ភ្នំពេញ៖ នៅខែមករា ឆ្នាំ២០២៣ កម្ពុជាទទួលបានភ្ញៀវទេសចរអន្តជាតិប្រមាណ ៤០ម៉ឺននាក់ កើនឡើង៧៩៤% បើប្រៀបធៀបនឹងឆ្នាំ២០២២ និងថយចុះ៣៨% បើប្រៀបធៀបនៅឆ្នាំ២០១៩។ បើតាមការថ្លែងឱ្យដឹងពីលោក ថោង ខុន រដ្ឋមន្រីក្រសួងទេសចរណ៍ បានបញ្ជាក់ថា ប្រភពទីផ្សារសំខាន់ៗមាន៖ ប្រទេសថៃ វៀតណាម ចិន កូរ៉េ អាមេរិក។
ក្នុងចំណោមភ្ញៀវទេសចរអន្តរជាតិទាំង ៤០ម៉ឺននាក់ គឺមានមកតាមផ្លូវអាកាសប្រមាណ១៤០,០០០នាក់ កើនឡើង៤៥១%, មកតាមផ្លូវគោកប្រមាណ ២៥៥,០០០ម៉ឺននាក់ កើនឡើង ១,២៨៤% និងមកតាមផ្លូវទឹកប្រមាណ ៥,០០០នាក់ កើនឡើង ១,២៨៣% ធៀបនឹងខែមករា ឆ្នាំ២០២២។ បើតាមការថ្លែងបន្តរបស់ លោក ថោងខុន។
លោក បន្តថា ក្នុងចំណោមទេសចរអន្តរជាតិខាងលើ ក៏មានទេសចរចិនប្រមាណ ២៥,០០០នាក់ដែរ ដែលមានការកើនឡើង ៩០១% បើធៀបនឹងឆ្នាំ២០២២ ប៉ុន្តែ នៅថយចុះ៨៦.៣% ធៀបនឹងឆ្នាំ២០១៩។
គិតជាមធ្យម មានទេសចរអន្តរជាតិចូលមកកម្ពុជា ទាំងតាមផ្លូវ ផ្លូវអាកាស ផ្លូវគោក និងផ្លូវទឹកប្រមាណ ១២,០០០នាក់ ទៅ ១៣,០០០នាក់ ក្នុងមួយថ្ងៃ។ បើតាមការបន្តរបស់ លោក ថោង ខុន បានបន្ថែមថា ក្នុងខែមករា ឆ្នាំ២០២៣នេះ ជើងហោះហើរដែលចូលមកដល់កម្ពុជាមានចំនួនសរុប ១,៦៤៨ជើង ក្នុងនោះអាកាសយានដ្ឋានអន្តរជាតិភ្នំពេញទទួលបាន ១,១៧៨ជើង។
ចំពោះជើងហោះហើរពីប្រទេសចិន ក្រោយថ្ងៃបើកឱ្យទេសចរធ្វើដំណើរឡើងវិញចាប់ពីថ្ងៃទី៨ ខែមករា ឆ្នាំ២០២២ ទើបមានជើងហោះហើរត្រង់ឡើងវិញ ប៉េកាំង-ភ្នំពេញ ចាប់ផ្តើមនៅព្រឹកថ្ងៃទី៧ ខែកុម្ភៈនេះជាលើកដំបូង ដែលប្រតិបត្តិការហោះហើរដោយក្រុមហ៊ុន Air China។ បើតាមការថ្លែងរបស់ រដ្ឋមន្រ្តីក្រសួងទេសចរណ៍ បានបន្ថែមទៀតថា នៅថ្ងៃទី១៦ ខែកុម្ភៈនេះ ក៏នឹងមានជើងហោះលើកដំបូងពីគួនមីងមកសៀមរាប និងពីសៀងហៃមកសៀមរាប ដែលនឹងប្រតិបត្តិការដោយក្រុមហ៊ុន China Eastern (Charter Flights) ផងដែរ៕
ដោយ៖ មឿន ឌីណា (Moeun Dyna)
