ភ្នំពេញ៖ មន្ដ្រីជាន់ខ្ពស់ក្រសួងពាណិជ្ជកម្មបានឲ្យដឹងថា កម្ពុជាបាននិងកំពុងតែចាប់ដៃគូពាណិជ្ជកម្ម កាន់តែធំជាងមុនជាមួយប្រទេសរុស្ស៊ី ដោយផ្ដោតសំខាន់ទៅលើសម្លៀកបំពាក់ សម្រាប់រដូវរងារ អាវរោមសត្វ ឬអាវធំ ដែលជាសក្ដានុពលក្នុងការពង្រីកទីផ្សារធំក្នុងការនាំចេញសម្លៀកបំពាក់ពីកម្ពុជា ។
ថ្លែងក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ២០១៨ និងទិសដៅអនុវត្តន៍ការងារពាណិជ្ជកម្មឆ្នាំ២០១៩ កាលពីថ្ងៃទី២៤ ខែធ្នូ ឆ្នាំ២០១៨កន្លថមកនេះ លោក ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្ម បានមានប្រសាសន៍ថា រាជរដ្ឋាភិបាលកម្ពុជា បានចាប់ដៃគូលើកិច្ចព្រមព្រៀងពាណិជ្ជកម្មអឺរ៉ុប-អាស៊ី ក្នុងនោះគឺផ្ដោតជាមួយ ប្រទេសរុស្ស៊ី បន្ទាប់ពីចរចារួចរាល់ហើយ កម្ពុជានឹងបើកទីផ្សារសម្លៀកបំពាក់សម្រាប់ រដូវរងារទៅកាន់ប្រទេសរុស្ស៊ី ដែលជាសក្ដានុពលក៏ដូចជាកាលានុវត្ដភាពរបស់កម្ពុជាផងដែរ។
លោកបានបញ្ជាក់ថាបន្ទាប់ពីទីផ្សាររុស្ស៊ី កម្ពុជាក៏សមាជិកនៃកិច្ចព្រមព្រៀងពាណិជ្ជកម្ម គ្រប់ជ្រុងជ្រោយ ដែលអាចចរចាបញ្ចប់នៅឆ្នាំ២០១៩ខាងមុខនេះ ហើយនេះគឺជាទីផ្សារធំ មានមនុស្សជាងពាក់កណ្ដាលពិភពលោក ដែលកម្ពុជាមានឱកាសនាំចេញ ទៅកាន់ប្រទេស ផ្សេងៗជាច្រើនទៀតដូចជាប្រទេសចិន ឥណ្ឌា កូរ៉េខាងត្បូង ជប៉ុន អូស្ដ្រាលី និងប្រទេស ណូវែលសេឡង់។ លោករំពឹងថា ក្នុងឆ្នាំ២០១៩ខាងមុខ កម្ពុជានឹងមានភាពប្រកួតប្រជែង និងធ្វើការនាំចេញនូវផលិតផលបានច្រើន ជាពិសេសការនាំចេញសម្លៀកបំពាក់សម្រាប់ រដូវរងារដែលរហូត មកដល់ពេលនេះកម្ពុជាកំពុងចរចាបន្ដខិតខំជំរុញតាមនីតិវិធី និងយន្ដការនៃការសម្របសម្រួលទៅតាមប្រទេសនីមួយ។
យោងតាមរបាយការណ៍ក្រសួងពាណិជ្ជកម្មបានឱ្យដឹងថា ការនាំចេញរបស់កម្ពុជា មានកំណើនប្រមាណ១០ភាគរយ ក្នុងឆ្នាំ២០១៨ ដែលកំណើននេះ ទទួលបានពីការបន្តកើនឡើងនៃវិស័យកាត់ដេរ និងការនាំចេញផលិតផលកសិកម្ម និងឧស្សាហកម្មតាមរយៈការខិតខំបើក ច្រកទីផ្សារនាំចេញទៅកាន់ជាង១៤៧ប្រទេស នៅទូទាំងពិភពលោក៕
ប្រភព : www.propertyarea.asia
