ភ្នំពេញ៖ ក្នុងរយៈពេល៨ខែ ឆ្នាំ២០២៥នេះ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីគម្រោងវិនិយោគចំនួន ៤៩១គម្រោង ក្នុងទំហំទុនវិនិយោគសរុបប្រមាណ ៧,២ប៊ីលានដុល្លារ មានគម្រោងវិនិយោគមានការកើនឡើងចំនួន ២០៤គម្រោង ស្មើនឹងប្រមាណ ៧១%។
ទុនវិនិយោគមានការកើនឡើងប្រមាណ ២,៥ប៊ីលានដុល្លារ ស្មើនឹងប្រមាណ ៥០% បើប្រៀបធៀបនឹងរយៈពេលដូចគ្នាក្នុងឆ្នាំ២០២៤។ នេះបើតាមការបញ្ជាក់ ក្រុមប្រឹក្សាអភិវឌ្ឍន៍កម្ពុជា។
ជាការកត់សម្គាល់ បើប្រៀបធៀបនឹងគម្រោងវិនិយោគដែលត្រូវបានចុះបញ្ជីក្នុងឆ្នាំ២០២៤ ដែលមានត្រឹមតែ ៤១៤គម្រោង ក្នុងរយៈពេល៨ខែ នេះ គ.វ.ក. បានចុះបញ្ជីគម្រោងវិនិយោគលើសការចុះបញ្ជីគម្រោងវិនិយោគពេញមួយឆ្នាំ២០២៤ រហូតដល់ ទៅ ៧៧គម្រោង។
ក្នុងរយៈពេល៨ខែនេះ គម្រោងវិនិយោគជិត ៥០០គម្រោង ទុនសរុប៧,២ប៊ីលានដុល្លារ ប្រភពទុនវិនយោគចិន បានឈរនៅលើកំពូលតារាងមានចំណែក ៥២,៨២%, កម្ពុជា ៣១,២៦%, សិង្ហបុរី ៦,៩៤%, វៀតណាម ៥,៤៥%, កោះ British virgin ០,៨៩%, អង់គ្លេស ០,៦៧%, កោះ cayman ០,៥៥%, Burmeda ០,៣៥%, សហរដ្ឋអាមេរិក ០,២៩%, កោះ Samoa ០,២៧%។
តាមការបញ្ជាក់បន្តទៀត ក្រុមប្រឹក្សាអភិវឌ្ឍន៍កម្ពុជា ទុនវិនិយោគវិស័យឧស្សាហកម្មចំនួន ៥ប៊ីលានដុល្លារ ខណៈ វិស័យហេដ្ឋារចនាសម្ព័ន្ធ និងផ្សេងៗចំនួន ១,៨ប៊ីលានដុល្លារ និងវិស័យកសិកម្ម និងកសិឧស្សាហកម្មចំនួន ៣៧០លានដុល្លារ ហើយនិងវិស័យទេសចរណ៍ចំនួន ១៧៥លានដុល្លារ៕
ដោយ៖ មឿន ឌីណា (Moeun Dyna)
