អន្តរជាតិ៖ នាយករដ្ឋមន្ត្រីវៀតណាម លោក Pham Minh Chinh បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលថ្ងៃទី៧ មេសានេះ ថា វៀតណាមនឹងទិញទំនិញអាមេរិកបន្ថែមទៀត រួមទាំងផលិតផលការពារជាតិ និងសន្តិសុខ ហើយបានស្នើសុំពន្យារពេល ៤៥ថ្ងៃក្នុងការដំឡើងពន្ធរបស់សហរដ្ឋអាមេរិក។
លោក Chinh បាននិយាយនៅក្នុងកិច្ចប្រជុំគណៈរដ្ឋមន្ត្រីកាលពីល្ងាចថ្ងៃចន្ទ ទី៧ ថា ទីក្រុងហាណូយក៏នឹងស្វែងរកការដឹកជញ្ជូនយន្តហោះពាណិជ្ជកម្មលឿនជាងមុន ដែលក្រុមហ៊ុនអាកាសចរណ៍វៀតណាមបានបញ្ជាទិញពីសហរដ្ឋអាមេរិកផងដែរ។
ប្រទេសនៅអាស៊ីអាគ្នេយ៍ ដែលជាមូលដ្ឋានផលិតកម្មក្នុងតំបន់ដ៏សំខាន់សម្រាប់ក្រុមហ៊ុនលោកខាងលិចជាច្រើនកាលពីឆ្នាំមុនមានអតិរេកពាណិជ្ជកម្មជាង ១២៣ពាន់លានដុល្លារ ជាមួយនឹងសហរដ្ឋអាមេរិកកាលពីឆ្នាំមុនដែលជាទីផ្សារនាំចេញធំបំផុតរបស់ខ្លួន។
លោក Chinh បាននិយាយថា ប្រទេសវៀតណាមបានស្នើសុំឱ្យសហរដ្ឋអាមេរិកពន្យារពេលអត្រាពន្ធ ៤៦ភាគរយ ដែលប្រធានាធិបតីអាមេរិក លោក Donald Trump បានប្រកាសកាលពីសប្តាហ៍មុន ដើម្បីទុកពេលសម្រាប់ការចរចា។
សេចក្តីថ្លែងការណ៍បាននិយាយថា វៀតណាមកំពុងស្វែងរក ការចរចាជាមួយភាគីអាមេរិកសម្រាប់ ពាណិជ្ជកម្មប្រកបដោយតុល្យភាព និងនិរន្តរភាព ស្របតាមផលប្រយោជន៍របស់ភាគីទាំងពីរ។
សន្ទស្សន៍ហ៊ុនគោលរបស់ប្រទេសនេះបានធ្លាក់ចុះជិត ១៤ភាគរយចាប់តាំងពីការប្រកាសរបស់ លោក Trump អំពីពន្ធគយកាលពីថ្ងៃទី២ ខែមេសា។ សន្ទស្សន៍នេះ បានធ្លាក់ចុះ ៦.២៦ភាគរយដល់ ១,១៣៥នៅក្នុងការជួញដូរដំបូងកាលពីថ្ងៃអង្គារ។
តួលេខរដ្ឋាភិបាលរបស់ប្រទេសវៀតណាមកាលពីថ្ងៃអាទិត្យក៏បានបង្ហាញថា សេដ្ឋកិច្ចរបស់ខ្លួនបានកើនឡើងក្នុងល្បឿនយឺតបន្តិចនៅក្នុងត្រីមាសទីមួយ។
ការិយាល័យស្ថិតិទូទៅរបស់ប្រទេសវៀតណាមបាននិយាយកាលពីថ្ងៃអាទិត្យថា ផលិតផលក្នុងស្រុកសរុបនៅក្នុងប្រទេសវៀតណាមក្នុងអំឡុងត្រីមាសទីមួយបានកើនឡើង ៦.៩៣ភាគរយ ពីមួយឆ្នាំទៅមួយឆ្នាំ ធ្លាក់ចុះបន្តិចពីការកើនឡើង ៧.៥៥ភាគរយ នៅក្នុងត្រីមាសចុងក្រោយនៃឆ្នាំមុន។
បើតាម វេបសាយព័ត៌មានផ្លូវការរបស់រដ្ឋាភិបាលបាននិយាយថា ទោះបីជាមានបញ្ហាប្រឈមដែលបង្ហាញដោយការយកពន្ធរបស់សហរដ្ឋអាមេរិកក៏ដោយ ក៏គោលដៅនៃកំណើន យ៉ាងហោចណាស់ ៨ភាគរយ នៅឆ្នាំនេះនៅតែមិនផ្លាស់ប្តូរ។
រដ្ឋាភិបាលបាននិយាយថា ដើម្បីសម្រេចបាននូវគោលដៅរបស់ខ្លួន ក្រសួងហិរញ្ញវត្ថុរបស់វៀតណាមបានកំណត់ថា សេដ្ឋកិច្ចនឹងត្រូវការកំណើនរវាង ៨.២ភាគរយ និង ៨.៤ភាគរយនៅក្នុងត្រីមាសដែលនៅសល់។
កាលពីថ្ងៃសុក្រ លោក Trump និងលោក To Lam បានយល់ព្រមពិភាក្សាលើកិច្ចព្រមព្រៀងមួយដើម្បីដកយកពន្ធ។ មេដឹកនាំទាំងពីរបាននិយាយបន្ទាប់ពីការហៅទូរសព្ទ លោក Trump បានលើកឡើងថា "មានផលិតភាពខ្លាំងណាស់"។
នៅក្នុងសេចក្តីថ្លែងការណ៍កាលពីថ្ងៃច័ន្ទ លោក Chinh បាននិយាយថា វៀតណាមនឹងពិនិត្យមើលបញ្ហាដូចជាគោលនយោបាយរូបិយវត្ថុ អត្រាប្តូរប្រាក់ របាំងមិនមែនពន្ធ និងការធានានូវប្រភពដើមទំនិញត្រឹមត្រូវ។
ចាប់តាំងពីការហាមប្រាមអាវុធត្រូវបានដកចេញនៅឆ្នាំ២០១៦ ការនាំចេញការពារជាតិរបស់សហរដ្ឋអាមេរិកទៅកាន់ប្រទេសវៀតណាមត្រូវបានកំណត់យ៉ាងទូលំទូលាយចំពោះនាវាការពារឆ្នេរសមុទ្រ និងយន្តហោះហ្វឹកហាត់។ ប្រភពបាននិយាយថាកាលពីឆ្នាំមុនមានការពិភាក្សាលើការលក់យន្តហោះដឹកជញ្ជូនយោធា Lockheed Martin C-130 Hercules ទៅកាន់ទីក្រុងហាណូយ៕
ព្រភព៖ CAN
ប្រែសម្រួលដោយ៖ MD-Angkor
