ភ្នំពេញ៖ ក្នុងចលនាថ្មីមួយដែលឆ្លុះបញ្ចាំងពីទំនុកចិត្តលើបរិយាកាសវិនិយោគកម្ពុជា គណៈប្រតិភូវិនិយោគិនមកពីសាធារណរដ្ឋកូរ៉េ ទើបតែបានបង្ហើញចំណាប់អារម្មណ៍យ៉ាងខ្លាំងក្នុងការបង្កើតរោងចក្រផ្គុំដំឡើងម៉ូតូអគ្គិសនី (Electric Motorcycle Assembly Plant) នៅក្នុងព្រះរាជាណាចក្រកម្ពុជា។
នារសៀលថ្ងៃទី៦ មីនា ២០២៦ ឯកឧត្តម យុន ហេង អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) នៃទីស្តីការក្រុមប្រឹក្សាអភិវឌ្ឍន៍កម្ពុជា (CDC) បានទទួលជួបពិភាក្សាការងារជាមួយគណៈប្រតិភូវិនិយោគិនកូរ៉េ។ កិច្ចប្រជុំនេះធ្វើឡើងក្នុងគោលបំណងស្វែងយល់ពីសក្តានុពល និងកាលានុវត្តភាពវិនិយោគនៅកម្ពុជា ដោយផ្តោតជាពិសេសទៅលើវិស័យផលិតយានយន្តអគ្គិសនី ដែលកំពុងត្រូវបានរាជរដ្ឋាភិបាលយកចិត្តទុកដាក់ខ្ពស់ ។
នៅក្នុងជំនួបនេះ ឯកឧត្តម យុន ហេង បានសម្តែងនូវការស្វាគមន៍យ៉ាងកក់ក្តៅចំពោះវិនិយោគិនកូរ៉េ ដែលបានជ្រើសរើសកម្ពុជាជាគោលដៅវិនិយោគចម្បងរបស់ខ្លួន។ ឯកឧត្តមបានជម្រាបជូនគណៈប្រតិភូអំពីបរិយាកាសវិនិយោគប្រកបដោយភាពទាក់ទាញ ជាពិសេសការយកចិត្តទុកដាក់ខ្ពស់របស់រាជរដ្ឋាភិបាល ក្នុងការទាក់ទាញ និងជំរុញការវិនិយោគគ្រប់ប្រភេទ។
គួរបញ្ជាក់ថា គម្រោងវិនិយោគនេះនឹងស្របនឹង គោលនយោបាយជាតិស្តីពីការអភិវឌ្ឍយានយន្តអគ្គិសនី ២០២៤-២០៣០ ដែលរាជរដ្ឋាភិបាលបានដាក់ចេញ ក្នុងគោលដៅជំរុញកំណើនឧស្សាហកម្មយានយន្តអគ្គិសនី តាមរយៈការផ្តល់ការលើកទឹកចិត្តវិនិយោគជាច្រើន ។
ឯកឧត្តមអគ្គលេខាធិការរង បានលើកឡើងពីកត្តាសំខាន់ៗដែលធ្វើឱ្យកម្ពុជាក្លាយជាកន្លែងដ៏ទាក់ទាញសម្រាប់វិនិយោគិនបរទេស រួមមាន៖
- ស្ថិរភាពនយោបាយ និងសេដ្ឋកិច្ច
- ទីតាំងយុទ្ធសាស្ត្រ នៅកណ្តាលអាស៊ាន
- កម្លាំងពលកម្មវ័យក្មេង និងប្រកបដោយផលិតភាព
- យន្តការសម្របសម្រួលបែប "ប្រអប់តែមួយ" (One-Stop Service) របស់ CDC ដែលជួយសម្រួលដល់ការចុះបញ្ជី និងការអនុវត្តគម្រោងវិនិយោគ
ចំណុចសំខាន់មួយទៀតដែលជាកត្តាទ្រទ្រង់ដល់គម្រោងវិនិយោគនេះ គឺវិធានការថ្មីរបស់រាជរដ្ឋាភិបាល ក្នុងការកាត់បន្ថយពន្ធលើការនាំចូលគ្រឿងបន្លាស់យានយន្តអគ្គិសនី ដែលបានចូលជាធរមានតាំងពីថ្ងៃទី១ ខែមករា ឆ្នាំ២០២៦ ។ ការកាត់បន្ថយនេះរួមមាន៖
- ពន្ធនាំចូលម៉ូទ័រអគ្គិសនី (EV Motor) ត្រូវបានកាត់បន្ថយមកត្រឹម ០%
- ពន្ធពិសេសលើថ្មអគ្គិសនី (EV Battery) ត្រូវបានកាត់បន្ថយពី ១០% មកត្រឹម ៥%
ការកាត់បន្ថយនេះ គឺជាការឆ្លើយតបដោយផ្ទាល់ទៅនឹងតម្រូវការរបស់វិនិយោគិនក្នុងច្រវាក់ផលិតកម្ម និងជាសញ្ញាបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការធ្វើឱ្យកម្ពុជាក្លាយជាមជ្ឈមណ្ឌលផលិតកម្មយានយន្តអគ្គិសនីក្នុងតំបន់ ។
គម្រោងវិនិយោគនេះនឹងមកដល់ ខណៈដែលទីផ្សារយានយន្តអគ្គិសនីនៅកម្ពុជាកំពុងពង្រីកខ្លួនយ៉ាងឆាប់រហ័ស។ គិតត្រឹមចុងឆ្នាំ២០២៥ កម្ពុជាបានចុះបញ្ជីយានយន្តអគ្គិសនីសរុបចំនួន ១២,៩៦៨គ្រឿង ក្នុងនោះជាម៉ូតូអគ្គិសនីចំនួន ៣,២០៣គ្រឿង។ រាជរដ្ឋាភិបាលមានគោលដៅដ៏មានមហិច្ឆតាក្នុងការឱ្យមានយានយន្តអគ្គិសនីជាង ៧៧០,០០០គ្រឿង នៅឆ្នាំ២០៣០ និងឱ្យរថយន្តអគ្គិសនីចំណោត ៣៥-៤០% និងម៉ូតូអគ្គិសនី ៧០% នៅឆ្នាំ២០៥០ ។
ជំនួបនេះធ្វើឡើងក្នុងក្របខ័ណ្ឌនៃកិច្ចសហប្រតិបត្តិការដែលកំពុងតែពង្រឹងរវាងកម្ពុជា និងសាធារណរដ្ឋកូរ៉េ។ កន្លងមកថ្មីៗនេះ ថ្នាក់ដឹកនាំ CDC ក៏ធ្លាប់បានជួបពិភាក្សាជាមួយសភាពាណិជ្ជកម្មកូរ៉េ (KOCHAM) ដើម្បីពង្រឹងចំណងសេដ្ឋកិច្ច និងពិភាក្សាពីការរៀបចំបេសកកម្មទៅកាន់ប្រទេសកូរ៉េ ដើម្បីទាក់ទាញវិនិយោគិនបន្ថែមទៀត ដែលគ្រោងនឹងប្រព្រឹត្តទៅនៅត្រីមាសទី២ ឆ្នាំ២០២៦ ។
ជាងនេះទៅទៀត កាលពីខែកុម្ភៈ ឆ្នាំ២០២៦ CDC និងសភាពាណិជ្ជកម្ម និងឧស្សាហកម្មទីក្រុងអ៊ិនឆោន (ICCI) ក៏បានចុះហត្ថលេខាលើលិខិតបំណង (LoI) ស្តីពីកិច្ចសហប្រតិបត្តិការវិនិយោគ ក្នុងគោលដៅរស់ឡើងវិញនូវលំហូរវិនិយោគពីកូរ៉េមកកម្ពុជា ។
តាមរយៈកិច្ចពិភាក្សាប្រកបដោយផ្លែផ្កានាពេលនេះ គម្រោងបង្កើតរោងចក្រផ្គុំដំឡើងម៉ូតូអគ្គិសនី ត្រូវបានរំពឹងថានឹងក្លាយជាគំរូនៃភាពជោគជ័យថ្មីមួយទៀត ក្នុងទំនាក់ទំនងវិនិយោគទ្វេភាគីកម្ពុជា-កូរ៉េ និងរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព និងបរិស្ថានបៃតងរបស់កម្ពុជា៕
ដោយ៖ មឿន ឌីណា (Moeun Dyna)
