ភ្នំពេញ: បន្ទាប់ពីរាជធានីភ្នំពេញ ការអភិវឌ្ឍលើវិស័យអចលនទ្រព្យនាពេលបច្ចុ​ប្បន្នត្រូវបានរីកដុះដាលដល់ទឹកដីក្រុងតាខ្មៅ ដែលកំពុងតែសន្ទុះយ៉ាងខ្លាំងរួមជាមួយនឹងសកម្មភាពនៃការសាងសង់សំណង់នានាយ៉ាងស្អេកស្កះ។

បច្ចុប្បន្នក្នុងទឹកដីក្រុងតាខ្មៅមានបុរីប្រមាណ១០ បាននិងកំពុងសាងសង់ និងគំរោងខ្លះបានបញ្ចប់ការសាងសង់។ ក្រៅពីបុរីក្រុងតាខ្មៅក៏មានការសាងសង់មណ្ឌលពា​ណិជ្ជកម្ម ខុនដូ និងអាផាតមិនជាដើម ដែលជាកត្តាជម្រុញឱ្យតម្លៃដីនៅក្នុងតំបន់នេះមានការកើនឡើងគួរឱ្យកត់សម្គាល់។

លោក ច្រឹក សុខនីម អគ្គនាយកក្រុមហ៊ុន Century21 Mekong ដែលទើបតែជាប់ជាបេក្ខភាពប្រធានសមាគមន៍អ្នកវាយតម្លៃ និងភ្នាក់ងារអចលនវត្ថុ អាណត្តិទី៦ បានបង្ហើបឱ្យកាលពីរសៀលថ្ងៃទី២៨ ធ្នូលន្លងមកថា បច្ចុប្បន្ននេះ វិស័យអចលនទ្រព្យនៅក្រុងតាខ្មៅ រាប់ទាំងវិស័យសំណង់ ក៏ដូចជាតម្លៃដីធ្លី គឺមានសន្ទុះយ៉ាងខ្លាំង ជាពិសេសដីដែលស្ថិតនៅក្នុងតំបន់មជ្ឈមណ្ឌលពាណិជ្ជកម្ម និងតំបន់សំណង់លំនៅដ្ឋានតែម្ដង។

លោកថា “ក្រុងតាខ្មៅ ដែលស្ថិតនៅភាគខាងត្បូងនៃរាជធានីភ្នំពេញ គឺជាទីតាំងដែលមានអំណោយផលយ៉ាងប្រសើរ ក្នុងការអភិវឌ្ឍលើគ្រប់វិស័យ ជាពិសេសវិស័យអចលនទ្រព្យ”។លោកបន្តថា អាស្រ័យដោយរាជធានីភ្នំពេញពោរពេញ ទៅសំណង់អា​គារធំៗស្អេកស្កះ ក្នុងនាមជាមជ្ឈមណ្ឌលពាណិជ្ជកម្មដ៏សំខាន់នោះ បានជម្រុញឱ្យកត្តាប្រជាសាស្រ្តងាកទៅរកតំបន់ជិតខាង ដែលមានភាពទូលាយដើម្បីស្នាក់នៅ”។

ជាក់ស្ដែងនៅពេលបច្ចុប្បន្ននេះ មានសំណង់លំនៅដ្ឋានជាច្រើន ក៏ដូចជាបុរីផងដែរ បាន និងកំពុងធ្វើការអភិវឌ្ឍជាហូរហែរ រហូតកើតមានជាសំណង់អាផាតមិន និងខុនដូផងដែរ។

ដោយសារតែតម្រូវការទាំងអស់នេះហើយ បានជម្រុញឱ្យតម្លៃដីនៅក្នុងតំបន់តាខ្មៅកើនឡើងយ៉ាងខ្លាំង ដូចជានៅតំបន់មណ្ឌលពាណិជ្ជកម្ម តម្លៃដីអាចមានសន្ទុះចាប់ពី 800-1300 ដុល្លារក្នុងមួយម៉ែត្រការ៉េ ឬអាចលើសពីនេះ ចំពោះតំបន់ពិសេសមួយចំនួនតូច។ ដោយឡែកសម្រាប់តម្លៃដីនៅតំបន់សំណង់លំនៅដ្ឋានវិញ អាចមានសន្ទុះចាប់ពី 250-400 ក្នុងមួយម៉ែត្រការ៉េ។ សម្រាប់តម្លៃដីដូចដែលបានបង្ហាញជូនខាងលើនេះ វាជាតម្លៃនៅលើទីផ្សារនាពេលបច្ចុប្បន្ន បើប្រៀបធៀបកាលពីឆ្នាំកន្លងទៅ គឺមានកំណើនជាមធ្យមប្រមាណ១០ទៅ១៥ភាគរយ ហើយវានៅនឹងតែបន្តមានកំណើនបន្ថែមទៀតនៅឆ្នាំខាងមុខនេះ។

​ជាមួយគ្នានេះផងដែរ លោក ច្រឹក សុខនីម ក៏បានបន្ថែមឱ្យដឹងទៀតថា យ៉ាងយូរនៅរយៈពេលប្រមាណ៥ឆ្នាំទៀត ក្រុងតាខ្មៅទាំងមូល នឹងក្លាយជាតំបន់ដ៏ពេញនិយមមិនចាញ់រាជធានីភ្នំពេញឡើយ ដោយសារតែក្រុងតាខ្មៅមានអំណោយផលយ៉ាងពិសេស ដែលក្រៅពីមានភូមិសាស្ត្រល្អ ទីតាំងជាប់រាជធានីភ្នំពេញ មានភាពងាយស្រួលក្នុងការធ្វើដំណើរដែលចំណាយពេលមិនលើស15នាទី ចេញពីតាខ្មៅ ចូលក្នុងរាជធានីភ្នំពេញតាមមហាវិថីសម្ដេច តេជោ (ផ្លូវ60ម៉ែត្រ) មានកំណើនប្រជាសាស្ត្រ និងមានភាពងាយស្រួលក្នុងការចាកចេញទៅតាមបណ្តាខេត្តនានាផងដែរ។

​លោកបណ្ឌិតវ៉ាន់ វ៉ាតអនុប្រធានមន្ទីររៀបចំដែនដី នគរូបនីយកម្មនិងសំណង់បាន​មានប្រសាសន៍ឲ្យដឹងថា ដោយសារកំនើនប្រជាសាស្រ្ត និងការអភិវឌ្ឍ ទើបឃុំចំនួន៤ ក្នុងស្រុកជុំវិញទីក្រុងនេះ ត្រូវបានកាត់បញ្ចូលមកដាក់ក្នុងរដ្ឋបាលក្រុងតាខ្មៅ។លោកបន្ត​ថា ការដាក់បញ្ចូលនេះ នឹងធ្វើឲ្យមូលដ្ឋាននោះមានការអភិវឌ្ឍ ហើយប្រជាជននៅមូល ដ្ឋា​នមានកាន់តែមានជីវភាពល្អប្រសើរឡើង ដោយសារមានការរៀបចំហេដ្ឋារចនាសម្ព័ន្ឋ​ល្អប្រសើរ និងផែនការអភិវឌ្ឍន៍ច្បាស់លាស់។

​លោកបន្តថា “ប្លង់គោលប្រើប្រាស់ដីក្រុងតាខ្មៅ ត្រូវបានរដ្ឋាភិបាលអនុម័តរួចហើ​យ ហេតុនេះវានឹងធ្វើឲ្យក្រុងតាខ្មៅមានការអភិវឌ្ឍលឿន ហើយតម្លៃដីធ្លីក៏មានកំនើនខ្ពស់​ផងដែរ”៕

ប្រភព : www.propertyarea.asia