ភ្នំពេញ៖ អ្នកជំនាញអចលនទ្រព្យលំដាប់អន្តរជាតិបានអះអាងថា យោងតាមការសិក្សាបានរកឃើញថា តម្លៃដីនៅឆ្នាំនេះសម្រេចបានកំនើន៣ភាគរយ នៅដំណាច់ត្រីមាសទី១ឆ្នាំនេះ។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឱ្យដឹងតាមទូរស័ព្ទ កាលពីថ្ងៃទី២៨មិនា កន្លងមកថា តម្លៃដីធ្លីនៅឆ្នាំនេះនៅតែមានសញ្ញាវិជ្ជមាន ដោយអត្រាកំណើនបានកើនជាមធ្យម ៣ភាគរយ ប៉ុន្តែមិនមានមានន័យថាគ្រប់តំបន់កើនឡើងក្នុងកម្រិតនេះនោះទេ គឺតំបន់ខ្លះបានហក់ឡើងខ្ពស់ជាងនេះ ពិសេសតំបន់ជាយក្រុង ដោយសារតែការពង្រីកហេដ្ឋារចនាសម្ព័ន្ឋរបស់រដ្ឋាភិបាល ការកើនឡើងនូវកត្តាប្រជាសាស្រ្ត និងការពង្រីកគម្រោងអភិវឌ្ឍរបស់អ្នកវិនិយោគនានា។
អ្នកនាងបន្តថា “រយៈពេលមួយទសវត្សរ៍ចុងក្រោយនេះ តម្លៃដីធ្លីនៅកម្ពុជាសម្រេចបានកំនើនជាមធ្យម៧ភាគរយ ដែលជាកំនើនដ៏ប្រសើរមួយ ប៉ុន្តែសម្រាប់បណ្តាឆ្នាំខាងមុខ ការព្យាករណ៍នៅតែមានសញ្ញាល្អប្រសើរ”។
ប្រធានសមាគមអ្នកជំនាញអចលនទ្រព្យកម្ពុជា លោក ឃាង ពុទ្ឋី បានមានប្រសាសន៍ឱ្យដឹងនៅថ្ងៃដដែលថា ក្នុងដើមឆ្នាំ២០១៩នេះ លោកមើលឃើញអ្វីៗមានសញ្ញាវិជ្ជមាន ដោយសារការទិញលក់ដីធ្លី និងការទិញលក់លំនៅដ្ឋានរបស់បុរីធំៗ នៅក្រុងភ្នំពេញ នៅតែមានសញ្ញាល្អប្រសើរ ពិសេសចរន្តនៃការទិញលក់ដីធ្លីនៅតែបន្តកើនឡើង ហេតុនេះឆ្នាំ២០១៩ជាឆ្នាំល្អសម្រាប់ការវិនិយោគលើវិស័យអចលនទ្រព្យ។
លោកបន្តថា “អ្វីដែលខ្ញុំមើលឃើញនៅដើមឆ្នាំ២០១៩នេះ គឺអ្នកអភិវឌ្ឍន៍ដីឡូត៍ចាប់ផ្តើមសាងសង់ផ្ទះតម្លៃមធ្យម ដែលអនុញ្ញាត្តឱ្យបុគ្គលិកក្រុមហ៊ុននានាអាចមានលទ្ឋភាពទិញកាន់តែច្រើន”។ លោកបន្តថា “ការរីកចម្រើននៃវិស័យនេះនឹងបន្តរយៈពេលវែងបន្តទៀត ដរាបណាសេដ្ឋកិច្ចរបស់យើងនៅតែមានសញ្ញាវិជ្ជមាន និងកំនើនល្អប្រសើរបែបនេះ”៕
ប្រភព : www.propertyarea.asia
