ភ្នំពេញ៖ ស្រុកល្វាឯម ដែលស្ថិតក្នុងទឹកដីខេត្តកណ្ដាល អាចក្លាយទៅជាទីក្រុងរណបនៅពេលអនាគត នឹងដើរតួនាទីសំខាន់ជាទីក្រុងទំនើប ខណៈរាជធានីភ្នំពេញនឹងប្រែក្លាយជាទីក្រុងបុរាណ ដោយផ្អែកតាមរចនាសម្ព័ន្ធសំណង់និងផ្លូវថ្នល់បែបបុរាណបន្សល់ទុកច្រើន។ បើតាមការលើកឡើងរបស់ លោក គី សេរីវឌ្ឍ អ្នកសេដ្ឋកិច្ចមកពីរាជ្យបណ្ឌិតសភាកម្ពុជា។
ស្រុកឯល្វាឯម នឹងក្លាយជាក្រុងទំនើបសម័យថ្មីដែលបង្ហាញពីការលូតលាស់របស់ប្រទេសកម្ពុជា ហើយម្យ៉ាងល្វាឯមនៅមិនឆ្ងាយប៉ុន្មានពីទីរាជធានីភ្នំពេញ ដោយមានស្ពានជាតំណភ្ជាប់ដែលនឹងធ្វើឱ្យមានការលូតលាស់ផ្នែកអចលនទ្រព្យទៅជាមួយ។ បើតាមការលើកឡើងបន្តរបស់ លោក គី សេរីវឌ្ឍ។
ការប្រកាសរបស់ប្រមុខរដ្ឋាភិបាល ក្នុងការបង្កើតក្រុងល្វាឯមជាសញ្ញាវិជ្ជមានមួយសម្រាប់អ្នកវិនិយោគប្រមើលមើលពីឱកាសក្នុងការរកស៊ីជួញដូរនៅម្ដុំនោះ។ បើតាមការលើកឡើងរបស់ លោក ច្រឹក សុខនីម ប្រធានសមាគមអ្នកវាយតម្លៃអចលនទ្រព្យនៅកម្ពុជា ដែលភ្នំពេញប៉ុស្ដិ៍បានស្រង់សំដី។
ភ្នំពេញប៉ុស្ដិ៍បានស្រង់សំដី លោក ច្រឹក សុខនីម លើកឡើងបន្តថា សម្រាប់ការអនុវត្តជាក់ស្ដែងទាល់តែយើងដឹងពីពេលវេលាជាក់លាក់ ថាតើគម្រោងទាំងអស់ហ្នឹងចាប់ផ្ដើមអនុវត្តនៅពេលណា? តែទោះជាយ៉ាងណាក៏ដោយ នៅតែជាសញ្ញាមួយក្នុងការបង្ហាញទំនុកចិត្តរបស់វិនិយោគិនថាយើងនឹងមានគម្រោងហ្នឹងណាមួយក្នុងក្រុងល្វាឯមពេលអនាគត។
គួរបញ្ជាក់ថា ស្រុកល្វាឯមស្ថិតនៅខេត្តកណ្ដាលមាន ១៥ឃុំ រួមមាន៖ ឃុំអរិយក្សត្រ, ឃុំបារុង, ឃុំបឹងគ្រំ, ឃុំកោះកែវ, ឃុំកោះរះ, ឃុំល្វាសរ, ឃុំពាមឧកញ៉ាអុង, ឃុំភូមិធំ, ឃុំព្រែកក្មេង, ឃុំព្រែករៃ, ឃុំព្រែកឫស្សី, ឃុំសំបួរ, ឃុំសារិកាកែវ, ឃុំថ្មគរ និងឃុំទឹកឃ្លាំង។ មានភូមិសរុប ៤៣ភូមិ។
នៅក្នុងពិធីបើកការដ្ឋានស្ពានអាកាសចំនួនពីរបន្ថែមទៀត កាលពីថ្ងៃទី៣១ ខែសីហា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានស្នើឱ្យសិក្សានៅតំបន់ល្វាឯម ទៅជាទីក្រុងថ្មី សម្រាប់ខេត្តកណ្តាល។ សម្ដេចតេជោ បានបញ្ជាក់ថា «ទីក្រុងថ្មីនេះ នឹងត្រូវដាក់ស្ថិតក្នុងការគ្រប់គ្រងនៃរដ្ឋាបាលខេត្តកណ្តាល»។ បើតាមប្រមុខរដ្ឋាភិបាលគំនិតផ្ដួចផ្ដើមបង្កើតក្រុងល្វាឯម បន្ទាប់ពីរដ្ឋាភិបាលសម្រេចចិត្តអភិវឌ្ឍន៍ក្រុងរណបកោះពេជ្រ។
កាលពីថ្ងៃទី២៨ ខែកុម្ភៈ ឆ្នាំ២០២០ ក្នុងពិធីស្រោចស្រពព្រះសុគន្ធវារីប្រគេនសម្តេចព្រះសង្ឃនាយករង ៣ព្រះអង្គ សម្តេចតេជោ ហ៊ុន សែន នាយករដ្ឋមន្រ្តី បានថ្លែងថា ការកាត់ផ្នែកខ្លះនៃទឹកដីខេត្តកណ្តាល មកភ្ជាប់ជាមួយនឹងរាជធានីភ្នំពេញ គឺដើម្បីឆ្លើយតបនឹងការរីកចម្រើនផ្នែកនគរូបនីយកម្ម នៃរាជធានីភ្នំពេញ។
កន្លែងទាំងនេះជាទឹកដីរបស់ខេត្តកណ្តាលទេ ក៏ប៉ុន្តែដោយសាររាជធានីភ្នំពេញមានការរីកចម្រើន ដូច្នេះបានជាកាត់បញ្ចូលទៅក្នុងរាជធានីភ្នំពេញ ហើយបន្តិចទៀតមានការកាត់បន្ថែមទៀត។ បើតាមការថ្លែងបន្តរបស់ សម្ដេចតេជោ បានបន្តទៀតថា ការកាត់ទឹកដីខាងល្វាឯម អរិយក្សត្រមកធ្វើជាខណ្ឌមួយរបស់រាជធានីភ្នំពេញ នឹងធ្វើឡើងនៅពេលស្ពានឆ្លងទៅកាន់អរិយក្សត្រពីតំបន់ជ្រោយចង្វារ សាងសង់រួច។
រាជរដ្ឋាភិបាល បានបង្ហាញគម្រោងសាងសង់ស្ពានចំនួនពីរ ភ្ជាប់ទៅតំបន់អរិយក្សត្រ ដែលស្ពានមួយបានសុំពីរដ្ឋាភិបាលកូរ៉េ ធ្វើពីជ្រោយចង្វារទៅកាន់អរិយត្សក្រ និងស្ពានមួយទៀត ឆ្លង់កាត់ត្រង់ក្តីតាកុយទៅកាន់ខាងល្វាឯម ដើម្បីធ្វើការតភ្ជាប់ទំនាក់ទំនងគ្នា។
ទន្ទឹមនឹងនេះ តំបន់អរិយក្សត្រ និងស្វាយជ្រុំ ដែលនៅត្រើយម្ខាងនៃរាជធានីភ្នំពេញ នឹងក្លាយជាទីក្រុងរណបប្រកបដោយសក្ដានុពលដ៏ធំមួយនាពេលអនាគត ជាពិសេសក្រោយមានស្ពានឆ្លងពីជ្រោយចង្វារទៅស្វាយជ្រុំ។ នេះបើតាមប្រសាសន៍បញ្ជាក់របស់សម្ដេចតេជោ នាយករដ្ឋមន្រ្តី ហ៊ុន សែន៕
ដោយ៖ មឿន ឌីណា (Moeun Dyna)