អន្តរជាតិ៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអង្គារ (ទី៥ ខែសីហា) ថាដំបូងឡើយ សហរដ្ឋអាមេរិកនឹងដាក់ "ពន្ធតិចតួច" លើការនាំចូលឱសថ មុនពេលដំឡើងដល់ ១៥០ភាគរយក្នុងរយៈពេល ១៨ខែ ហើយនៅទីបំផុតដល់ ២៥០ភាគរយ នៅក្នុងចលនាមួយក្នុងគោលបំណងជំរុញផលិតកម្មក្នុងស្រុក។
លោក Trump បានប្រាប់ស្ថានីយទូរទស្សន៍ CNBC នៅក្នុងបទសម្ភាសន៍មួយថា "ក្នុងរយៈពេលមួយឆ្នាំអតិបរមាមួយឆ្នាំកន្លះវានឹងទៅ ១៥០ភាគរយហើយបន្ទាប់មកវានឹងទៅ ២៥០ភាគរយ ដោយសារតែយើងចង់បានឱសថដែលផលិតនៅក្នុងប្រទេសរបស់យើង"។
លោក មិនបានបញ្ជាក់ពីអត្រាពន្ធដំបូងឡើយ ទោះបីជាលោកធ្លាប់បានស្នើកាលពីខែកុម្ភៈថា ពន្ធលើឱសថ និងសារធាតុ semiconductor នឹងចាប់ផ្តើមនៅ "២៥ភាគរយ ឬខ្ពស់ជាងនេះ" ជាមួយនឹងការកើនឡើងយ៉ាងច្រើនក្នុងរយៈពេលមួយឆ្នាំ។ កាលពីខែមុន លោក បាននិយាយថាពន្ធលើការនាំចូលឱសថអាចនឹងកើនឡើងដល់ទៅ ២០០ភាគរយ។
លោក Trump ក៏បាននិយាយកាលពីថ្ងៃអង្គារថា លោកគ្រោងនឹងប្រកាសពន្ធលើឧបករណ៍អេឡិចត្រូនិកនិងបន្ទះសៀគ្វីនៅក្នុង "សប្តាហ៍ក្រោយឬដូច្នេះ" ប៉ុន្តែមិនបានផ្តល់ព័ត៌មានលម្អិតបន្ថែមទេ។
សហរដ្ឋអាមេរិក បាននឹងកំពុងធ្វើការត្រួតពិនិត្យសន្តិសុខជាតិនៃវិស័យឱសថ ហើយឧស្សាហកម្មនេះបាននិងកំពុងត្រៀមខ្លួនសម្រាប់លទ្ធភាពនៃការយកពន្ធតាមវិស័យជាក់លាក់។ រដ្ឋបាលមិនបានប្រកាសថាតើលទ្ធផលនៃការស៊ើបអង្កេតនោះនឹងត្រូវបញ្ចេញនៅពេលណាទេ។
ក្រុមហ៊ុនឱសថជាច្រើនបានសន្យាថា នឹងវិនិយោគរាប់ពាន់លានដុល្លារនៅក្នុងការផលិតរបស់សហរដ្ឋអាមេរិក ខណៈដែលលោក Trump នៅតែបន្តគំរាមកំហែងពន្ធនាំចូល។ ថ្មីៗនេះ AstraZeneca បានប្តេជ្ញាចិត្តចំនួន ៥០ពាន់លានដុល្លារអាមេរិក ដើម្បីពង្រីកប្រតិបត្តិការរបស់ខ្លួននៅក្នុងសហរដ្ឋអាមេរិក។
PhRMA ដែលជាក្រុមបញ្ចុះបញ្ចូលដ៏សំខាន់សម្រាប់ឧស្សាហកម្មឱសថមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
កិច្ចព្រមព្រៀងក្របខណ្ឌរវាងសហរដ្ឋអាមេរិក និងសហភាពអឺរ៉ុបបច្ចុប្បន្នកំណត់ពន្ធលើឱសថ និងសារធាតុ semiconductors នៅកម្រិតសូន្យ។ ទោះយ៉ាងណាក៏ដោយ ប្រសិនបើសហរដ្ឋអាមេរិកដំឡើងពន្ធ បន្ទាប់ពីការត្រួតពិនិត្យការនាំចូលរបស់ខ្លួន នោះពួកគេនឹងត្រូវបិទនៅត្រឹម ១៤ភាគរយ៕
ប្រភព៖ CNA
ប្រែសម្រួលដោយ៖ MD-Angkor
