Register Already an agent ? Login

តើតម្លៃដីនៅតាមបណ្តោយមហាវិថីមុនីវង្សកើនឡើងដល់កម្រិតណា?


Sat, 22 Dec 2018

​ភ្នំពេញ: តម្លៃដីនៅក្នុងរាជធានីភ្នំពេញដែលត្រូវបានគេប្រសិទ្ធនាមថា ជាបេះដូងនៃមជ្ឈមណ្ឌលពាណិជ្ជកម្មយ៉ាងសំខាន់ប្រចាំប្រទេសនោះ គឺមានតម្លៃថ្លៃ ជាពិសេសទីតាំងទាំងឡាយណា ដែលស្ថិតនៅតាមបណ្តាផ្លូវសំខាន់ៗដូចជាផ្លូវមុនីវង្ស មហាវិថីសហព័ន្ធរុស្សីជាដើម។​

លោក ច្រឹក សុខនីម ដែលអគ្គនាយកក្រុមហ៊ុន Century21 Mekong និងទើបតែជាប់ជាប្រធាន​សមាគមន៍​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា​អាណត្តិ​ទី6 កាលពីពេលកន្លងទៅថ្មីៗនេះបានឱ្យដឹងនាព្រឹកថ្ងៃទី២១ ធ្នូនេះថា ចំពោះតម្លៃដីដែលស្ថិតនៅតាមបណ្តាផ្លូវ និងមហាវិថីសំខាន់ៗក្នុងរាជធានីភ្នំពេញ គឺមានតម្លៃខុសៗពីគ្នា ហើយក៏មិនសូវមានការទិញលក់យ៉ាងគគ្រឹកគគ្រេង ដូចដីនៅតំបន់ផ្សេងទៀតនោះដែរ រហូតត្រូវបានអ្នកជំនួញលើវិស័យមួយនេះចាត់ទុកថា ជាតំបន់ដីកម្រ។

លោកបញ្ជាក់ថា តាមជាក់ស្ដែង ដីដែលស្ថិតនៅតាមបណ្តាផ្លូវខាងលើនេះ គឺត្រូវបានគេគិតជាចំណែកផ្សេងៗពីគ្នា ជាក់ស្ដែងដូចជាផ្លូវព្រះមុន្នីវង្ស ដោយរាប់គិតត្រឹមតែពីម្ដុំផ្សារថ្មីមកដល់តំបន់ពេទ្យចិន អាចមានតម្លៃចន្លោះពី 5000-6000 ដុល្លារក្នុង1ម៉ែត្រការ៉េ ហើយចាប់ពីម្ដុំពេទ្យរហូតដល់ម្ដុំស្តុបបូគោ អាចមានចន្លោះ4000 ទៅ5000ដុល្លារ។

ដោយឡែកចាប់ពីចំណុចស្តុប​បូគោរហូតដល់ចំណុចក្បាលថ្នល់ អាចនៅចន្លោះប្រមាណ3000 ទៅ4000ដុល្លារតែប៉ុណ្ណោះ។

​យ៉ាងណាក៏ដោយ លោកក៏បានបញ្ជាក់ផងដែរថា តម្លៃដីខាងលើនេះ អាចមានទីតាំងមួយចំនួនតូចខ្ពស់ជាងនេះបន្តិចទៀត ដែលវាក៏អាស្រ័យលើការចង់បានរបស់អ្នកវិនិយោគ ឬអ្នកដែលមានតម្រូវការខ្ពស់ក្នុងតំបន់ ដែលពួកគេចង់បាន៕

ប្រភព : www.propertyarea.asia