ភ្នំពេញ៖ រាជរដ្ឋាភិបាលជប៉ុនបានផ្តល់ជំនួយឥតសំណងជាង ១១លានដុល្លារអាមេរិក ដល់កម្ពុជា ដើម្បីគាំទ្រការបោសសម្អាតមីន និងជួយជនរងគ្រោះដោយសារមីន តាមរយៈគម្រោង Integrated Mine Clearance and Victim Assistance – Phase 3។

កិច្ចព្រមព្រៀងនេះត្រូវបានចុះហត្ថលេខានៅថ្ងៃទី១២ ខែមករា ឆ្នាំ២០២៦ នៅទីស្តីការក្រសួងការបរទេសកម្ពុជា រវាង ឧបនាយករដ្ឋមន្ត្រី ប្រាក់ សុខុន និង ឯកអគ្គរដ្ឋទូតជប៉ុន UENO Atsushi។ ជំនួយមានតម្លៃសរុប ១.៧ពាន់លានយ៉េន ដែលគាំទ្រការងាររបស់អង្គភាព (CMAC)។

គម្រោងរយៈពេល ២ឆ្នាំនេះនឹងអនុវត្តនៅខេត្តបាត់ដំបង ពោធិ៍សាត់ និងកោះកុង ដែលជាតំបន់នៅសល់មីន និងសំណល់យុទ្ធភណ្ឌពីសង្គ្រាម។ តាមការប៉ាន់ប្រមាណ គម្រោងនេះនឹងផ្តល់អត្ថប្រយោជន៍ផ្ទាល់ដល់ប្រជាពលរដ្ឋជាង ២៧,០០០គ្រួសារ ហើយជួយបង្កើនសុវត្ថិភាព និងឱកាសរស់នៅក្នុងសហគមន៍ជនបទ។

ក្រៅពីការបោសសម្អាតផ្ទៃដី គម្រោងនេះក៏នឹងបំពាក់បច្ចេកវិទ្យាទំនើប រួមមាន ម៉ាស៊ីនរកមីន ALIS គ្រឿងចក្រកម្ទេចមីន ដ្រូន និងប្រព័ន្ធទិន្នន័យបញ្ញាសិប្បនិម្មិត (AI) ដើម្បីបង្កើនប្រសិទ្ធភាព និងកាត់បន្ថយហានិភ័យសម្រាប់កម្លាំងប្រតិបត្តិការ CMAC ប្រមាណជាង ៣៥០នាក់។

បន្ថែមពីនេះ គម្រោងក៏រួមបញ្ចូលការគាំទ្រដល់ជនរងគ្រោះដោយសារមីន តាមរយៈកម្មវិធីអភិវឌ្ឍជីវភាព និងជំនួយសម្រាប់ជនពិការ ដើម្បីជួយឲ្យពួកគេអាចរស់នៅដោយឯករាជ្យ និងមានសេដ្ឋកិច្ចប្រសើរឡើង។

ជប៉ុនជាដៃគូសំខាន់របស់កម្ពុជាក្នុងវិស័យបោសសម្អាតមីនអស់រយៈពេលជាច្រើនទសវត្សរ៍ ហើយជំនួយលើកនេះបន្តបង្ហាញពីការគាំទ្ររបស់តូក្យូចំពោះសន្តិភាព សុវត្ថិភាព និងការអភិវឌ្ឍប្រកបដោយចីរភាពនៅកម្ពុជា៕

ដោយ៖ មឿន ឌីណា (Moeun Dyna)