ភ្នំពេញ៖ វឌ្ឍនភាព គម្រោងស្ថបនាផ្លូវថ្មីមួយខ្សែប្រវែង ៦១គីឡូម៉ែត្រ ដែលតភ្ជាប់ពីផ្លូវជាតិលេខ ទៅឧទ្យានជាតិព្រះមុនីវង្សភ្នំបូកគោ មកដល់ពេលនេះបានបញ្ចប់ការឈូសឆាយទាំងស្រុង។ បើតាមការចុះពិត្យរបស់ អ្នកឧកញ៉ា សុខ គង់ កាលពីថ្ងៃទី១ ខែមេសា ឆ្នាំ២០២៣។
ការអភិវឌ្ឍផ្លូវថ្មីមួយខ្សែនេះ មានការចូលរួមពី អ្នកឧកញ៉ា ម៉ុង រិទ្ធី ជាអ្នកផ្ដល់ដីសម្បទានដូងប្រេង រីឯអ្នកឧកញ៉ា សុខ គង់ ជាអ្នកចំណាយថ្លៃការសាងសង់ ក្រោមកិច្ចសម្របសម្រួលរបស់ លោក ជា សុផារ៉ា រដ្ឋមន្រ្តីក្រសួងរៀបចំដែនដី និងនគរូបនីយកម្ម និងអនុម័តដោយសម្តេចតេជោ ហ៊ុន សែន នាយករដ្ឋមន្ដ្រី កាលពីថ្ងៃទី១៨ ខែធ្នូ ឆ្នាំ២០២១។
ក្រុមហ៊ុនសុខា អូតែល ទទួលបានសិទ្ធិសម្បទានវិនិយោគអភិវឌ្ឍនៅឧទ្យានជាតិព្រះមុនីវង្ស “បូកគោ”។ ក្រុមហ៊ុន បានបោះទុនរាប់រយលានដុល្លារ ដើម្បីវិនិយោគអភិវឌ្ឍកែច្នៃតំបន់នេះឱ្យមានការរីកចម្រើនគ្រប់ផ្នែក រួមមាន៖ ទេសចរណ៍ វប្បធម៌ សាសនា និងវិស័យអចលទ្រព្យ។
ការអនុវត្តគម្រោងសាងសង់ហេដ្ឋារចនាសម្ព័ន្ធផ្លូវថ្មីមួយខ្សែនេះ ក៏អនុវត្តតាមការណែនាំរបស់ប្រមុខរដ្ឋាភិបាលសម្តេចតេជោ ហ៊ុន សែន ដើម្បីជំរុញការអភិវឌ្ឍលើកកម្ពស់សេដ្ឋកិច្ច និងទាក់ទាញផ្នែកទេសចរណ៍៕
ដោយ៖ មឿន ឌីណា (Moeun Dyna)
