ភ្នំពេញ — រាជរដ្ឋាភិបាលកម្ពុជា កំពុងបង្ហាញសាច់ដុំក្នុងការជំរុញសេដ្ឋកិច្ចឱ្យកាន់តែរស់រវើក តាមរយៈការពិនិត្យមើលឡើងវិញនូវរាល់កិច្ចការងារដែលបានសន្យាជាមួយវិស័យឯកជន។

កាលពីព្រឹកថ្ងៃពុធ ទី២៥ មីនា ឆ្នាំ២០២៦ម្សិលមិញនេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានដឹកនាំកិច្ចប្រជុំអន្តរក្រសួងយ៉ាងក្តៅគគុក ដើម្បីដេញដោលលើរបាយការណ៍វឌ្ឍនភាពនៃការអនុវត្ត «កញ្ចប់វិធានការកែទម្រង់មុតស្រួច» ប្រចាំឆមាសទី២ ឆ្នាំ២០២៥។

ចំណុចក្តៅៗនៃកិច្ចប្រជុំ៖

• ដោះស្រាយបញ្ហាផ្ទាល់ៗ៖ រដ្ឋាភិបាលមិនទុកឱ្យវិស័យឯកជននៅម្នាក់ឯងឡើយ ដោយបានពិភាក្សាស៊ីជម្រៅលើការដោះស្រាយបញ្ហាប្រឈមនានាដែលក្រុមហ៊ុន និងវិនិយោគិនកំពុងជួបប្រទះ។
• ត្រីវិស័យ SOP ថ្មី៖ កម្ពុជាត្រៀមចេញសៀវភៅណែនាំស្តង់ដា (SOP) ថ្មីនៅពាក់កណ្តាលឆ្នាំ២០២៦នេះ ដើម្បីឱ្យការធ្វើការងាររវាងរដ្ឋ និងឯកជន កាន់តែមានតម្លាភាព និងលឿនជាងមុន។
• សន្ទុះសេដ្ឋកិច្ច៖ របាយការណ៍ដែលបានពិភាក្សានេះ នឹងត្រូវដាក់ជូនទៅគណៈរដ្ឋមន្ត្រី ដើម្បីរាយការណ៍ផ្ទាល់ជូនសម្ដេចធិបតី នាយករដ្ឋមន្ត្រី ក្នុងពេលឆាប់ៗខាងមុខ។

"វិស័យឯកជន គឺជាក្បាលម៉ាស៊ីននៃកំណើនសេដ្ឋកិច្ចជាតិ" — នេះគឺជាការបញ្ជាក់យ៉ាងច្បាស់ពីឯកឧត្តមឧបនាយករដ្ឋមន្ត្រី ស៊ុន ចាន់ថុល ទៅកាន់អង្គប្រជុំ ដែលមានការចូលរួមពីតំណាងក្រសួងសំខាន់ៗ និងសភាពាណិជ្ជកម្មកម្ពុជា។

ការរុញច្រានការកែទម្រង់នេះ មិនមែនគ្រាន់តែជាការធ្វើតាមទម្លាប់នោះទេ ប៉ុន្តែវាគឺជាការប្តេជ្ញាចិត្តរបស់កម្ពុជា ក្នុងការប្រែក្លាយបញ្ហាប្រឈមឱ្យទៅជាឱកាសមាសសម្រាប់ការវិនិយោគ និងបង្កើនសមត្ថភាពប្រកួតប្រជែងនៅក្នុងតំបន់ឱ្យកាន់តែខ្លាំងខ្លាជាងមុន។

ឯកឧត្តមបានគូសបញ្ជាក់អំពីការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដោយតែងតែផ្តល់ឱកាសស្តាប់នូវរាល់បញ្ហាប្រឈម និងដាក់ចេញនូវវិធានការដោះស្រាយប្រកបដោយភាពជាក់ស្តែង និងទាន់ពេលវេលា៕

ដោយ៖ មឿន ឌីណា (Moeun Dyna)