ភ្នំពេញ៖ កំពង់ផែក្រុងព្រះសីហនុ កំពុងត្រូវបានបម្លែងទៅកំពង់ផែស្នូល និងមជ្ឈមណ្ឌលឡូជីស្ទីកថ្នាក់តំបន់ ដោយមានការគាំទ្រពីរដ្ឋាភិបាលជប៉ុន និង JICA, ជាចំណុចសំខាន់ក្នុងខ្សែសង្វាក់ផ្គត់ផ្គង់ និងពាណិជ្ជកម្មអន្តរជាតិ។

នៅថ្ងៃចន្ទ ទី២ ខែកុម្ភៈ ឆ្នាំ២០២៦ លោក លូ គឹមឈន់, ប្រតិភូរាជរដ្ឋាភិបាលកម្ពុជា និងប្រធានអគ្គនាយកកំពង់ផែស្វយ័តក្រុងព្រះសីហនុ, តំណាង រដ្ឋមន្ត្រីក្រសួងសាធារណការ និងដឹកជញ្ជូន, បានអញ្ជើញជាសហធិបតី ជាមួយលោក NAGASE Kensuke, អនុប្រធានបេសកកម្មស្ថានទូតជប៉ុនប្រចាំកម្ពុជា នៅពិធីបើកសិក្ខាសាលាផ្សព្វផ្សាយគម្រោងអភិវឌ្ឍផែនការមេ ដើម្បីបម្លែងកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

សិក្ខាសាលានេះមានការចូលរួមពីតំណាង JICA, ក្រសួង និងស្ថាប័នពាក់ព័ន្ធ, ព្រមទាំងក្រុមហ៊ុនឯកជនជាច្រើន។ គោលបំណងនៃសិក្ខាសាលា គឺដើម្បីផ្តល់ព័ត៌មាន និងប្រមូលទិន្នន័យសំខាន់ៗ ដើម្បីធ្វើឱ្យការរៀបចំផែនការមេមានភាពច្បាស់លាស់ និងត្រឹមត្រូវស្របតាមលក្ខណៈបច្ចេកទេស និងការវិវត្តន៍សង្គម-សេដ្ឋកិច្ចកម្ពុជា។

លោក NAGASE Kensuke បានបញ្ជាក់ពីការប្តេជ្ញារបស់ រដ្ឋាភិបាល និង JICA ជប៉ុន ក្នុងការគាំទ្រគម្រោងនេះ ដោយផ្ដល់ជំនាញ និងបទពិសោធន៍ខ្ពស់។ ខណៈដែលឯកឧត្តម លូ គឹមឈន់ បានថ្លែងអំណរគុណចំពោះការគាំទ្ររបស់ជប៉ុន និង JICA, ដែលជាដៃគូសំខាន់ក្នុងការអភិវឌ្ឍវិស័យដឹកជញ្ជូន និងកំពង់ផែនៅកម្ពុជា។

សូមរម្លឹកថា គម្រោងអភិវឌ្ឍផែនការមេនេះ មានចក្ខុវិស័យផ្តួចផ្តើមពី សម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត, ដើម្បីបម្លែងកំពង់ផែក្រុងព្រះសីហនុទៅជាកំពង់ផែស្នូលក្នុងតំបន់។ គម្រោងនេះមិនត្រឹមសម្រាប់កម្ពុជាប៉ុណ្ណោះ តែជាចំណុចសំខាន់ក្នុងការបម្រើបណ្ដាញផ្គត់ផ្គង់ និងការជួញដូរ អន្តរជាតិ, ស្របទៅនឹងយុទ្ធសាស្ត្រអភិវឌ្ឍជាតិ និងការលើកកម្ពស់ ការតភ្ជាប់ពាណិជ្ជកម្មក្នុងតំបន់ និងពិភពលោក។

គូសបញ្ជាក់ថា កម្ពុជាកំពុងចាប់ផ្តើមគម្រោងអភិវឌ្ឍន៍ដ៏សំខាន់ ដើម្បីបម្លែងកំពង់ផែក្រុងព្រះសីហនុ ទៅជាកំពង់ផែស្នូលនៃតំបន់ និងមជ្ឈមណ្ឌលឡូជីស្ទីកមូលដ្ឋានអន្តរជាតិ។ គម្រោងនេះ មិនត្រឹមសម្រាប់បម្រើសេវាកម្មក្នុងប្រទេសកម្ពុជា ប៉ុន្តែជាចំណុចសំខាន់ក្នុងខ្សែសង្វាក់ផ្គត់ផ្គង់ និងពាណិជ្ជកម្មអន្តរជាតិ។

ជាមួយនឹងការគាំទ្រពី រដ្ឋាភិបាលជប៉ុន និង JICA, កំពង់ផែព្រះសីហនុត្រូវបានបម្លែងទៅជាមជ្ឈមណ្ឌលដឹកជញ្ជូនទាន់សម័យ និងមានប្រសិទ្ធភាពក្នុងតំបន់អាស៊ីអាគ្នេយ៍៕

ដោយ៖ មឿន ឌីណា (Moeun Dyna)