ភ្នំពេញ៖ រយៈពេល ២ខែដើមឆ្នាំ២០២៤ ទំហំពាណិជ្ជកម្មកម្ពុជា-វៀតណាម សម្រេចបានជាង ១,៤១ពាន់លានដុល្លារ កើនជាង ៣០,៤% បើធៀបនឹងឆ្នាំ២០២៣។ បើតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា
ក្នុងចំណោមទឹកប្រាក់ខាងលើ គឺការនាំចេញរបស់កម្ពុជា មានចំនួន ៨០១,៦លានដុល្លារ កើន ៦៣,២% ពីចំនួន ៤៩១,១៨ លានដុល្លារ និងទំនិញវៀតណាមនាំមកកម្ពុជា ៦១២,៦៦លានដុល្លារ កើន ៣,២% ពីចំនួន ៥៩៣,៥៦លានដុល្លារ។ បើតាមន្នន័យដដែល។
ផលិតផលសំខាន់ ដែលកម្ពុជានាំទៅវៀតណាម រួមមាន៖ ស្រូវ កៅស៊ូ ដំឡូងមី ពោត ចេក ស្វាយចន្ទី ស្វាយ ថ្នាំជក់ និងធនធានធម្មជាតិ ចំណែក ទំនិញវៀតណាមនាំមកវិញ រួមមាន៖ សម្ភារសំណង់ គ្រឿងម៉ាស៊ីន ប្រេងឥន្ធនៈ ឧបករណ៍អេឡិចត្រូនិក អគ្គិសនី ជី គ្រឿងទេស និងបន្លែ ផ្លែឈើ ជាដើម។
ក្រៅពីទំនាក់ទំនងពាណិជ្ជកម្មទំនិញប្រទេសទាំងពីរ ក៏មានទំនាក់ទំនងល្អផ្នែកទេសចរណ៍ផងដែរ ក្នុងឆ្នាំ២០២៣ កម្ពុជាទទួលបានភ្ញៀវអន្តរជាតិសរុប ៥,៤៥លាននាក់ កើនឡើង ១៣៩,៥% ក្នុងនោះភ្ញៀវជនជាតិវៀតណាម មានចំនួន ១,០២ លាននាក់ កើនឡើង ១១៩,៨%។ បើតាមរបាយការណ៍ក្រសួងទេសចរណ៍។
គួររម្លឹកផងដែរថា ក្នុងឆ្នាំ២០២៣ ការនាំចេញ-នាំចូលទំនិញរវាងប្រទេសកម្ពុជាវៀតណាម មានទឹកប្រាក់សរុប ៦,៥៨ពាន់លានដុល្លារ កើនឡើង ៧,៣% បើធៀបឆ្នាំ២០២២ មានចំនួន ៦,១៣ពាន់លានដុល្លារ។ ចំនួននេះ កម្ពុជាមានចំនួន ២,៩៧ពាន់លានដុល្លារ កើនឡើង ៣៧,១% និងទំនិញវៀតណាមចំនួន ៣,៦១ពាន់លានដុល្លារធ្លាក់ចុះ ៨,៩%៕
ដោយ៖ មឿន ឌីណា (Moeun Dyna)
