ភ្នំពេញ៖ ការវិនិយោគក្នុងវិស័យសំណង់សំណង់នៅដំណាច់ឆ្នាំ២០១៨នេះ សម្រេចបានទំហំទឹកប្រាក់ជាង៥២០០លានដុល្លារអាមេរិក ថយចុះ១៨ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលមានទឹកប្រាក់ចំនួន៦៤០០លានដុល្លារអាមេរិក។
យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់ ដែលបានដាក់បង្ហាញក្នុងសន្និបាត បូកសរុបលទ្ធផលការងារឆ្នាំ ២០១៨ និងលើកទិសដៅការងារឆ្នាំ ២០១៩ នៅព្រឹកថ្ងៃទី ២៤ ខែធ្នូឆ្នាំ ២០១៨នេះបានឲ្យដឹងថា ការវិនិយោគលើវិស័យសំណង់នៅកម្ពុជាក្នុងឆ្នាំ ២០១៨ មានចំនួន២៨៦៧គម្រោង មានផ្ទៃក្រឡាជាង១១លានម៉ែត្រការ៉េ។ របាយការណ៍បានបន្តថាក្នុងចំណោមគម្រោងទាំង២៨៦៧នោះ ក្រោមសមត្ថកិច្ចក្រសួងមានចំនួន២៤៥គម្រោង ដោយមានផ្ទៃក្រឡាប្រមាណជាង ១០លានម៉ែត្រការ៉េ និងក្រោមសមត្ថកិច្ចរាជធានី ខេត្ត មានចំនួន២ ៦២២គម្រោង ដោយមានផ្ទៃក្រឡាសរុបជាង ១លានម៉ែត្រការ៉េ។
ការវិនិយោគលើវិស័យសំណង់ក្នុងឆ្នាំ ២០១៨នេះ មានគំរោងចម្រុះ ដូចជា សំណង់បែបលំនៅឋាន សំណង់បែបអាគារខ្ពស់ៗ រួមទាំងសំណង់លំនៅឋានបែបលក្ខណៈបុរីផងដែរ។ ដោយសំណង់អាគារខ្ពស់ ដែលមានកំពស់ចាប់ពី៥ជាន់ឡើងទៅក្នុងរាជធានីភ្នំពេញ មានចំនួន១១១០ អាគារ។
ទំហំទឹកប្រាក់វិនិយោគលើវិស័យសំណង់នៅកម្ពុជាក្នុងឆ្នាំ ២០១៨នេះ បើធៀបនឹងឆ្នាំ២០១៧ មានការធ្លាក់ចុះជាង១៨ភាគរយ ដោយឆ្នាំ២០១៧ទុនវិនិយោគក្នុងវិស័យនេះ មានទំហំទឹកប្រាក់វិនិយោគមានជាង៦៤០០លានដុល្លារអាមេរិក៕
ប្រភព : www.propertyarea.asia
