ភ្នំពេញ៖ រយៈពេល៨ខែ ចាប់ពីខែមករា ដល់ខែសីហា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន ១១២គម្រោង មានទុនសរុបជាង ៣,០៤៣លានដុល្លារ។ បើតាមរបាយការណ៍របស់ CDC បានបញ្ជាក់ថា ក្នុងគម្រោងទាំងនោះ បានផ្ដល់ការងារដល់ប្រជាពលរដ្ឋប្រមាណ ៧៥,៣៤៣កន្លែង។
នៅក្នុងគម្រោងទាំង ១១២គម្រោង គឺខែមករា មាន ២៤ក្រុមហ៊ុន ដែលបានអនុម័តទុនវិនិយោគសរុបប្រមាណ ២,២៧៧លានដុល្លារ។ បើតាមរបាយការណ៍ CDC បានបន្តថា នៅខែឧសភាវិញ មាន ២០ក្រុមហ៊ុន មានទុនវិនិយោគចំនួន ១៩៨.១លានដុល្លារ។ សម្រាប់ខែសីហា មាន ១៧ក្រុមហ៊ុន មានទុនវិនិយោគចំនួន ២០៣.១លានដុល្លារ។
បើតាមរបាយការណ៍ដដែលបានបន្តថា ក្នុងចំណោម ១១២គម្រោង ក្នុងនោះមានគម្រោងបោះទុនវិនិយោគធំៗចំនួន៤ ដូចជា៖
១.អាជីវកម្មសណ្ឋាគារថ្នាក់ផ្កាយ៥ ចំនួន ៥២៨បន្ទប់ ស្ថិតនៅមហាវិថីព្រះមុនីវង្ស សង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ មានទុនវិនិយោគ ១២៩លានដុល្លារ។
២.គម្រោងបង្កើតរោងចក្រផលិតសំបកកង់យានយន្តគ្រប់ប្រភេទ ស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ មានទុនវិនិយោគប្រមាណ២៩៧លានដុល្លារ។
៣.គម្រោងវិនិយោគអភិវឌ្ឍន៍វារីអគ្គិសនី ស្ទឹងតាតៃលើ អានុភាព១៥០MW ស្ថិតនៅស្រុកថ្មបាំង និងស្រុកកោះកុង ខេត្តកោះកុង មានទុនវិនិយោគប្រមាណ ៣៨៩លានដុល្លារ។
៤.គម្រោងវិនិយោគអភិវឌ្ឍន៍មណ្ឌលភស្តុភារកម្ម និងកំពង់ផែពហុបំណង ស្ថិតនៅភូមិចង្ហោន សង្កាត់ព្រែកត្នោត ក្រុងបូកគោ ខេត្តកំពត មានទុនវិនិយោគចំនួន ១,៣០០លានដុល្លារ៕
ដោយ៖ មឿន ឌីណា (Moeun Dyna)
