ភ្នំពេញ៖ មន្រ្តីជាន់ខ្ពស់ក្រុមប្រឹក្សាអភិឌ្ឍន៍កម្ពុជាបានថ្លែងឲ្យដឹងថា មកដល់ពេលនេះក្រុមប្រឹក្សាអភិវឌ្ឍន៍កម្ពុជា បានចុះបញ្ជីវិនិយោគដល់ក្រុមហ៊ុនជប៉ុនមានចំនួន១៣៧គម្រោង ដែលមានទុនវិនិយោគសរុប ចំនួនប្រមាណ២,៥ពាន់លានដុល្លារអាមេរិក នៅក្នុងក្របខណ្ឌនៃការវិនិយោគផ្ទាល់ពីជប៉ុន។
ក្រុមហ៊ុនជប៉ុនដែលវិនិយោគនៅកម្ពុជាបានផ្តោតលើវិស័យធំៗជាច្រើនដូចជាវិស័យសំណង់ និងអចលនទ្រព្យ វិស័យលក់រាយ តាមរយៈការបើកផ្សារទំនើប AEON Mall បន្តបន្ទាប់ ការបើកដំណើរការសេវាកម្មភោជនីយដ្ឋាន និងសេវាកម្មអចលនទ្រព្យ មន្ទីរពេទ្យនិងសេវាកម្មជាច្រើនទៀត។
លោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ឲ្យដឹង នៅក្នុងកិច្ចប្រជុំលើកទី១៧ នៃគណៈកម្មាធិការចម្រុះកម្ពុជា-ជប៉ុនកាលពីថ្ងៃទី២០ ខែកុម្ភៈ ឆ្នាំ២០១៩ កន្លងមក ថា រដ្ឋាភិបាល និងប្រជាជនជប៉ុន ដែលតែងតែគាំទ្រកម្ពុជា ក្នុងការស្តារនិងអភិវឌ្ឍសេដ្ឋកិច្ចជាតិ ជាក់ស្តែងនៅព្រឹកថ្ងៃទី២០ ម្សិលមិញនេះ មានការចុះហត្ថលេខាលើលិខិតប្តូរសារស្តីពី ការបន្តការគាំទ្ររបស់រដ្ឋាភិបាលជប៉ុន សម្រាប់អនុវត្តគម្រោងចំនួនពីរ ក្រោមឥណទានសម្បទាន និងហិរញ្ញប្បទានឥតសំណងចំនួនប្រមាណ ៤៣លានដុល្លារអាមេរិក ស្របតាមកិច្ចព្រមព្រៀងរវាងកម្ពុជា-ជប៉ុនស្តីពី សេរីភាវូបនីយកម្ម ការជំរុញ និងការការពារវិនិយោគ ដែលត្រូវបានចុះហត្ថលេខាដោយ សម្តេចតេជោនាយករដ្ឋមន្ត្រី និងលោក ស៊ីនហ្សូ អាបេ (Shinzo Abe) នាយករដ្ឋមន្ត្រីជប៉ុនកាលពីថ្ងៃទី១៤ ខែមិថុនា ឆ្នាំ២០០៧។
ឯកអគ្គរដ្ឋទូតជប៉ុនប្រចាំកម្ពុជា លោក ហ៊ីដេហ៊ីសា ហូរីណុអ៊ឺឈិ បានមានប្រសាសន៍ថា កិច្ចប្រជុំនេះមានសារៈសំខាន់ណាស់ សម្រាប់ការដោះស្រាយរាល់បញ្ហានានា ទាក់ទងនឹងការវិនិយោគរបស់ក្រុមហ៊ុនជប៉ុន នៅក្នុងប្រទេសកម្ពុជា ក្នុងនោះឯកឧត្តមក៏សូមថ្លែងអំណរគុណយ៉ាងជ្រាលជ្រៅ ដល់ក្រុមប្រឹក្សាអភិវឌ្ឍន៍កម្ពុជា និងក្រសួង-ស្ថាប័នពាក់ព័ន្ធ ដែលជានិច្ចជាកាលតែងតែបានសហការយ៉ាងល្អ និងបានខិតខំប្រឹងប្រែងប្រកបដោយស្មារតីទទួលខុសត្រូវ ក្នុងការសម្របសម្រួល និងផ្តល់នូវការឆ្លើយតបជាវិជ្ជមានចំពោះក្ដីកង្វល់ និងសំណូមពររបស់អ្នកវិនិយោគជប៉ុន។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានមានប្រសាសន៍ថា ទំនាក់ទំនងរវាងប្រជាជនជប៉ុន និងរដ្ឋាភិបាលនៃប្រទេសទាំងពីរមានការផ្លាស់ប្តូរជាប្រវត្តិសាស្រ្ត ដោយសារកំនើននៃការហូរចូលអ្នកវិនិយោគជប៉ុនមកកម្ពុជា ពិសេសការហោះហើរត្រង់របស់ក្រុមហ៊ុន ANA Airline ដែលបាននិងកំពុងជួយបង្កើនការវិនិយោគ និងការតភ្ជាប់រវាងប្រទេសទាំងពីរ។
លោកបន្តថា “ជប៉ុនចូលមកវិនិយោគកាន់តែច្រើននៅកម្ពុជាដោយសារ ពួកគេបានសិក្សាពីទីផ្សារ ពីស្ថានភាពសេដ្ឋកិច្ច និងប្រព័ន្ឋច្បាប់របស់កម្ពុជាច្បាស់លាស់រួចហើយ ទើបពួកគេមកវិនិយោគ”។ លោកបន្តថា “រហូតមកទល់ពេលនេះជប៉ុនបានកសាងមូលដ្ឋានគ្រឹះ សំរាប់វិនិយោគរយៈពេលវែងនៅកម្ពុជានៅកម្ពុជារួចហើយ”៕
ប្រភព : www.propertyarea.asia
