ភ្នំពេញ៖ ពាណិជ្ជកម្មរវាងកម្ពុជា-កាណាដា មានទឹកប្រាក់សរុប ៣៣២,១៨លានដុល្លារ ធ្លាក់ចុះ ២៨,១% បើធៀបគ្រាដូចគ្នាឆ្នាំ២០២២ ដែលមានទឹកប្រាក់ ៤៦១,៨លានដុល្លារ។ បើតាមស្ថិតិ អគ្គនាយដ្ឋានគយ និងរដ្ឋាករកម្ពុជា បានបន្តថា កម្ពុជានាំទៅកាណាដា ៣២៤,០៩លានដុល្លារ ធ្លាក់ចុះ២៨,២% កាណាដានាំមកកម្ពុជា ៨,១លានដុល្លារ ធ្លាក់ចុះ២០%។
សម្រាប់ខែឧសភា ពាណិជ្ជកម្មប្រទេសទាំងពី មានទឹកប្រាក់សរុប ៨០,៩៦លានដុល្លារ ក្នុងនោះកម្ពុជានាំចេញ ៧៨,៦៦លានដុល្លារ និងនាំចូល២,៣ លានដុល្លារ បើធៀបខែមេសា ឆ្នាំ២០២៣ គឺកើនឡើង ៣៨,៣៨% ពីចំនួន ៥៨,៥លានដុល្លារ។ បើតាមស្ថិតិដដែ។
ការធ្លាក់ចុះទំហំពាណិជ្ជកម្មជាមួយកាណាដា គឺដោយសារវិបត្តិសង្គ្រាមរវាងប្រទេសអ៊ុយក្រែន-រុស្ស៊ី។ បើតាមការលើកឡើងរបស់ លោក លឹម ហេង អនុប្រធានសភាពាណិជ្ជកម្មកម្ពុជា បានបន្តថា នៅពេលជម្លោះប្រដាប់អាវុធនេះបញ្ចប់ សម្ទុះនៃការធ្វើពាណិជ្ជកម្មអន្តរជាតិប្រាកដជានឹងកើនឡើង ហើយការនាំចេញរបស់កម្ពុជាទៅទីផ្សារគោលដៅសំខាន់ៗ រួមទាំងប្រទេសកាណាដា នឹងមានសម្ទុះឡើងវិញ។
ពាណិជ្ជកម្មអន្តរជាតិតែងផ្សារភ្ជាប់ព្រឹត្តិការណ៍អន្តរជាតិ គឺបើមានបញ្ហាអ្វីមួយកើតឡើង ការធ្វើពាណិជ្ជកម្មក៏ជួបបញ្ហាដែរ។ បើតាមការបញ្ជាក់របស់ លោក លឹម ហេង បានបន្តថា ពាណិជ្ជកម្មអន្តរជាតិកម្ពុជា-កាណាដា នឹងមានសញ្ញាវិជ្ជមានឡើងវិញជាបន្តបន្ទាប់ចាប់ពីត្រីមាសទី២។
បើតាមភ្នំពេញប៉ុស្តិ៍បានស្រង់សំដី លោក លឹម ហេង ឱ្យដឹងថា ទំនិញសក្តានុពលដែលកម្ពុជានាំចេញទៅប្រទេសកាណាដា មានដូចជា ផលិតផលសម្លៀកបំពាក់ ផលិតផលធ្វើដំណើរ ស្បែកជើង គ្រឿងបង្គុំអេឡិចត្រូនិកអគ្គិសនី កង់ ជាដើម។ ចំណែកទំនិញកាណាដា នាំមកកម្ពុជា រួមមានរថយន្ត គ្រឿងអេឡិចត្រូនិក។
សូមរម្លឹកថា ក្នុងឆ្នាំ២០២២ ការធ្វើពាណិជ្ជកម្មទ្វេភាគីកម្ពុជា-កាណាដា មានតម្លៃសរុប ១ ១៥៤,៤៧លានដុល្លារ កើនឡើង ១៦,១% ធៀបឆ្នាំ២០២១ ដែលមានចំនួន ៩៩៤,៧២លានដុល្លារ ក្នុងនោះកម្ពុជានាំទៅកាណាដា ១ ១២០,៥៩លានដុល្លារ កើន ១៧,៤% ចំណែកទំនិញកាណាដា នាំមកកម្ពុជាមានចំនួន ៣៣,៨៨លានដុល្លារ ធ្លាក់ចុះ ១៥,១%៕
ដោយ៖ មឿន ឌីណា (Moeun Dyna)
