បាត់ដំបង៖ ក្រុមការងារមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបាត់ដំបង បានរៀបចំពិធីបិទផ្សាយជាសាធារណៈនូវឯកសារវិនិច្ឆ័យទិន្នន័យក្បាលដី សរុបចំនួន ៣,១២៩ ក្បាលដី ជូនប្រជាពលរដ្ឋក្នុងឃុំព្រៃខ្ពស់ ស្រុកបវេល ខេត្តបាត់ដំបង។ ពិធីនេះបានប្រព្រឹត្តទៅនាព្រឹកថ្ងៃទី២៤ ខែមីនា ឆ្នាំ២០២៦ ក្រោមអធិបតីភាព លោក សំអ៊ុន ចំណាន អភិបាលរងស្រុកបវេល តំណាងឯកឧត្តម សុខ លូ អភិបាលខេត្តបាត់ដំបង។

ក្បាលដីទាំងនេះ ស្ថិតនៅក្នុងភូមិចំនួនបីនៃឃុំព្រៃខ្ពស់ រួមមាន៖ ភូមិតាហ៊ី ទទួលបាន ៩១៣ ក្បាលដី, ភូមិពោធិ៍ ទទួលបាន ១,១៦៥ ក្បាលដី, និងភូមិស្រណាល ទទួលបាន ១,០៥១ ក្បាលដី។ ពិធីនេះមានការចូលរួមពីថ្នាក់ដឹកនាំ មន្ត្រីជំនាញ អាជ្ញាធរមូលដ្ឋាន កងកម្លាំងប្រដាប់អាវុធ និងប្រជាពលរដ្ឋសរុបប្រមាណ ៤០០ នាក់។

ការចុះបញ្ជីដីជាលក្ខណៈប្រព័ន្ធនេះ គឺជាដំណើរការមួយដែលរាជរដ្ឋាភិបាលបានអនុវត្តន៍ ដើម្បីផ្តល់សុវត្ថិភាពសិទ្ធិកាន់កាប់ដីធ្លីជូនប្រជាពលរដ្ឋ កាត់បន្ថយវិវាទ និងបង្កើនស្ថិរភាពរស់នៅប្រកបដោយចីរភាព។ ការប្រកាសតំបន់វិនិច្ឆ័យ និងបន្តរហូតដល់ការបិទផ្សាយឯកសារវិនិច្ឆ័យនេះ គឺជាជំហានចុងក្រោយមុននឹងចេញប័ណ្ណកម្មសិទ្ធិដីធ្លីជូនប្រជាពលរដ្ឋជាផ្លូវការ។

លោក សំអ៊ុន ចំណាន បានថ្លែងក្នុងពិធីនោះថា ការចុះបញ្ជីដីធ្លីនេះ គឺជាសមិទ្ធផលដ៏សំខាន់មួយរបស់រាជរដ្ឋាភិបាល ក្នុងការគ្រប់គ្រងដីធ្លីឲ្យមានភាពរបៀបរៀបរយ និងចូលរួមលើកកម្ពស់ជីវភាពរស់នៅរបស់បងប្អូនប្រជាពលរដ្ឋក្នុងមូលដ្ឋាន។ លោកក៏បានថ្លែងអំណរគុណដល់មន្ត្រីជំនាញ និងអាជ្ញាធរមូលដ្ឋានដែលបានខិតខំប្រឹងប្រែង និងសហការយ៉ាងល្អរហូតសម្រេចការងារនេះបានដោយរលូន។

ស្រុកបវេល ជាស្រុកមួយស្ថិតនៅភាគនិរតីនៃខេត្តបាត់ដំបង ដែលមានដីមានជីជាតិសម្បូរទៅដោយវិស័យកសិកម្ម។ ការទទួលបានប័ណ្ណកម្មសិទ្ធិដីធ្លីជាផ្លូវការនេះ នឹងអាចឱ្យប្រជាពលរដ្ឋមានសិទ្ធិពេញលេញក្នុងការប្រើប្រាស់ កម្ចីទុនវិនិយោគ និងអភិវឌ្ឍន៍សេដ្ឋកិច្ចគ្រួសារប្រកបដោយនិរន្តរភាព។

ពិធីបិទផ្សាយនេះ បានបញ្ចប់ដោយភាពរីករាយ និងការឯកភាពគ្នាខ្ពស់ពីសំណាក់ប្រជាពលរដ្ឋដែលបានចូលរួម ដែលសុទ្ធសឹងតែសម្តែងនូវក្តីរីករាយ និងការគាំទ្រចំពោះគោលនយោបាយដីធ្លីរបស់រាជរដ្ឋាភិបាល៕

ដោយ៖ មឿន ឌីណា (Moeun Dyna)