ភ្នំពេញ៖ កម្ពុជា-ចិន បានរៀបចំផែនការទាក់ទាញទេសចរចិនឱ្យបាន ១លាននាក់ ក្នុងឆ្នាំ២០២៣ ដោយយកខួបលើកទី៦៥នៃចំណងទំនាក់ទំនងការទូតកម្ពុជា-ចិន រៀបចំព្រឹត្តិការណ៍ទេសចរណ៍មកសម្ដែងរួមគ្នារួមមាន៖ វប្បធម៌ និងកីឡាដូចជា ព្រឹត្តិការណ៍ម៉ារ៉ាតុង វាយកូនហ្គោល ជាពិសេសការសម្តែងក្បាច់គុណសៅលិញរបស់សាកលវិទ្យាល័យសៅលិញ រួមជាមួយ ក្បាច់គុនល្បុក្កតោរបស់កម្ពុជា។
លោក ថោង ខុន រដ្ឋមន្ត្រីក្រសួងទេសចរណ៍ និងលោក Du TianQiao នាយកប្រតិបត្តិសមាគមន៍សហប្រតិបត្តិការធុរៈកិច្ច និងសេដ្ឋកិច្ចតំបន់ និងពាណិជ្ជកម្មអន្តរជាតិចិន បានជួបពិភាក្សាគ្នាផ្លាស់ប្តូរយោបល់សំដៅជំរុញលំហូរទេសចរចិន-កម្ពុជា នៅព្រឹកថ្ងៃទី១ ខែកុម្ភៈ ឆ្នាំ២០២៣។
នៅក្នុងជំនួបនោះ ដើម្បីត្រៀមអបអរសាទរខួបលើកទី៦៥នៃចំណងទំនាក់ទំនងការទូតកម្ពុជា-ចិន ពិសេសដើម្បីជំរុញ និងទាក់ទាញទេសចរចិនឱ្យបាន ១លាននាក់ នៅឆ្នាំ២០២៣នេះ តាមការគ្រោងទុក ដោយសហការគ្នាត្រៀមរួមមាន៖
- រៀបចំព្រឹត្តិការណ៍ទេសចរណ៍ វប្បធម៌ និងកីឡាដូចជា ព្រឹត្តិការណ៍ម៉ារ៉ាតុង វាយកូនហ្គោល ជាពិសេសការសម្តែងក្បាច់គុណសៅលិញរបស់សាកលវិទ្យាល័យសៅលិញ រួមជាមួយ ក្បាច់គុនល្បុក្កតោរបស់កម្ពុជា (ដែលត្រូវបានដាក់បញ្ចូលក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ កាលពីថ្ងៃទី២៩ ខែវិច្ឆិកា ឆ្នាំ២០២២) នៅមុនព្រឹត្តិការណ៍ SEA Games លើកទី៣២ នៅរាជធានីភ្នំពេញផងដែរ។
- វេទិកាធុរៈកិច្ចនិងវិនិយោគទេសចរណ៍កម្ពុជា-ចិន។
- រៀបចំព្រឹត្តិការណ៍តន្ត្រីកម្ពុជា-ចិន ដែលមានតារាល្បីៗរបស់ចិន និងកម្ពុជាចូលរួម ដែលអាចទាក់ទាញទេសចរចិនមកទស្សនា។
បើតាមជំនួបនោះ លោក ថោង ខុន រដ្ឋមន្ត្រី បានស្នើឱ្យសមាគមនេះរៀបចំគំរោងច្បាស់លាស់ និងផែនការលម្អិត ដើម្បីអាចឱ្យភាគីក្រសួងទេសចរណ៍កម្ពុជាពិនិត្យ និងឱ្យយោបល់ ព្រមទាំងបង្កើតក្រុមការងារក្នុងការរៀបចំព្រឹត្តិការណ៍ទាំងនេះ៕
ដោយ៖ មឿន ឌីណា (Moeun Dyna)
