ភ្នំពេញ: សមាគមអ្នកជំនាញអចលនទ្រព្យកម្ពុជា(CREA) បានសម្រេចបោះឆ្នោតជ្រើសរើសប្រធានក្រុមប្រឹក្សាភិបាលថ្មី និងអនុប្រធានក្រុមប្រឹក្សាភិបាលបន្ថែម ដើម្បីបំពេ ញការងារឲ្យកាន់តែមានប្រសិទ្ឋភាព និងចូលរួមលើកកំពស់វិស័យអចលនវត្ថុកម្ពុជា។
កញ្ញាចេវ សុឃុន និងលោកយិន លាងគង់ត្រូវបានបោះឆ្នោតជ្រើសរើសជាប្រធាននិងអនុប្រធានក្រុមប្រឹក្សាភិបាលសមាគមនេះ ដែលសមាគមនេះតម្រូវឲ្យមានប្រធានម្នាក់អនុប្រធានពីរនាក់គឺលោកមាស វាសនា និងលោកយិន លាងគង់ និងសមាជិកក្រុមប្រឹក្សាភិបាលចំនួន៦រូបថែមទៀត។
លោកឃាង ពុទ្ឋីប្រធានសមាគមអ្នកជំនាញអចលនទ្រព្យកម្ពុជាបានថ្លែងឲ្យដឹងក្នុងកិច្ចប្រជុំកាលពីថ្ងៃទី៥ មករាកន្លងមកថា ការបោះឆ្នោតជ្រើសរើសប្រធាន និងអនុប្រធានក្រុមប្រឹក្សាភិបាលនេះ ធ្វើឡើងដោយតម្លាភាព និងអ្វីកាន់តែសំខាន់គឺធ្វើឲ្យសមាគមនេះមានរចនាសម្ព័ន្ឋរៀបរយ និងអាចបំពេញការងារជូនសមាជិកសមាគម បានពេញលេញ ពិសេសជាការចូលរួមចំណែកជាមួយរាជរដ្ឋាភិបាល ដើម្បីជំរុញនិងទាក់ទាញការវិនិយោគពីបរទេស ក៏ដូចជា ដើម្បីលើកកំពស់និងផ្តល់ទំនុកចិត្តដល់វិស័យនេះ។
លោកបន្តថា “សមាគមនេះបង្កើតឡើង ដើម្បីជួយក្រុមហ៊ុនជាសមាជិក ក៏ដូចជា រដ្ឋាភិបាល ដើម្បីជំរុញនិងលើកកំពស់ការអភិវឌ្ឍសេដ្ឋកិច្ចនិងសង្គមជាតិ”។លោកបន្តថា “វាជាសម្លេងថ្មីមួយទៀតពីកម្ពុជា ទៅកាន់ពិភពលោក ដើម្បីទាក់ទាញការចាប់អារម្មណ៍និងវិនិយោគ ព្រោះសមាគមមួយមិនអាចក្តោបក្តាប់បានរាល់ផ្នែក និងជំរុញសក្តានុពលនៅក្នុងវិស័យនេះនោះទេ។
ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ កញ្ញាចេវ សុឃុនបាននិងកំពុងដើរតួនាទីសំខាន់ក្នុងវិស័យនេះ ហើយកញ្ញាបានមានប្រសាសន៍ថា យើងនឹងធ្វើឲ្យសមាគមរ៉ឹងមាំ តាមរយៈការស្វែងរកការគាំទ្រពីក្រសួងស្ថាប័នពាក់ព័ន្ឋ ដើម្បីធ្វើឲ្យសមាគមនេះទទួលបានការទទួលស្គាល់ពីថ្នាក់ជាតិ និងអន្តរជាតិបន្ថែមទៀត។
កន្លងមកលោកឃាង ពុទ្ឋីប្រធានសមាគមនេះបានស្វែងរក និងទទួលបានការគាំទ្រពីក្រុមហ៊ុន អ្នកវិនិយោគនៅប្រទេសចិន សាំងហ្កាពួរជាដើម ពិសេសកិច្ចសហការជាមួយសមាគមពាក់ព័ន្ឋនៅបរទេសផងដែរ៕
ប្រភព : www.propertyarea.asia
