ជាក់ថា កិច្ចពិភាក្សានេះ ត្រូវបានចាត់ទុកថាជាជំហានយុទ្ធសាស្ត្រមួយ ដើម្បីពង្រឹងយន្តការសន្ទនារវាងរដ្ឋ និងវិស័យឯកជន កម្ពុជា-កូរ៉េ។ ជាមួយនឹងទីតាំងភូមិសាស្ត្រស្ថិតនៅចំណុចកណ្តាលនៃអនុតំបន់ទន្លេមេគង្គ ព្រមទាំងការរំពឹងទុកលើកិច្ចព្រមព្រៀងពាណិជ្ជកម្មថ្មីជាមួយសហរដ្ឋអាមេរិក កម្ពុជាកំពុងដាក់ខ្លួនជាមជ្ឈមណ្ឌលវិនិយោគដ៏ទាក់ទាញសម្រាប់វិនិយោគិនបរទេស ជាពិសេសពីសាធារណរដ្ឋកូរ៉េ។ ការប្តេជ្ញាចិត្តខ្ពស់នេះ គឺជាផ្នែកមួយក្នុងការរុញច្រានឱ្យសម្រេចបានចក្ខុវិស័យឆ្នាំ២០៥០ ក្នុងការលើកកម្ពុជាឱ្យក្លាយជាប្រទេសដែលមានចំណូលខ្ពស់៕
