អន្តរជាតិ៖ គណៈកម្មការអឺរ៉ុបបានចេញផ្សាយ "ផែនទីបង្ហាញផ្លូវ" បង្ហាញពីផែនការរបស់ខ្លួនក្នុងការបញ្ចប់ការពឹងផ្អែករបស់អឺរ៉ុបលើថាមពលរុស្ស៊ីក្នុងប៉ុន្មានឆ្នាំខាងមុខនេះ។

តាមផែនការ ការនាំចូលឧស្ម័ន និងឧស្ម័នធម្មជាតិរាវទាំងអស់របស់រុស្ស៊ីទៅកាន់រដ្ឋជាសមាជិកសហភាពអឺរ៉ុបនឹងត្រូវហាមឃាត់នៅចុងឆ្នាំ 2027។

លោក Dan Jorgensen តំណាងអឺរ៉ុបទទួលបន្ទុកថាមពល បាននិយាយនៅក្នុងសន្និសីទសារព័ត៌មាននៅទីក្រុង Strasbourg កាលពីថ្ងៃអង្គារថា "យើងនឹងមិនអនុញ្ញាតឱ្យរុស្ស៊ីប្រើប្រាស់ថាមពលអាវុធប្រឆាំងនឹងយើងទៀតទេ...។

ជាការឆ្លើយតបទៅនឹងផែនការនេះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់ទីភ្នាក់ងារព័ត៌មាន Reuters កាលពីថ្ងៃអង្គារថា អឺរ៉ុបកំពុង "បាញ់ជើងខ្លួនឯង"។

សហភាព​អឺរ៉ុប ​បាន​ប្តេជ្ញា​បញ្ចប់​ទំនាក់ទំនង​ថាមពល​របស់ខ្លួន​ជាមួយ​រុស្ស៊ី​បន្ទាប់ពី​ក្រុង​ម៉ូស្គូ ​បាន​ចាប់ផ្តើម​ការ​លុកលុយ​ពេញលេញ​របស់​ខ្លួន​លើ​អ៊ុយក្រែន​ក្នុង​ឆ្នាំ២០២២។ សំណុំនៃសំណើនីតិបញ្ញត្តិនឹងត្រូវដាក់នៅខែមិថុនា ដោយស្នើឱ្យរដ្ឋសមាជិកសហភាពអឺរ៉ុបទាំងអស់បង្កើត "ផែនការជាតិ" ដើម្បីបញ្ឈប់ការនាំចូលឧស្ម័ន ឥន្ធនៈនុយក្លេអ៊ែរ និងប្រេងពីរុស្ស៊ី។ នេះបើយោងតាមគណៈកម្មការអឺរ៉ុប។

រដ្ឋជាសមាជិកសហភាពអឺរ៉ុបត្រូវតែដាក់យុទ្ធសាស្ត្រនៅក្រោមផែនការសម្រាប់ការជំនួសការនាំចូលប្រេងពីរុស្ស៊ីនៅចុងឆ្នាំ២០២៧។ បណ្តាប្រទេសនានា ក៏ត្រូវបានស្នើសុំឱ្យគូសបញ្ជាក់អំពីយុទ្ធសាស្ត្រសម្រាប់ការបញ្ចប់ការពឹងផ្អែករបស់ពួកគេលើប្រទេសរុស្ស៊ីចំពោះសារធាតុអ៊ុយរ៉ាញ៉ូម ការចម្រាញ់សារធាតុអ៊ុយរ៉ាញ៉ូម និងសម្ភារៈនុយក្លេអ៊ែរផ្សេងទៀត។

គណៈកម្មការអឺរ៉ុបបានលើកឡើងថា សហភាពអឺរ៉ុបសង្ឃឹមថានឹងផ្លាស់ទីឆ្ងាយពីឧស្ម័នរបស់រុស្ស៊ីដោយ "ការបង្កើនប្រសិទ្ធភាពថាមពល ការពន្លឿនការដាក់ពង្រាយថាមពលកកើតឡើងវិញ និងការផ្គត់ផ្គង់ចម្រុះ"។ ខណៈ ពេលដែលការពឹងផ្អែករបស់សហភាពអឺរ៉ុបលើប្រេង ឧស្ម័ន និងឥន្ធនៈនុយក្លេអ៊ែររបស់រុស្ស៊ីបានថយចុះគួរឱ្យកត់សម្គាល់ចាប់តាំងពីការលុកលុយរបស់ពូទីនមកកាន់អ៊ុយក្រែន ប្លុកនេះនៅតែនាំចូលថាមពលរបស់ខ្លួនក្នុងបរិមាណដ៏ច្រើនពីរុស្ស៊ី។

យោងតាមរបាយការណ៍នេះ ការនាំចូលឧស្ម័នរបស់សហភាពអឺរ៉ុបពីប្រទេសរុស្ស៊ីបានថយចុះពី ៤៥% ក្នុងឆ្នាំ២០២១ មក ១៩% ក្នុងឆ្នាំ២០២៤។ ចំណែកនៃការនាំចូលប្រេងរបស់រុស្ស៊ីក៏បានធ្លាក់ចុះពី ២៧% នៅដើមឆ្នាំ២០២២ មកត្រឹម ៣% ឥឡូវនេះ។ ការងារត្រូវធ្វើដើម្បីកាត់បន្ថយការពឹងផ្អែករបស់ប្លុកលើការផ្គត់ផ្គង់ ផលិតផល និងសេវាកម្មនុយក្លេអែររបស់រុស្ស៊ី ដោយមានជាង ១៤% នៃសារធាតុអ៊ុយរ៉ាញ៉ូមនៅក្នុងសហភាពអឺរ៉ុបបានមកពីប្រទេសរុស្ស៊ីក្នុងឆ្នាំ២០២៤។

របាយការណ៍បានបន្តថា ការពឹងផ្អែករបស់សហភាពអឺរ៉ុបលើឧស្ម័ន ប្រេង និងឥន្ធនៈនុយក្លេអ៊ែររបស់រុស្ស៊ី បង្កហានិភ័យដល់សន្តិសុខសេដ្ឋកិច្ចរបស់យើង និងជួយផ្នែកហិរញ្ញវត្ថុដល់សេដ្ឋកិច្ចសង្គ្រាមរបស់រុស្ស៊ី។

លោក Jorgensen បានបន្ថែមនៅក្នុងសន្និសីទសារព័ត៌មានកាលពីថ្ងៃអង្គារថា "យើងបានមកឆ្ងាយហើយ ប៉ុន្តែមិនឆ្ងាយគ្រប់គ្រាន់ទេ" ដោយបន្ថែមថាវិធានការដើម្បីដកថាមពលរបស់រុស្ស៊ីនឹងមាន "ជាជំហានៗ និងបន្តិចម្តងៗ" ដើម្បីកាត់បន្ថយផលប៉ះពាល់ដល់សហភាពអឺរ៉ុប។

ផែនទីបង្ហាញផ្លូវនេះ ក៏រួមបញ្ចូលផងដែរនូវផែនការដើម្បីកំណត់គោលដៅប្រើប្រាស់របស់រុស្ស៊ីនូវ "កងនាវាស្រមោល" ដែលជានាវាដឹកប្រេង "ជាមួយនឹងកម្មសិទ្ធិ និងការធានារ៉ាប់រងដែលមិនច្បាស់លាស់" ដែលរុស្ស៊ីប្រើប្រាស់ដើម្បីរក្សាការនាំចេញប្រេងរបស់ខ្លួន និងឆ្លងកាត់ការដាក់ទណ្ឌកម្ម៕

ប្រភព៖ BBC

ប្រែសម្រួលដោយ៖ MD-Angkor