Register Already an agent ? Login

អ្នកជំនាញអះអាងថា កម្ពុជាកំពុងពង្រីកទីផ្សារអចលនទ្រព្យទៅកាន់ពិភពលោក

​ភ្នំពេញ:​ ស្របពេលវិស័យសំណង់ និងអចលនទ្រព្យកម្ពុជាកំពុងទទួលបានការចាប់អារម្មណ៍ ពីអ្នកវិនិយោគអន្តរជាតិ អ្នកជំនាញក្នុងវិស័យនេះបានអះអាងថា បច្ចុប្បន្នក្រុមហ៊ុននានាបាននិងកំ ពុងពង្រីកទីផ្សារក្នុងស្រុក និងពង្រីកទីផ្សារទៅកាន់អន្តរជាតិ។

​លោកស្រី Grace Rachny Fong នាយិកាក្រុមហ៊ុន Century 21 Cambodia បានឲ្យដឹងកាលពីម្សិលម៉ិញនេះថា កត្តាសុខសន្តិភាពបានធ្វើអោយកម្ពុជា មានអំណោយផលយ៉ាងល្អក្នុងការវិនោយោគ ជាពិសេសទៅលើ វិស័យអចលនទ្រព្យ។ ជាក់ស្តែងសំណង់អាគារទាំងរដ្ឋ និងឯកជនបាននិងកំពុងរីកចម្រើនកាន់តែខ្លាំង មិនចាញ់គ្នានោះទេ។ លោកស្រីបន្តថា ជាមួយនឹងកំនើននៃការវិនិយោគពីអន្តរជាតិ បានធ្វើឲ្យទីផ្សារនេះកាន់តែមានទំនុកចិត្ត ហើយយើងបាននិងកំពុងពង្រីកទី​ផ្សារទៅកាន់អន្តរជាតិផងដែរ។

លោកស្រីថា “រាជធានីភ្នំពេញ និងខេត្តព្រះសីហនុ ជាទីកន្លែងសំខាន់ដែលវិនិយោគិនអន្តរជាតិ ឆាប់ស្គាល់ជាងគេ ឆាប់ស្គាល់ដោយសារខេត្តព្រះសីហនុ កំពុងមានការរីកចំរើន និងវិវឌ្ឍប្រែក្លាយជាតំបន់ ដែលស្រស់ស្អាត និងអំណោយផលទេសចរណ៍ទៀតផង”។លោកស្រីបន្តថា” ចំណែ​ករាជធានីភ្នំពេញ ទីតាំងកោះពេជ្រក៏ជាកន្លែងប្រមូលផ្តុំអ្នកវិនិយោគ ទាំងក្នុងនិងក្រៅប្រទេស កំពុ​ងបោះទុន ធ្វើការងារផ្សេងៗ នៅមូលដ្ឋាននោះ”។

​លោកស្រីបានបញ្ជាក់ថា “ការវិនិយោគសំខាន់បំផុតគឺទំនុកចិត្ត។ កម្ពុជានៅក្នុងអាណត្តិថ្មី នេះបានផ្តល់ទំនុកចិត្តយ៉ាងកក់ក្តៅបំផុត សំរាប់វិនិយោគិនក្រៅប្រទេសនោះគឺ ភាពជោគជ័យក្នុងការបោះឆ្នោត ដែលបានផលល្អខុសពី៤ឆ្នាំមុន”

​ជាមួយគ្នានេះ លោកគុយ វ៉ាតប្រធានក្រុមប្រឹក្សាក្រុមហ៊ុនVTRUST GROUPបានមានប្រ​សាសន៍ឲ្យដឹងផងដែរថា តាមរយៈក្រុមហ៊ុនCentury21 Cambodiaយើងបាននិងកំពុងពង្រីកសក្តានុពល និងផ្សព្វផ្សាយសក្តានុពលទេសចរណ៍កម្ពុជាទៅកាន់ពិភពលោក ព្រោះចង់ឬមិនចង់​យើងត្រូវតែពង្រីកទីផ្សាររបស់យើងឲ្យបានទូលំទូលាយបន្ថែមទៀត ប៉ុន្តែដើម្បីធ្វើការងារនេះបានក្រុមហ៊ុនភ្នាក់ងារអចលនទ្រព្យទាំងអស់ ត្រូវពង្រឹងគុណភាពសេវាកម្មរបស់ខ្លួន ដើម្បីទទួលបានទំនុកចិត្ត ព្រោះទំនុកចិត្តមានសារៈសំខាន់ណាស់ក្នុងវិស័យនេះ។

​លោកបន្តថា “ការពង្រីកទីផ្សារពិតជាសំខាន់ តែភាពជោគជ័យនៃការពង្រីកទីផ្សារឲ្យបាន​តាមគោលដៅរបស់យើង គឺការផ្តោតលើអ្វីដែលយើងធ្វើ និងកសាងទំនុកចិត្តនៅក្នុងទីផ្សារ”៕

ប្រភព : www.propertyarea.asia