ភ្នំពេញ៖ ក្រុមការងារបច្ចេកទេស នៃមន្ទីរសាធារណការ និងដឹកជញ្ជូន ខេត្តចំនួន១២ បានចុះអនុវត្តការងារ កាត់សម្អាតស្មៅ កូនរុក្ខជាតិតូចៗតាមដងផ្លូវ និងកាយដី ចាក់បេតុង ក្រាលកៅស៊ូម៉ិច ជួសជុលថែទាំលើផ្លូវជាតិ នៅតាមបណ្តាខេត្ត ដើម្បីធ្វើឱ្យប្រសើរឡើង។
តាមការអនុវត្តការងារខាងលើ របស់មន្រ្តីបច្ចេកទេសក្រោមឱវាទរបស់ មន្ទីរសាធារណការ និងដឹកជញ្ជូន ដើម្បីធ្វើឱ្យប្រសើរឡើង និងជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ការដឹកជញ្ជូនឆ្លងកាត់ ឱ្យកាន់តែមានភាពងាយស្រួលថែមទៀត ចំណេញពេលវេលា និងកាត់បន្ថយការគ្រោះថ្នាក់ចរាចរណ៍។
បើតាមក្រសួងសាធារណការ និងដឹកជញ្ជូនបានឱ្យដឹងថា គិតចាប់ពីថ្ងៃទី៣-១១ ខែកក្កដា ឆ្នាំ២០២៣ ខេត្តទាំង១២ ដែលមន្រ្តីបច្ចេកទេសក្រោមឱវាទមន្ទីរសាធារណការ និងដឹកជញ្ជូន បានជួសជុលថែទាំ សាងសង់ កាត់សម្អាតស្មៅ កៀរនិងកិនបង្ហាប់គ្រឹះ ដាក់លូ លុបសំបុកមាន់ អ៊ុតកៅស៊ូ (Reseal) រោយថ្មម៉ិចពង្រីកតួផ្លូវ អ៊ុតចិញ្ចើមផ្លូវ អ៊ុតគំនូស-បំពាក់ផ្លាកបង្គោលសញ្ញាចរាចរណ៍ ដាំបង្គោលបង្ហាញផ្លូវ កៀរសម្អាតចិញ្ចើមផ្លូវ ប៉ះចិញ្ចើមផ្លូវ នៅលើកំណាត់ផ្លូវជាច្រើនខ្សែ រួមមាន៖
កំណាត់ផ្លូវជាតិលេខ៧ លេខ៩ លេខ៥ លេខ៥៦D លេខ៥៩ លេខ៦ លេខ៥៧ លេខ៧១ លេខ៧២ លេខ២១ លេខ២១B លេខ៦២ លេខ៦៤ លេខ៦៧ លេខ៣៣A និងផ្លូវជាតិលេខ៩៥ ដែលស្ថិតនៅក្នុងខេត្តត្បូងឃ្មុំ រតនគិរី ព្រះវិហារ បន្ទាយមានជ័យ កំពង់ចាម កណ្ដាល កែប កំពង់ឆ្នាំង កណ្តាល បាត់ដំបង កំពង់ធំ និងខេត្តសៀមរាប។
ន្ទឹមនឹងផ្លូវថ្នល់ស្អាតល្អ ក្រសួង ក៏បានស្នើសូមបងប្អូនប្រជាពលរដ្ឋ កុំបំពានយកដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន ជៀសវាងការចាក់ដីខ្ពស់ជាងផ្លូវ និងកុំដឹកទំនិញលើសទម្ងន់ ដើម្បីរក្សាផ្លូវថ្នល់ឱ្យមានភាពល្អប្រសើរ និងអាចប្រើប្រាស់បានយូរអង្វែង។
ប្រសិនបើមានបញ្ហាផ្លូវថ្នល់ខូចខាតក្លាយជាជង្ហុកសំបុកមាន់ សូមបងប្អូនប្រជាពលរដ្ឋទាញយកកម្មវិធីថែទាំផ្លូវ (Road Care) និងរាយការណ៍មកក្រសួងសាធារណការ និងដឹកជញ្ជូន ដើម្បីអាចចាត់ក្រុមការងារចុះជួសជុល ថែទាំបានទាន់ពេលវេលា៕
ដោយ៖ មឿន ឌីណា (Moeun Dyna)
