អន្តរជាតិ៖ ការប្រែប្រួលតម្លៃ​ មាសដុំបានធ្លាក់ចុះរហូតដល់ ១.៦% នៅថ្ងៃអង្គារ បន្ទាប់ពីកើនឡើងជាង ៧% ក្នុងរយៈពេល ៤ ថ្ងៃមុន។ ការធ្លាក់ចុះនេះធ្វើឡើងខណៈពាណិជ្ជករចិនត្រឡប់មកវិញពីវិស្សមកាល និងរកប្រាក់ចំណេញ។

មូលហេតុនៃការប្រែប្រួល ការកើនឡើងពីមុន ដោយសារវិនិយោគិននាំគ្នាទិញមាសជាទ្រព្យសកម្មសុវត្ថិភាព ដោយសារ ភាពមិនច្បាស់លាស់ពីគោលនយោបាយពន្ធនាំចូលថ្មីរបស់ប្រធានាធិបតីអាមេរិក លោក ដូណាល់ ត្រាំ​ និងភាពតានតឹងកើនឡើងនៅមជ្ឈិមបូព៌ា រវាងសហរដ្ឋអាមេរិក និងអ៊ីរ៉ង់។

ទស្សនៈអ្នកជំនាញ

លោក Song Jiangzhen ការប្រែប្រួល ២% ជារឿងធម្មតា ហើយនិន្នាការរយៈពេលវែងនៅតែវិជ្ជមាន ដោយសារភាពតានតឹងផ្នែកភូមិសាស្ត្រនយោបាយនៅតែបន្ត។

លោក Christopher Hamilton ភាពមិនច្បាស់លាស់អំពីពន្ធគយគាំទ្រតម្លៃមាស ប៉ុន្តែមិនគ្រប់គ្រាន់ឲ្យតម្លៃកើនឡើងខ្លាំងនោះទេ ដោយសារអត្រាការប្រាក់ពិតប្រាកដ និងប្រាក់ដុល្លារនៅតែរឹងមាំ។

កត្តាគាំទ្រមាស ធនាគារធំៗដូចជា Goldman Sachs ព្យាករណ៍ថាតម្លៃមាសនឹងងើបឡើងវិញ ដោយសារកត្តាមូលដ្ឋានដូចជា ការព្រួយបារម្ភអំពីឯករាជ្យភាពធនាគារកណ្តាលអាមេរិក និងហានិភ័យភូមិសាស្ត្រនយោបាយនៅតែមាន។

ស្ថានភាពបច្ចុប្បន្ន គិតត្រឹមម៉ោង ៣:០២ រសៀល នៅសិង្ហបុរី មាសធ្លាក់ចុះ ១.១% មកនៅត្រឹម ៥,១៦៩.៧៣ដុល្លារក្នុងមួយអោន។ ប្រាក់ ផ្លាទីន និងប៉ាឡាដ្យូម មានការប្រែប្រួលតិចតួច។

គួរបញ្ជាក់ថា បើទោះបីមាសធ្លាក់ថ្លៃបន្តិច ប៉ុន្តែបរិយាកាសពិភពលោកនៅតែពោរពេញដោយភាពមិនប្រាកដប្រជា។ អ្នកវិភាគជាច្រើនជឿថា និន្នាការរយៈពេលវែងនៅតែមានទិសវិជ្ជមាន ប្រសិនបើភាពតានតឹងនយោបាយ និងសេដ្ឋកិច្ចបន្តកើនឡើង៕

ប្រភព៖ Yahoo Finance

ប្រែសម្រួលដោយ​៖ MD-Angkor