![](https://s9.kh1.co/53/53077f5a057ee33ad5b1f7c99c37a3032ec539fe.jpg)
ភ្នំពេញ៖ ក្រុមហ៊ុន សហគ្រាសធុនតូច និងមធ្យមចំនួន២៦ មានចំណាប់អារម្មណ៍ចង់បណ្តាក់ទុនវិនិយោគលើវិស័យ សុខាភិបាលនៅម្ពុជា រួមមាន៖ ផលិតផលគ្រឿងសម្អាង និងការបណ្តុះបណ្តាលការថែរក្សាសម្ផស្ស ការថែទាំមនុស្សចាស់ និងរៀបចំមន្ទីរពេទ្យក្នុងគម្រោងអភិវឌ្ឍន៍JICA ព្រមទាំងការបង្កើតការិយាល័យសមាគមជប៉ុន-កម្ពុជា នៅកម្ពុជានាឆ្នាំខាងមុខ។
ចំណាប់អារម្មណ៍របស់ម្ចាស់ក្រុមហ៊ុនជប៉ុនទាំងនេះ ត្រូវបានលើកឡើងនាឱកាសពិភាក្សាការងាររវាង លោក កុយ វ៉ាន់នី រដ្ឋលេខាធិការក្រសួងសុខាភិបាល ជាមួយលោក កាហាស៊ី ហ្វូមីអាគី ប្រធានសមាគមនជប៉ុន-កម្ពុជា (JCA) និងគណៈប្រតិភូ ដែលមកពីក្រុមហ៊ុនសហគ្រាសចំនួន២៦ នៅថ្ងៃទី២១ ខែវិច្ឆិកា ឆ្នាំ២០២៣ នៅទីស្តីការក្រសួងសុខាភិបាល។
![](https://s9.kh1.co/18/187129b46be2f5a008f2353ce5a34e18949c43f4.jpg)
លោក ហ្វូមីអាគី ប្រធានសមាគមជប៉ុន-កម្ពុជា បានជម្រាបជូនពីគោលបំណងនៃកិច្ចជំនួបនាឱកាសនេះ គឺដឹកនាំក្រុម ការងារ សហគ្រាសធុនតូច និងមធ្យម ដែលមានចំណាប់អារម្មណ៍ចង់បណ្តាក់ ទុនវិនិយោគលើវិស័យសុខាភិបាល មកជម្រាបជូនក្រសួងសុខាភិបាល និងស្នើសុំការណែនាំ ក៏ដូចជាសុំការសហការគាំទ្ររបស់ក្រសួងសុខាភិបាលផងដែរ។
![](https://s9.kh1.co/57/57703f6a31ff4f6949db7481de28be088858530d.jpg)
លោក ប្រធាន JCA បានគូសបញ្ជាក់ថា ក្នុងនោះរួមមាន ៖ការវិនិយោគលើផលិតផលគ្រឿងសម្អាង និងការបណ្តុះ បណ្តាលការថែរក្សាសម្ផស្ស ការវិនិយោគបណ្តុះបណ្តាលការថែទាំមនុស្សចាស់ និងរៀបចំមន្ទីរពេទ្យដែលស្តិតក្នុងគម្រោង អភិវឌ្ឍន៍JICA ព្រមទាំងការបង្កើតការិយាល័យរបស់ សមាគមជប៉ុន-កម្ពុជា នៅកម្ពុជានាឆ្នាំខាងមុខ។
![](https://s9.kh1.co/75/757bd0fe4877ebe1d000ab81bb6157d63730750c.jpg)
លោក រដ្ឋលេខាធិការ បានស្វាគមន៍ និងថ្លែងអំណរគុណ លោក ហ្វូមីអាគី ដែលកន្លងមកតែងតែជួយគាំទ្រ ដល់ការ អភិវឌ្ឍវិស័យសុខាភិបាល តាមរយៈការជួយសម្របសម្រួលផ្តល់ហិរញ្ញប្បទានឥតសំណង ក្រោមក្របខណ្ឌជំនួយ សហប្រតិបត្តិការបច្ចេកទេស របស់រដ្ឋាភិបាលជប៉ុនដល់វិស័យសុខាភិបាលកម្ពុជា ទាំងក្នុងនាមជាឯកអគ្គរដ្ឋទូត នៃប្រទេសជប៉ុនប្រចាំកម្ពុជា និងក្នុងនាមជាប្រធាន JCA។
![](https://s9.kh1.co/72/726e90602ff948d04d5f7b77a4bef7d9bc0693e8.jpg)
លោក កុយ វ៉ាន់នី បានសំដែងសេចក្តីរីករាយ និងស្វាគមន៍សហគ្រាសធុនតូច និងមធ្យម នៃប្រទេសជប៉ុន ដែលមាន បំណងចង់មកបណ្តាក់ទុនវិនិយោគនៅកម្ពុជា ដែលជាការឆ្លើយតបទៅនិងយុទ្ធសាស្ត្រអាទិភាពសុខាភិបាល របស់រាជ រដ្ឋាភិបាលកម្ពុជា ដោយផ្តោតលើភាពជាដៃគូសាធារណៈ និងឯកជនផ្ទាល់ផងដែរ។
![](https://s9.kh1.co/57/5768d0a20c9f9e2a529168e51eb9ec220e4a8b76.jpg)
នាឱកាសនោះ លោក ក៏បានលើកទឹកចិត្ត JCA ជាពិសេសក្រុមហ៊ុនដែលមានបំណងមកវិនិយោគនៅកម្ពុជា ឱ្យពិភាក្សា ជាមួយមន្ត្រីជំនាញនៃផ្នែកនីមួយៗ ដើមី្បស្វែងយល់ពីយន្តការទទួលបានការសម្របសម្រួល និងផ្តល់ការណែនាំច្បាស់ លាស់ដល់ក្រុមហ៊ុន ព្រមទាំងបានអបអរសាទរ JCA ដែលត្រៀមនឹងបើកទីស្នាក់ការនៅរាជធានីភ្នំពេញ ឆាប់ៗខាងមុខនេះ។
![](https://s9.kh1.co/34/3469add6ec196d22ffd4f31f0df987226391fa2c.jpg)
ក្នុងជំនួបនោះ ប្រធានសមាគម បានសន្យាបន្តពង្រឹង និងពង្រីកកិច្ចសហប្រតិបត្តិការ គាំទ្រផែនការអាទិភាពរបស់ក្រសួង សុខាភិបាល ព្រមទាំងជួយពង្រីកវិសាលភាពនៃកិច្ចសហប្រតិបត្តិការទ្វេភាគីកម្ពុជា-ជប៉ុន លើវិស័យសុខាភិបាល ដោយខិតខំជាបន្ថែមទៀត ជំរុញឱ្យ សមាគមធុរកិច្ចជប៉ុន សហការនិងបង្កើនទំនាក់ទំនងការងារ ជាមួយភាគីពាក់ព័ន្ធ នៃប្រទេសទាំងពីរ៕
ដោយ៖ មឿន ឌីណា (Moeun Dyna)