ភ្នំពេញ៖ ក្នុងចំណងមិត្តភាពដែលបានចាក់ឫសយ៉ាងជ្រៅអស់រយៈពេល ៦៦ឆ្នាំ កម្ពុជា និងគុយបា កំពុងឈានជើងចូលទៅក្នុងជំពូកថ្មីមួយនៃការជំរុញសេដ្ឋកិច្ច តាមរយៈការតភ្ជាប់វិស័យទេសចរណ៍ពីតំបន់អាស៊ីអាគ្នេយ៍ ទៅកាន់តំបន់ការីប៊ីន (Caribbean)។

នៅក្នុងជំនួបជាប្រវត្តិសាស្ត្រមួយកាលពីថ្ងៃទី១០ ខែកុម្ភៈ ឆ្នាំ២០២៦ នៅរាជធានីភ្នំពេញ លោក ហួត ហាក់ រដ្ឋមន្ត្រីក្រសួងទេសចរណ៍កម្ពុជា និងលោក Adalberto Venero Lemus អនុរដ្ឋមន្ត្រីទេសចរណ៍គុយបា បានឯកភាពគ្នាជាគោលការណ៍ក្នុងការចុះអនុស្សរណៈនៃការយោគយល់គ្នា (MoU) ដើម្បីបើកផ្លូវឱ្យមានការផ្លាស់ប្តូរភ្ញៀវទេសចររវាងប្រទេសទាំងពីរឱ្យកាន់តែខ្លាំងក្លា។

ស្ពានមិត្តភាពដែលក្លាយជា "ស្ពានសេដ្ឋកិច្ច"

ទំនាក់ទំនងការទូតដែលបានចាប់ផ្តើមតាំងពីឆ្នាំ១៩៦០ មិនត្រឹមតែជាទំនាក់ទំនងនយោបាយនោះទេ ប៉ុន្តែពេលនេះវាបានក្លាយជាមូលដ្ឋានគ្រឹះសម្រាប់ "ការធ្វើពិពិធកម្មទេសចរណ៍"។ ប្រទេសទាំងពីរត្រូវបានគេស្គាល់ថាជាម្ចាស់ផ្ទះដែលមានភាពរួសរាយរាក់ទាក់ និងមានសម្បត្តិវប្បធម៌ដ៏សម្បូរបែប ដែលជាមេដែកស្រូបទាញភ្ញៀវទេសចរពីជុំវិញពិភពលោក។

ការតភ្ជាប់ជើងហោះហើរ ភ្នំពេញ-ឡាហាវ៉ាណា មិនមែនជារឿងឆ្ងាយទៀតឡើយ

ចំណុចដ៏រំភើបបំផុតនៃកិច្ចសហប្រតិបត្តិការនេះ គឺការបង្កើនភាពងាយស្រួលក្នុងការធ្វើដំណើរ។ បច្ចុប្បន្ន ភ្ញៀវទេសចរអាចធ្វើដំណើររវាងរាជធានីភ្នំពេញ និងទីក្រុងឡាហាវ៉ាណា (Havana) បានយ៉ាងងាយស្រួលតាមរយៈក្រុមហ៊ុនអាកាសចរណ៍តួកគី (Turkish Airlines) ដោយគ្រាន់តែផ្លាស់ប្តូរជើងហោះហើរនៅទីក្រុងអ៊ីស្តាន់ប៊ុល ដែលជាចំណុចតភ្ជាប់ដ៏សំខាន់រវាងអាស៊ី អឺរ៉ុប និងអាមេរិកឡាទីន។

យុទ្ធសាស្ត្រ "ស្វែងយល់ពីគ្នា" តាមរយៈ FAM Trip

ដើម្បីឱ្យកិច្ចព្រមព្រៀងនេះក្លាយជាការពិត និងមានប្រសិទ្ធភាព ប្រទេសទាំងពីរត្រៀមរៀបចំកម្មវិធី "ទស្សនកិច្ចសិក្សា (FAM Trip)" ទៅវិញទៅមក។ កម្មវិធីនេះនឹងអនុញ្ញាតឱ្យភ្នាក់ងារទេសចរណ៍ធំៗ និងអ្នកសារព័ត៌មានពីប្រទេសទាំងពីរ បានទៅស្វែងយល់ផ្ទាល់ពីសក្តានុពលទេសចរណ៍ ដើម្បីរៀបចំជាកញ្ចប់ទស្សនកិច្ចទាក់ទាញដល់ប្រជាជននៃប្រទេសទាំងពីរ ក៏ដូចជាភ្ញៀវអន្តរជាតិ។

ការចុះ MoU ជាផ្លូវការគ្រោងនឹងធ្វើឡើងនៅក្នុងព្រឹត្តិការណ៍ពិព័រណ៍ទេសចរណ៍អន្តរជាតិដ៏ធំនៅប្រទេសគុយបានាពេលខាងមុខ។ នេះគឺជាសញ្ញាណវិជ្ជមានដែលបង្ហាញថា កម្ពុជាកំពុងពង្រីកឥទ្ធិពលទេសចរណ៍របស់ខ្លួនមិនត្រឹមតែក្នុងតំបន់ ប៉ុន្តែឈានទៅដល់ត្រើយម្ខាងទៀតនៃពិភពលោក៕

ដោយ៖ មឿន ឌីណា (Moeun Dyna)