ភ្នំពេញ៖ ត្រីមាសទី១ ចាប់ពីខែមករា-មីនា ឆ្នាំ២០២៣ ការផ្លាស់ប្តូរពាណិជ្ជកម្មកម្ពុជា និងកាណាដា មានចំនួន ១៩២,៧២លានដុល្លារ ថយចុះ ២១,៦% បើធៀបគ្រាដូចគ្នាឆ្នាំ២០២២ ដែលមានចំនួន ២៤៥,៨៥លានដុល្លារ ក្នុងនោះការនាំទំនិញពីកម្ពុជាទៅកាណាដា ១៩០,០៧លានដុល្លារ ធ្លាក់ ២១,៣% និងកាណាដានាំមកកម្ពុជាមានចំនួន ២,៦៥ លានដុល្លារ ធ្លាក់ចុះ ៤០,២%។ បើតាមស្ថិតិជញ្ជីងពាណិជ្ជកម្មទំនិញប្រចាំត្រីមាសទី១ ឆ្នាំ២០២៣ របស់អគ្គនាយកដ្ឋានគយ និងរដ្ឋាករកម្ពុជា។
ទំហំទឹកប្រាក់នៃការធ្វើពាណិជ្ជកម្មកម្ពុជា-កាណាដា ក្នុងត្រីមាសទី១ ឆ្នាំ២០២៣ ស្ថិតនៅលេខរៀងទី១០ ស្មើនឹង ១,៧១ % ក្នុងចំណោមទំហំពាណិជ្ជកម្មអន្តរជាតិរបស់កម្ពុជា ១១ ២៥២,១៤លានដុល្លារ (ធ្លាក់ចុះ ១៤,៥)។ បើតាមការបញ្ជាក់នៅក្នុងជញ្ជីងស្ថិតខាងលើ។
ការធ្លាក់ចុះទំហំពាណិជ្ជកម្មកម្ពុជា និងកាណាដា ក្នុងត្រីមាសទី១ គឺមកពីតម្រូវការទំនិញប្រើប្រាស់ធ្លាក់ចុះ។ បើតាមការលើកឡើងរបស់ លោក ហុង វណ្ណៈ អ្នកសេដ្ឋកិច្ចនៃរាជបណ្ឌិត្យសភាកម្ពុជា បានបន្តថា ការធ្លាក់ចុះអំឡុងពេលនេះគឺមានលក្ខណៈសកល។
លោក បានបន្តថា ការធ្លាក់ចុះនេះគឺមិនមែនកើតមានរវាងកម្ពុជា និងកាណាដាឡើយ ពោលគឺការនាំចេញ នាំចូលទំនិញបានធ្លាក់ចុះនៅស្ទើរគ្រប់គោលដៅ។ ការធ្លាក់ចុះទំហំពាណិជ្ជកម្មក្នុងត្រីមាសទី១ ក៏ដោយសារតែឥទ្ធិពលដែលអូសបន្លាយពីចុងឆ្នាំ២០២២ ផងដែរ។
បើតាមភ្នំពេញប៉ុស្តិ៍ បានស្រង់សំដី លោក លឹម ហេង អនុប្រធានសភាពាណិជ្ជកម្មកម្ពុជា ថា ពាណិជ្ជកម្មអន្តរជាតិតែងផ្សារភ្ជាប់នឹងព្រឹត្តិការណ៍ធំៗ គឺបើមានបញ្ហាណាមួយកើតឡើង កាធ្វើពាណិជ្ជកម្មក៏ជួបបញ្ហាដែរ។ ការធ្លាក់ចុះទំហំពាណិជ្ជកម្មជាមួយកាណាដា ត្រីមាសទី១ គឺដោយសារសេដ្ឋកិច្ចពិភពលោកជួបបញ្ហា។
លោក លឹម ហេង បានឱ្យដឹងថា ទំនិញសក្តានុពលដែលកម្ពុជានាំទៅប្រទេសកាណាដា មានដូចជា៖ សម្លៀកបំពាក់ ផលិតផលធ្វើដំណើរ ស្បែកជើង គ្រឿងបង្គុំអេឡិចត្រូនិកអគ្គិសនី និងកង់ ចំណែកទំនិញកាណាដា នាំចូលមកកម្ពុជា ភាគច្រើនជាគ្រឿងអេឡិចត្រូនិក។
សូមរម្លឹកថា ឆ្នាំ២០២២ ពាណិជ្ជកម្មទ្វេភាគីកម្ពុជា-កាណាដា មានតម្លៃសរុប ១ ១៥៤,៤៧លានដុល្លារ កើនឡើង ១៦,១% ធៀបឆ្នាំ២០២១ ដែលមានចំនួន ៩៩៤,៧២លានដុល្លារ ក្នុងនោះ កម្ពុជានាំចេញទំនិញទៅកាណាដា ១ ១២០,៥៩ លានដុល្លារ កើនឡើង ១៧,៤% និងទំនិញកាណាដានាំមកកម្ពុជាវិញមានទឹកប្រាក់ ៣៣,៨៨លានដុល្លារ ធ្លាក់ចុះ ១៥,១%៕
ដោយ៖ មឿន ឌីណា (Moeun Dyna)