កំពត៖ ផ្លូវជាតិលេខ៤១ គឺជាសរសៃឈាមសេដ្ឋកិច្ចដ៏មានសារៈសំខាន់ តភ្ជាប់ទៅតំបន់ទេសចរណ៍ធម្មជាតិ នៅតាមបណ្ដាខេត្ត មានខេត្តព្រះសីហនុ ខេត្តកែប និងខេត្តកំពត តាមរយៈខ្សែផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៣១ និងផ្លូវជាតិ៣៣។
ផ្លូវនេះ ថែមទាំងឆ្លងកាត់ខេត្តចំនួន៤ រួមមាន ខេត្តកណ្តាល កំពង់ស្ពឺ តាកែវ និងខេត្តកំពត និងតភ្ជាប់ទៅកាន់កំពង់ផែអន្តរជាតិសំខាន់ៗ ដូចជាកំពង់ផែក្រុងព្រះសីហនុ កំពង់ផែពហុបំណងខេត្តកំពត និងមជ្ឈមណ្ឌលភស្តុភារកម្ម កំពង់ផែទេសចរណ៍ខេត្តកំពត និងកំពង់ផែទេសចរណ៍ខេត្តកែបកោះទន្សាយ។
ផ្លូវជាតិលេខ៤១ (ថ្នល់ទទឹង-ខេត្តកំពត) តភ្ជាប់ជាមួយផ្លូវជាតិលេខ៥១ ផ្លូវជាតិលេខ៤ ផ្លូវជាតិលេខ៣ និងតភ្ជាប់ជាមួយខ្សែផ្លូវផ្សេងៗនៅក្នុងតំបន់នេះ ក្នុងទិសដៅឆ្ពោះទៅកាន់ខេត្តកំពត ជាពិសេសតំបន់ឧស្សាហកម្ម កំពង់ផែសមុទ្រ តំបន់ទេសចរណ៍ឆ្នេរសមុទ្រធម្មជាតិ តំបន់កោះ និងរមណីយដ្ឋានធម្មជាតិ ប្រវត្តិសាស្ត្រដ៏ស្រស់ស្អាត ដែលមានភាពទាក់ទាញបំផុត រួមទាំងឆ្ពោះទៅព្រំដែនកម្ពុជា-វៀតណាម។
ផ្លូវជាតិនេះ បានចូលរួមលើកកម្ពស់ ការអភិវឌ្ឍតំបន់ទេសចរណ៍សំខាន់ៗ ជាពិសេសបានចូលរួមជួយសម្រួល និងបញ្ចៀសការកកស្ទះនៅលើផ្លូវជាតិលេខ៣ និងផ្លូវជាតិលេខ៤ បានមួយកម្រិត បន្ថែមទៀតផងដែរ។
ផ្លូវជាតិលេខ៤១ តភ្ជាប់ពីផ្លូវជាតិលេខ៤ ត្រង់ចំណុងថ្នល់ទទឹងទៅដល់ផ្លូវជាតិលេខ៣ ត្រង់ចំណុចជិតចំណោតយាយម៉ៅ មានប្រវែង ៩៥,២៧គីឡូម៉ែត្រ ត្រូវបានរាជរដ្ឋាភិបាលចំណាយថវិកាជាង ៦៧លានដុល្លារ ដើម្បីស្ដារ និងលើកកម្រិតគុណភាពឱ្យកាន់តែប្រសើរ។
គម្រោងផ្លូវនេះ ត្រូវបានអតីតនាយករដ្ឋមន្ត្រីនៃកម្ពុជា សម្ដេចតេជោ ហ៊ុន សែន បើកការដ្ឋានសាងសង់កាលពីអំឡុងចុងខែធ្នូ ឆ្នាំ ២០២២កន្លងទៅ ថវិកាសាងសង់ផ្លូវនេះជាឥណទានសម្បទានពីរដ្ឋាភិបាលចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជាសម្រាប់ការដោះស្រាយផលប៉ះពាល់ និងពន្ធអាករផ្សេងៗ។
គួររម្លឹកផងដែរថា នៅក្នុងពិធីបើកការដ្ឋានស្ដារ និងលើកកម្រិតគុណភាពផ្លូវជាតិលេខ៤១ លោក ស៊ុន ចាន់ថុល អតីតរដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងបញ្ជាក់ថា «ផ្លូវនេះជាសរសៃឈាមសេដ្ឋកិច្ចដ៏មានសារៈសំខាន់»។
លោក បានថ្លែងបន្តថា ផ្លូវនេះតភ្ជាប់ទៅកាន់កំពង់ផែអន្ដរជាតិសំខាន់ៗ ដូចជា កំពង់ផែពហុបំណងខេត្តកំពត និងមជ្ឈមណ្ឌលភស្តុភារកម្មដែលកំពុងសាងសង់ កំពង់ផែទេសចរណ៍ខេត្តកំពត និងកំពង់ផែទេសចរណ៍ខេត្តកែប-កោះទន្សាយ ដែលទើបសាងសង់រួច ព្រមទាំងតភ្ជាប់ទៅតំបន់ទេសចរណ៍ធម្មជាតិ ដែលនៅតាមបណ្តាខេត្តព្រះសីហនុ ខេត្តកែប និងខេត្តកំពត តាមរយៈខ្សែផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៣១ និងផ្លូវជាតិលេខ៣៣។
គួរបញ្ជាក់ថា ផ្លូវនេះ គឺជាផ្លូវដែលតភ្ជាប់ពីតំបន់ផ្សេងៗ ទៅកាន់តំបន់ឆ្នេរសមុទ្រនៃព្រះរាជាណាចក្រកម្ពុជា ដោយវាបានភ្ជាប់ពីផ្លូវជាតិលេខ៤ ទៅផ្លូវជាតិលេខ៣ ទៅកាន់ទីរួមខេត្តកំពត ទៅកាន់ឆ្នេរសមុទ្រក្រុងកែប និងមួយផ្នែកទៀតទៅកាន់ឆ្នេរសមុទ្រក្រុងព្រះសីហនុ។ មិនតែប៉ុណ្ណោះ វាក៏នឹងក្លាយជាផ្លូវដឹកជញ្ជូនដ៏សំខាន់មួយសម្រាប់ដឹកជញ្ជូនទំនិញពីកំពង់ផែទឹកជ្រៅខេត្តកំពតទៅកាន់រាជធានីភ្នំពេញ ខេត្តកំពង់ស្ពឺ ដែលជាតំបន់មានសក្ដានុពលខ្ពស់ក្នុងវិស័យឧស្សាហកម្ម ការផលិត និងការនាំចេញ។
បើតាមអ្នកជំនាញនៃវិស័យអចលនទ្រព្យកម្ពុជាជាច្រើនបានមើលឃើញថា ផ្លូវនេះបានជួយជំរុញសក្ដានុពលវិស័យដីធ្លី និងតម្រូវការដីធ្លីនៅតាមបណ្ដោយផ្លូវនេះបានមួយកម្រិតទៀតផងដែរ ជាពិសេសរោងចក្រ ឃ្លាំងស្តុកទំនិញ ខណៈបច្ចុប្បន្នសកម្មភាពនៃការប្រើប្រាស់ដីធ្លីនៅតាមបណ្ដោយផ្លូវជាតិលេខ៤១នេះ ក៏ចាប់ផ្ដើមកម្រើកជាបន្តបន្ទាប់ ដោយមានរោងចក្រសហគ្រាស ឃ្លាំងស្តុកទំនិញ ការអភិវឌ្ឍលំនៅឋាន។
ខ្សែផ្លូវនេះ បានជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ភ្ញៀវទេសចរ និងការដឹកជញ្ជូនទំនិញគ្រប់ប្រភេទ និងកសិផល ដំណាំកៅស៊ូ ម្រេច ផលនេសាទ អំបិល ដំណាំស្រូវ និងផ្លែឈើ ទៅកាន់ទីផ្សារក្នុងស្រុក និងទីផ្សារអន្តរជាតិ។
បន្ថែមពីលើនេះ ផ្លូវជាតិលេខ៤១នេះ ក៏នឹងចូលរួមលើកកម្ពស់ការអភិវឌ្ឍតំបន់ទេសចរណ៍សំខាន់ៗ ដូចជា តំបន់ឧទ្យានជាតិព្រះមុនីវង្សបូកគោ កោះទន្សាយ តំបន់ឆ្នេរ និងតំបន់មាត់សមុទ្រធម្មជាតិផងដែរ។ ខ្សែផ្លូវនេះ ក៏នឹងជួយសម្រួល និងបញ្ចៀសការកកស្ទះនៅលើផ្លូវជាតិលេខ៣ និងផ្លូវជាតិលេខ៤ បានមួយកម្រិតបន្ថែមទៀត៕
ដោយ៖ មឿន ឌីណា (Moeun Dyna)
