ភ្នំពេញ៖ កម្ពុជាកំពុងផ្លាស់ប្តូរមុខមាត់ថ្មីតាមរយៈការដ្ឋានសំណង់ទ្រង់ទ្រាយធំនៅទូទាំងប្រទេស។ ប៉ុន្តែសំណួរដែលមនុស្សជាច្រើនចង់ដឹងគឺ៖ តើកម្ពុជាគ្រប់គ្រងលំហូរថវិកាមហាសាល និងបច្ចេកទេសស្មុគស្មាញពីដៃគូអន្តរជាតិផ្សេងៗគ្នាដូចជា ចិន ជប៉ុន កូរ៉េ និងធនាគារពិភពលោក ឱ្យមានប្រសិទ្ធភាពដោយរបៀបណា?

នៅក្នុងកិច្ចភាក្សាដ៏ក្ដៅគគុក (Panel Discussion) កាលពីរសៀលថ្ងៃទី៥ ខែកុម្ភៈ ឆ្នាំ២០២៦ ថ្នាក់ដឹកនាំ និងអ្នកជំនាញមកពីក្រសួងសាធារណការ និងដឹកជញ្ជូន បានទម្លាយនូវ "រូបមន្តជោគជ័យ" និងបទពិសោធន៍ជាក់ស្តែងក្នុងការដោះស្រាយបញ្ហាប្រឈមនៃគម្រោងមេហ្គា (Mega Projects) ដែលជាសរសៃឈាមសេដ្ឋកិច្ចជាតិ។

យុទ្ធសាស្ត្រ «ពហុភាគី»៖ ស្ពានតភ្ជាប់កម្ពុជាទៅកាន់ពិភពលោក

អ្វីដែលគួរឱ្យចាប់អារម្មណ៍បំផុតនោះគឺ កម្ពុជាបានបង្ហាញពីសមត្ថភាពក្នុងការសម្របសម្រួលជាមួយស្តង់ដារបច្ចេកទេសខុសៗគ្នាមកពីគ្រប់ទិសទី រួមមាន៖

ចិន និងជប៉ុន៖ ការលើកកម្រិតផ្លូវជាតិលេខ១០ និងលេខ៥ ដែលជាផ្លូវសេដ្ឋកិច្ចដ៏សំខាន់។

ធនាគារពិភពលោក (World Bank) និង ADB៖ គម្រោងកែលម្អផ្លូវជាតិលេខ៤ និងការអភិវឌ្ឍទីក្រុងឱ្យគួរឱ្យចង់រស់នៅ។

កូរ៉េខាងត្បូង និង AIIB៖ ការវិនិយោគលើប្រព័ន្ធចម្រោះទឹកកខ្វក់ និងបណ្តាញផ្លូវនៅតំបន់ភូមិភាគឦសាន។

មិនមែនគ្រាន់តែជាការសាងសង់ តែគឺជា «គុណភាព និងតម្លាភាព»

កិច្ចពិភាក្សាបានបញ្ជាក់យ៉ាងច្បាស់ថា គន្លឹះសំខាន់មិនមែនត្រឹមតែការចាយលុយឱ្យអស់នោះទេ ប៉ុន្តែគឺការតាមដានយ៉ាងស្អិតរមួត ដើម្បីធានាថាគ្រប់គម្រោងទាំងអស់ត្រូវតែ «ទាន់ពេល ជាប់រឹងមាំ និងមានគុណភាពអន្តរជាតិ»។ អ្នកជំនាញបានចែករំលែកពីការដោះស្រាយបញ្ហាប្រឈមនៅនឹងកន្លែង ការសម្របសម្រួលជាមួយក្រុមហ៊ុនទីប្រឹក្សាអន្តរជាតិ និងការធ្វើឱ្យប្រាកដថា រាល់សេននៃហិរញ្ញប្បទានទាំងនោះ នឹងក្លាយជាផលប្រយោជន៍ពិតប្រាកដសម្រាប់ប្រជាជន។

នេះគឺជាសញ្ញាណដ៏រឹងមាំមួយដែលបង្ហាញថា កម្ពុជាលែងគ្រាន់តែជាអ្នកទទួលជំនួយទៀតហើយ ប៉ុន្តែគឺជា «អ្នកគ្រប់គ្រងគម្រោងប្រកបដោយវិជ្ជាជីវៈ» ដែលអាចដើរទាន់ស្តង់ដារសកលលោក៕

ដោយ៖ មឿន ឌីណា (Moeun Dyna)