ពោធិ៍សាត់៖ គម្រោងវារីអគ្គិសនីស្ទឹងពោធិ៍សាត់១ ដែលមានអានុភាព ៨០មេហ្គាវ៉ាត់ ស្ថិតនៅភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ គ្រោងនឹងដាក់ឱ្យដំណើរការនៅក្នុងឆ្នាំ២០២៦ បច្ចុប្បន្នក្រុមហ៊ុនកូរ៉េ SPHP (Cambodia) Co Ltd កំពុងដំណើរការសាងសង់ទំនប់ ក្នុងទឹកប្រាក់វិនិយោគប្រមាណ ២៣១លានដុល្លារ។ បើតាមការថ្លែងរបស់ លោក ខូយ រីដា អភិបាលខេត្តពោធិ៍សាត់។
នៅក្នុងសន្និសីទសារព័ត៌មានស្តីពី «ភាពជោគជ័យរយៈពេល ៥ឆ្នាំ របស់រដ្ឋបាលខេត្តពោធិ៍សាត់» នៅទីស្តីការគណៈរដ្ឋមន្ត្រី នៅថ្ងៃទី៧ ខែមីនា ឆ្នាំ២០២៣ លោក ខូយ រីដា បានថ្លែងបន្តថា គម្រោងវារីអគ្គិសនីស្ទឹងពោធិ៍សាត់១ គឺជាគម្រោងវារីអគ្គិសនីទី២ របស់ខេត្តពោធិ៍សាត់ បន្ទាប់ពីគម្រោងវារីអគ្គិសនីទី១ គឺវារីអគ្គិសនីស្ទឹងអាតៃ ស្ថិតនៅភូមិឆាយលូក ឃុំអូរសោម ស្រុកវាលវែង មានអានុភាព ១២០មេហ្គាវ៉ាត់ កំពុងដំណើរការ។
វារីអគ្គិសនីនេះ គឺមានថាមពលជារៀងរាល់ថ្ងៃ អត់មានរដូវវស្សានិងរដូវប្រាំងទេ គឺមានជាប់រហូត ដោយសារតែទឹកស្ទឹងពោធិ៍សាត់មានទឹកគ្រប់រដូវ។ បើតាមការបញ្ជាក់របស់ អភិបាលខេត្តពោធិ៍សាត់។
ក្រសួងរ៉ែ និងថាមពល បានផ្ដល់អាជ្ញាប័ណ្ណឱ្យក្រុមហ៊ុន SPHP (Cambodia) Co Ltd សិក្សាលទ្ធភាពនៅលើទីតាំងនេះ ចាប់តាំងពីឆ្នាំ២០១២។ បើតាមប្រសាសន៍ លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល ដែលបានប្រាប់ភ្នំពេញប៉ុស្តិ៍ បានបន្តថា ក្រុមហ៊ុននេះ បានចុះកិច្ចព្រមព្រៀងជាមួយអគ្គិសនីកម្ពុជា គឺលក់ថាមពលទាំងអស់ដែលខ្លួនផលិតបានដើម្បីភ្ជាប់ទៅបណ្តាញជាតិជាមួយនឹងតម្លៃ ០,៧ សេនដុល្លារ ក្នុង១គីឡូវ៉ាត់ម៉ោង។
បើតាម លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងកាលពីឆ្នាំ២០២២កន្លងទៅថា បច្ចុប្បន្នអគ្គិសនីកើនឡើងដល់ ៩៨,៥% នៃភូមិជាង ១៤០០០របស់ប្រទេសកម្ពុជា នៅសល់តែ ១ភាគតូចនៃគ្រួសារដែលដាច់ដោយឡែក ដែលនៅសេសសល់ក្រៅបណ្តាញជាតិ។
លោក បានបន្តឱ្យដឹងថា ថាមពលសរុបដែលផលិតក្នុងស្រុក ឬនាំចូលពីប្រទេសជិតខាងមានជាង ៤០០០មេហ្គាវ៉ាត់ ខណៈ តម្រូវការជាក់ស្តែងមានតែជាង ២០០០មេហ្គាវ៉ាត់ ប៉ុណ្ណោះ៕
ដោយ៖ មឿន ឌីណា (Moeun Dyna)
