ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន ៥២,៧២លានដុល្លារសម្រាប់គម្រោងពង្រីកបណ្តាញអគ្គិសនីនៅកម្ពុជា។ បើតាមសេចក្ដីប្រកាសព័ត៌មាន ADB។
គម្រោងនេះនឹងពង្រឹងបណ្តាញបញ្ជូនរបស់ប្រទេសនេះ ដើម្បីធ្វើសមាហរណកម្មថាមពលកកើតឡើងវិញបន្ថែមទៀតទៅក្នុងបណ្តាញជាតិ និងជួយបំពេញតម្រូវការអគ្គិសនីដែលកំពុងកើនឡើងជាមួយនឹងថាមពលស្អាត និងផលិតក្នុងស្រុក។ ជាការបញ្ជាក់ ADB។
ADB បានលើកឡើងថា ប្រទេសកម្ពុជាបានពង្រីកការផលិតអគ្គិសនីក្នុងស្រុករបស់ខ្លួនយ៉ាងឆាប់រហ័ស ដោយបង្កើនទិន្នផលទ្វេដងពី ៨.៦៨តេរ៉ាវ៉ាត់ម៉ោង (TWh) ក្នុងឆ្នាំ២០២០ ដល់ ១៧.៨៥TWh ក្នុងឆ្នាំ២០២៤។ ក្នុងរយៈពេលដូចគ្នានេះ ការពឹងផ្អែកលើអគ្គិសនីដែលបាននាំចូលបានធ្លាក់ចុះពី ៣.០៦ ទៅ ១.៥៧TWh ។ វឌ្ឍនភាពនេះ ឆ្លុះបញ្ចាំងពីការកើនឡើងនៃការពឹងផ្អែកលើខ្លួនឯងថាមពលរបស់ប្រទេស និងសក្តានុពលនៃប្រភពកកើតឡើងវិញ ដើម្បីគាំទ្រដល់គោលដៅអភិវឌ្ឍន៍របស់ខ្លួន។
អគ្គិសនីដែលអាចទុកចិត្តបាន និងតម្លៃសមរម្យ គឺជាឆ្អឹងខ្នងនៃការរីកចម្រើនរបស់ប្រទេសកម្ពុជា។ បើតាម ប្រសាសន៍លោកស្រី Jyotsana Varma នាយក ADB ប្រចាំប្រទេសកម្ពុជា បានបន្តថា គម្រោងនេះ គឺច្រើនជាងការកសាងខ្សែបញ្ជូន វាគឺអំពីការតភ្ជាប់មនុស្ស សាលារៀន មន្ទីរពេទ្យ និងអាជីវកម្មទៅកាន់អនាគតថាមពលស្អាត និងធន់ជាងមុន។ លោកសី បញ្ជាកើថា តាមរយៈការនាំយកថាមពលកកើតឡើងវិញកាន់តែច្រើនទៅក្នុងបណ្តាញ កម្ពុជាអាចផ្តល់ថាមពលដល់ប្រជាជនរបស់ខ្លួន ខណៈពេលដែលការពារបរិស្ថានសម្រាប់មនុស្សជំនាន់ក្រោយ។
បណ្តាញអគ្គិសនីរបស់កម្ពុជាត្រូវបានសាងសង់ឡើងសម្រាប់ថាមពលធម្មតា ហើយឥឡូវនេះត្រូវការការពង្រីកដើម្បីគ្រប់គ្រងថាមពលព្រះអាទិត្យ និងខ្យល់ដែលកំពុងកើនឡើង។ គម្រោងនេះ នឹងសាងសង់ខ្សែបញ្ជូនថាមពលអគ្គិសនី ២៣០គីឡូវ៉ុលប្រវែង ៥៥គីឡូម៉ែត្ររវាងខេត្តពោធិ៍សាត់ និងកំពង់ឆ្នាំង និងកែលម្អស្ថានីយរងចំនួន ៩ នៅទូទាំងប្រទេស។
គួរបញ្ជាក់ថា ការវិនិយោគទាំងនេះ នឹងពង្រឹងសមត្ថភាពបញ្ជូនថាមពលដើម្បីផ្តល់ថាមពលកកើតឡើងវិញទៅកាន់មជ្ឈមណ្ឌលតម្រូវការទូទាំងប្រទេស ធ្វើឱ្យប្រសើរឡើងនូវភាពជឿជាក់ និងលើកទឹកចិត្តដល់ការវិនិយោគឯកជនកាន់តែច្រើន។
ស្របតាមផែនការមេអភិវឌ្ឍន៍ថាមពលកម្ពុជា (2022-2040) និងគោលនយោបាយជាតិប្រសិទ្ធភាពថាមពល (2022-2030) គម្រោងនេះនឹងជួយកាត់បន្ថយការបាត់បង់ការបញ្ជូន និងលើកកម្ពស់សន្តិសុខថាមពល៕
ដោយ៖ មឿន ឌីណា (Moeun Dyna)
