ភ្នំពេញ៖ ក្នុងយុគសម័យដែលកិច្ចសហប្រតិបត្តិការពហុភាគីកំពុងក្លាយជាគន្លឹះនៃការអភិវឌ្ឍប្រកបដោយចីរភាព រាជរដ្ឋាភិបាលកម្ពុជាបានបោះជំហានថ្មីមួយដ៏សំខាន់។ នាព្រឹកថ្ងៃទី៥ ខែមីនា ឆ្នាំ២០២៦ ឯកឧត្តម ឈៀង យ៉ាណារ៉ា ទេសរដ្ឋមន្រ្តីទទួលបន្ទុកបេសកកម្មពិសេស និងជាអនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា (ក.អ.ក.) បានដឹកនាំ កិច្ចពិគ្រោះយោបល់ពហុភាគីថ្នាក់ជាតិ ស្តីពីសេចក្តីព្រាងសេចក្តីថ្លែងការណ៍ស្តីពីស័ក្តិសិទ្ធភាពក្នុងកិច្ចអភិវឌ្ឍន៍។

កិច្ចប្រជុំដែលប្រព្រឹត្តទៅនៅទីស្ដីការក្រុមប្រឹក្សាអភិឌ្ឍន៍កម្ពុជានេះ បានទាក់ទាញការចូលរួមពីតួអង្គសំខាន់ៗចំនួន ៨០រូប តំណាងឱ្យក្រសួង-ស្ថាប័នពាក់ព័ន្ធ ដៃគូអភិវឌ្ឍន៍អន្តរជាតិ និងអង្គការមិនមែនរដ្ឋាភិបាល។ វត្តមានដ៏ច្រើននេះ បង្ហាញពីការប្តេជ្ញាចិត្តរួមគ្នាក្នុងការពង្រឹងភាពជាដៃគូរវាងរដ្ឋាភិបាល និងដៃគូអភិវឌ្ឍន៍ ដើម្បីធានាប្រសិទ្ធភាព និងចីរភាពនៃកិច្ចអភិវឌ្ឍន៍នៅកម្ពុជា។

គោលដៅចម្បង នៃកិច្ចពិគ្រោះយោបល់នាពេលនេះ គឺដើម្បីពិនិត្យ និងពិភាក្សាលើសេចក្តីព្រាងសេចក្តីថ្លែងការណ៍ស្តីពីស័ក្តិសិទ្ធភាពក្នុងកិច្ចអភិវឌ្ឍន៍។ ឯកសារនេះ ដែលត្រូវបានរៀបចំរួមគ្នាដោយរាជរដ្ឋាភិបាលកម្ពុជា និងដៃគូអភិវឌ្ឍន៍ គ្រោងនឹងក្លាយជាឯកសារប្រវត្តិសាស្ត្រមួយ កំណត់នូវគោលការណ៍ណែនាំ និងការប្តេជ្ញាចិត្តរួម ដើម្បីធានាថារាល់អន្តរាគមន៍អភិវឌ្ឍន៍សុទ្ធតែទទួលបានលទ្ធផលខ្ពស់បំផុត និងឆ្លើយតបទៅនឹងតម្រូវការពិតប្រាកដរបស់ប្រជាពលរដ្ឋ។

សារៈសំខាន់នៃកិច្ចសហប្រតិបត្តិការ

កិច្ចពិគ្រោះយោបល់នេះ គឺជាសក្ខីភាពបញ្ជាក់ពីទស្សនវិជ្ជាដឹកនាំរបស់រាជរដ្ឋាភិបាល ដែលតែងតែបើកចំហ និងផ្តល់តម្លៃខ្ពស់ដល់ការចូលរួមពីគ្រប់ភាគីពាក់ព័ន្ធ។ ការអភិវឌ្ឍប្រកបដោយចីរភាព មិនអាចសម្រេចបានដោយរដ្ឋាភិបាលតែមួយមុខនោះទេ។

ឯកឧត្តម ឈៀង យ៉ាណារ៉ា បានថ្លែងក្នុងឱកាសនោះថា៖«ការអភិវឌ្ឍប្រកបដោយស័ក្តិសិទ្ធភាព ទាមទារឱ្យមានការចូលរួមប្រកបដោយស្មារតីទទួលខុសត្រូវខ្ពស់ពីគ្រប់ភាគីទាំងអស់។ ថ្ងៃនេះ យើងមិនត្រឹមតែពិភាក្សាលើឯកសារមួយប៉ុណ្ណោះទេ ប៉ុន្តែយើងកំពុងកសាងយន្តការមួយដើម្បីធានាថារាល់ធនធាន និងកិច្ចខិតខំប្រឹងប្រែងទាំងអស់របស់យើង គឺត្រូវបានប្រមូលផ្តុំដើម្បីសម្រេចបាននូវគោលដៅរួម គឺការលើកកម្ពស់ជីវភាពប្រជាជនកម្ពុជា និងការអភិវឌ្ឍប្រទេសជាតិឱ្យរីកចម្រើនថែមទៀត»។

បរិបទអន្តរជាតិ និងការប្តេជ្ញាចិត្តរបស់កម្ពុជា

កិច្ចពិគ្រោះយោបល់នេះប្រព្រឹត្តទៅក្នុងពេលដែលកម្ពុជាកំពុងពង្រឹងទំនាក់ទំនងជាមួយដៃគូអន្តរជាតិយ៉ាងសកម្ម។ គួរបញ្ជាក់ផងដែរថា កាលពីថ្ងៃទី៤-៥ ខែមីនា កម្ពុជាក៏បានស្វាគមន៍គណៈប្រតិភូជាន់ខ្ពស់នៃ ក្រុមប្រឹក្សាធុរកិច្ចសហភាពអឺរ៉ុប-អាស៊ាន (EU-ABC) ដែលដឹកនាំដោយសមាជិកជាង ៥០រូប មកពីសាជីវកម្មពហុជាតិធំៗ។ ក្នុងជំនួបនោះ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក.អ.ក. បានសង្កត់ធ្ងន់ថា វិស័យឯកជនគឺជាម៉ាស៊ីនដ៏សំខាន់នៃកំណើនសេដ្ឋកិច្ច ដោយថ្លែងថា៖ «យើងមិនអាចកសាងកម្ពុជាតែម្នាក់ឯងបានទេ។ យើងត្រូវការដៃគូ គឺវិស័យឯកជន» ។

ទន្ទឹមនឹងនេះ កិច្ចសហប្រតិបត្តិការជាមួយអង្គការសហប្រជាជាតិក៏ត្រូវបានពង្រឹងផងដែរ តាមរយៈការបង្កើត ក្រុមការងារបច្ចេកទេសចម្រុះ ដើម្បីជំរុញការបង្កើតការងារសមរម្យ និងពង្រីកប្រព័ន្ធគាំពារសង្គម ស្របតាមផែនការមេរបស់រាជរដ្ឋាភិបាល ។

កិច្ចពិគ្រោះយោបល់នាព្រឹកថ្ងៃទី៥ មីនា នេះ គឺជាផ្នែកមួយនៃកិច្ចខិតខំប្រឹងប្រែងឥតឈប់ឈររបស់កម្ពុជាក្នុងការធានាថា កំណើនសេដ្ឋកិច្ច និងវឌ្ឍនភាពជាតិ គឺរួមបញ្ចូល ប្រកបដោយបរិយាប័ន្ន និងឆ្លើយតបទៅនឹងបរិបទសកលលោកដែលកំពុងប្រែប្រួលយ៉ាងឆាប់រហ័ស។ លទ្ធផលនៃកិច្ចពិភាក្សានេះ នឹងត្រូវយកទៅកែសម្រួល និងដាក់ឱ្យអនុវត្តនៅពេលខាងមុខ ដោយរំពឹងថានឹងបង្កើតបាននូវក្របខ័ណ្ឌសហប្រតិបត្តិការថ្មីមួយ ប្រកបដោយប្រសិទ្ធភាព និងចីរភាពសម្រាប់ការអភិវឌ្ឍនៅកម្ពុជា៕

ដោយ៖ មឿន ឌីណា (Moeun Dyna)