ភ្នំពេញ៖ បើគ្មានអ្វីប្រែប្រួលនោះទេ នាយករដ្ឋមន្ត្រីនៃប្រទេសកម្ពុជា និងនាយករដ្ឋមន្ត្រីនៃប្រទេសថៃនឹងចូលរួមសម្ពោធដាក់ឪ្យដំណើការជាផ្លូវការនូវផ្លូវរថភ្លើងរត់ឆ្លងកាត់ព្រំដែននៃប្រទេសទាំងពីរនៅក្នុងអំឡុងឆ្នាំ ២០១៩នេះ ក្រោយពីភាគីទាំងពីចុះហត្ថលេខាលើកិច្ចព្រមព្រៀងដែលបានពិភាក្សារួចរាល់កាលពីអំឡុងឆ្នាំ ២០១៨ ។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានឪ្យដឹងកាលពីម្សិលមិញនេះ ថា នឹងអញ្ជើសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងនាយករដ្ឋមន្ត្រីថៃ ឪ្យជិះរថភ្លើងឆ្លងកាត់ព្រំដែនកម្ពុជា-ថៃតាមផ្លូវដែក យើងធ្វើកិច្ចព្រមព្រៀងជាមួយភាគីថៃរួចរាល់អស់ហើយ តែមិនទាន់ចុះហត្ថលេខាជាផ្លូវការ។ លោកស៊ុនចាន់ថុលបន្តថា “ខ្ញុំទទួលបានសិទ្ធិប្រទានពីនាយករដ្ឋមន្ត្រីរួចហើយ ក្នុងការចុះហត្ថលេខាលើកិច្ចព្រមព្រៀងនោះ តែយើងរងចាំភាគីថៃដោយមិនដឹងពេលណាគេសម្រេចចុះហត្ថលេខាបាននោះទេ”។

លោក Arkhom Termpittayapaisith រដ្ឋមន្ត្រីក្រសួងដឹកជញ្ជូនថៃ ធ្លាប់បានឱ្យដឹងថា ការតភ្ជាប់ ផ្លូវរថភ្លើងរវាងថៃ និងកម្ពុជានេះ នឹងត្រូវបើកដាក់ឱ្យដំណើរការនាពេលឆាប់ៗខាងមុខនេះ ដើម្បីធ្វើ ដំណើរឆ្លងកាត់ព្រំដែនប្រទេសទាំងពីរ ដើម្បីឱ្យប្រជាជន អាជីវករ ពាណិជ្ជករនៃប្រទេស ទាំងពីរដឹក ជញ្ជូនទំនិញ ផលិតផលផ្សេងៗ ចេញ ចូល កាន់តែលឿនឆាប់រហ័ស និងផ្ដល់ភាពងាយស្រួល ថែម ទៀត។

កម្ពុជា- ថៃ កាលពីកន្លងទៅនេះ បានឯកភាពគ្នា លើការបញ្ចប់នីតិវិធី និងបែបបទក្នុងការបើកដាក់ឱ្យដំណើរការផ្លូវរថភ្លើង សម្រាប់ធ្វើដំណើរឆ្លង កាត់តាមព្រំដែននៃប្រទេសទាំងពីរ ដើម្បីឈានទៅចុះហត្ថលេខា និងបើកសម្ពោធបើកដំណើរការផ្លូវរថភ្លើងឆ្លងកាត់ព្រំដែនរវាងកម្ពុជា និងថៃ នាពេលខាងមុខនេះ ។ ភាគីទាំងពីរបានដោះស្រាយចំណុច ដែលនៅសេស សល់ធំៗចំនួន៣ចំណុច បានរួចរាល់ហើយទាក់ទងនឹងការរៀបចំចំណតស្ថានីយ៍ អន្ដរជាតិក្នុងការឆ្លងការព្រំដែនប្រទេសទាំងពីរតាមផ្លូវរថភ្លើង នីតិវិធី និងបែបបទក្នុងការរៀបចំ ស្ថានីយរថភ្លើង និងចំណុចមួយទៀតគឺការអនុញ្ញាតិផ្ដល់ដី និងទីកន្លែងសម្រាប់សាងសង់ស្ថានីយរថ ភ្លើងតាម ព្រំដែន រវាងប្រទេសទាំងពីរ។

ជាមួយគ្នានេះដែរប្រទេសថៃនឹងផ្ដល់ដែកប្រវែងជាង ៦០គីឡូម៉ែត្រមកកម្ពុជា ដើម្បីយកមកផ្លាស់ប្ដូរ ផ្លូវរថភ្លើងណាចាស់ៗ និងជួសជុលឡើងវិញ ដើម្បីធ្វើយ៉ាងណាឲ្យផ្លូវរថភ្លើង មានភាពរឹងមាំបន្ថែមទៀត៕

ប្រភព : www.propertyarea.asia