កោះកុង៖ គម្រោងសាងសង់លើកកម្រិតគុណភាពផ្លូវជាតិលេខ៤៨ ប្រវែង ១៤៨គីឡូម៉ែត្រ ពីចំណុចប្រសព្វផ្លូវជាតិលេខ ៤ អូរជ្រៅ-ក្រុងខេមរភូមិន្ទ ខេត្តកោះកុង ក្រោមជំនួយរបស់កូរ៉េខាងត្បូង ៧៨លានដុល្លារ ដែលបានបើកការដ្ឋានកាលពីថ្ងៃទី៣ ខែមករា ឆ្នាំ២០២២ គិតមកត្រឹមខែមេសា ឆ្នាំ២០២៣ វឌ្ឍនភាពសម្រេចបាន ២៥.៥៧%។ បើតាមការចុះត្រួតពិនិត្យរបស់អភិបាលខេត្តកោះកុង លោក ស្រី មិថុនា ភូថង កាលពីថ្ងៃទី១៤ ខែឧសភា ឆ្នាំ២០២៣។
លោកស្រី មិថុនា ភូថង ដែលបានដឹកនាំមន្រ្តីក្រោមឱវាទ ចុះត្រួតពិនិត្យការសាងសង់ផ្លូវជាតិលេខ៤៨ មានប្រវែង ១៤៨គីឡូម៉ែត្រ ចំនួន៤ ចំណុច៖ -ចំណុចទី១ ចាប់ពីឃុំបឹងព្រាវ ស្រុកស្រែអំបិល ជាគីឡូម៉ែត្រ០ ត្រួតពិនិត្យផ្លូវដើសាធារណៈ, -ចំណុចទី២ គីឡូម៉ែត្រ៦០ ត្រួតពិនិត្យតំបន់ទំនប់ទឹកខ្ពស់, -ចំណុចទី៣ គីឡូម៉ែត្រ ១២០ ត្រួតពិនិត្យតំបន់ត្រូវកាយយកថ្មចេញ មកបំពេញទីតាំងដែលទាប និង-ចំណុចទី៤ គីឡូម៉ែត្រ១៤២ ត្រួតពិនិត្យតំបន់ដែលមាន ៤គន្លងសម្រាប់យាន្តយន្ត។
លោកស្រី អ៊ី នារីនេត អភិបាលរងខេត្តកោះកុង ដែលបានអមដំណើរ លោកស្រី មិថុនា ភូថង បានមានប្រសាសន៍ថា តាមការធ្វើបទបង្ហាញរបស់ក្រុមវិស្វករគម្រោងបានឱ្យដឹងថា ការសាងសង់ផ្លូវជាតិលេខ៤៨ មានប្រវែង ១៤៨គីឡូម៉ែត្រ ចាប់ពីស្រុកស្រែអំបិលដល់ក្រុងខេមរភូមិន្ទខេត្តកោះកុង វឌ្ឍនភាពការងារសម្រេចបាន ២៥% តែប៉ុណ្ណោះ ពីព្រោះផ្លូវនេះមានការប្រឈមលំបាកមានចំណោតខ្ពស់ ទាប មានភាពបត់មែនច្រើនកន្លែងពីព្រោះការសាងសង់វិស្វករត្រូវការគុណភាពខ្ពស់ ដើម្បីធ្វើឱ្យផ្លូវមានសោមភ័ណ្ឌស្អាតងាយស្រួលធ្វើចរាចណ៍ វិស្វករត្រូវរៀបចំរចនាបទឱ្យបានស្អាត និងមានគុណភាពខ្ពស់។
លោកស្រី អ៊ី នារីនេត បានមាប្រសាសន៍បន្តថា តាមបទបង្ហាញដដែល កំណាត់ផ្លូវជាតិលេខ៤៨ មានស្ថានភាពបត់បែន និងឡើងចុះចំណាតច្រើន ដោយទីតាំងខ្លះត្រូវប្រើពេលវេលាជីកកាយជ្រលងថ្មធំៗ ទីតាំងខ្លះតម្រូវឱ្យមានការវាងចំណាតកោងខ្លាំង និងជាពិសេសរដូវវស្សាពិបាកសាងសង់ ទើបធ្វើឱ្យដំណើរការហាក់យឺតយ៉ាវបន្តិច។
ក្រុមជំនាញវិស្វករ បាននិយាយប្រាប់បញ្ហាប្រឈម ២កន្លែងធំៗ គឺចំណោទផ្លូវបទអន្ទុងអាំងស្ថិយនៅស្រុកបូទុមសាគរ និងផ្លូវចំណោតតាតៃស្ថិតស្រុកកោះកុង ចំណុចទាំង២កន្លែងនេះ ដែលជាបញ្ហាប្រឈមធំជាងគេ តែទោះបីពិបាកយ៉ាងណាក្រុមហ៊ុន គម្រោងសាងសង់នៅតែខិតខំអនុវត្ដគម្រោងសាងសង់បន្ថែមហើយ ឱ្យមានគុណភាពខ្ពស់។ បើតាមការបន្តរបស់ អភិបាលរងខេត្តដដែល។
កន្លងទៅ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់អះអាងថា ផ្លូវជាតិលេខ៤៨នេះ នឹងជួយជំរុញ សក្តានុពលតំបន់ទេសចរណ៍នៅក្នុងខេត្តកោះកុងបន្ថែមទៀត ក៏ដូចជាតំបន់ទេសចរណ៍គីរីសាគរ ដែលជាគោលដៅទេសចរណ៍ដ៏សំខាន់មួយ នៅភាគនិរតីនៃកម្ពុជា។
ផ្លូវជាតិលេខ៤៨នេះ គឺជាហេដ្ឋារចនាសម្ព័ន្ធដ៏សំខាន់មួយ របស់ប៉ូលសេដ្ឋកិច្ចទីពីរ ដែលរួមមាន ខេត្តព្រះសីហនុ ខេត្តកែប ខេត្តកំពតនិងខេត្តកោះកុង ដែលជាតំបន់ ឧស្សាហកម្ម ទេសចរណ៍ធម្មជាតិ និងតំបន់មាត់សមុទ្រ។ តាមរយៈផ្លូវនេះ ដ៏មានសក្ដានុពល ក៏នឹងជួយជំរុញដល់ការអភិវឌ្ឍសេដ្ឋកិច្ចក្នុងតំបន់ជាប់ព្រំប្រទល់ជាមួយប្រទេសជិតខាង ដោយរំពឹងបាននូវការទាក់ទាញវិនិយោគិន និងជំរុញការនាំចេញនៅតំបន់សេដ្ឋកិច្ចពិសេសចំនួន៤ ស្ថិតនៅតាមបណ្ដោយផ្លូវនេះ៕
ដោយ៖ មឿន ឌីណា (Moeun Dyna)
