ភ្នំពេញ៖ គិតពីឆ្នាំ២០២៤ រហូតដល់ខែឧសភា ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ផ្តល់ការលើកទឹកចិត្តដល់គម្រោងចំនួន ២៩៧គម្រោង មានទុនវិនិយោគប៉ាន់ស្មានសរុប ៧០២៩ លានដុល្លារ និងប៉ាន់ស្មានអាចបង្កើតការងារ ៥៣ ១៨៧កន្លែង។ នេះតាមសេចក្ដីប្រកាសព័ត៌មានក្រោយកិច្ចប្រជុំលើកទី១៦របស់ក្រុមការងារជំរុញការវិនិយោគខេត្តព្រះសីហនុ។
កិច្ចប្រជុំកាលពីថ្ងៃទី២៨ ខែឧសភានេះ ក្រុមការងារជំរុញការវិនិយោគខេត្តព្រះសីហនុ បានសម្រេចជាគោលការណ៍លើកទឹកចិត្តដល់គម្រោងវិនិយោគចំនួន ១០គម្រោង មានទុនវិនិយោគប៉ាន់ស្មាន សរុប១៥៤លានដុល្លារ ដែលនឹងអាចបង្កើតការងារបានប្រមាណ ១ ១៨៧កន្លែង។
គម្រោងវិនិយោគទាំងនោះ រួមមាន គម្រោងពាក់ព័ន្ធនឹងអគារជាប់គាំងចំនួន៤ គម្រោងថ្មីចំនួន៤ គម្រោងពង្រីកចំនួន១ និងគម្រោងមានស្រាប់ចំនួន១។ គម្រោងវិនិយោគទាំង១០ មានដូចជា៖ រោងចក្រកែច្នៃ អគារពាណជ្ជកម្ម គ្រឹះស្ថានសិក្សាចំណេះទូទៅ ផែបណ្ដែតទឹក សណ្ឋាគារ និងអគារស្នាក់នៅរួម។
លោក ហ៊ាន សាហ៊ីប រដ្ឋលេខាធិការក្រសួង សេដ្ឋកិច្ច និងហិរញ្ញវត្ថុ និងជាប្រធានក្រុមការងារ បានបញ្ជាក់ ក្នុងអង្គប្រជុំអំពីបច្ចុប្បន្នភាពនៃស្ថានភាពគោលនយោបាយពាណិជ្ជកម្មសកល និងការការពារឧស្សាហកម្មក្នុងស្រុក ដែលបណ្តាលឱ្យមានការកើនឡើងនៃរបាំងពាណិជ្ជកម្ម ជះឥទ្ធិពលដល់ការទាក់ទាញវិនិយោគ ការអភិវឌ្ឍឧស្សាហកម្ម និងការនាំចេញរបស់កម្ពុជាផងដែរ ។
តាមការគ្រោងទុកនៅក្នុងខែមិថុនា ឆ្នាំ២០២៥ ក្រុមការងារនឹងចុះពិនិត្យទីតាំងគម្រោងដែលស្នើការលើកទឹកចិត្ត ការអនុគ្រោះ និងការសម្រួលនីតិវិធីប្រមាណ ៣០គម្រោង៕
ដោយ៖ មឿន ឌីណា (Moeun Dyna)
