ភ្នំពេញ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែន នគរូបនីយកម្ម និងសំណង់ បានព្យាករណ៍ថា សម្រាប់រយៈពេល១៥ឆ្នាំ ពោលគឺចាប់ពីឆ្នាំ២០១៥រហូតឆ្នាំ ២០៣០ តម្រូវការលំនៅដ្ឋាននៅទូទាំងប្រទេសនឹងមានចំនួនប្រមាណ ១លានខ្នងបន្ថែមទៀត។
លោកបានមានប្រសាសន៍ក្នុងពិធីបើកសម្ភោធដាក់ឲ្យដំណើរការមជ្ឈមណ្ឌលលក់សម្ភារៈសំណង់ និងសម្ភារៈសម្រាប់ប្រើប្រាស់តាមលំនៅដ្ឋាន Global House ដែលវិនិយោគដោយក្រុមហ៊ុនលីយ៉ុងផាត់ គ្រុបកាលពីចុងសប្តាហ៍មុនបន្តថា “តម្រូវការលំនៅដ្ឋានដ៏ច្រើននេះ ដើម្បីឆ្លើយតបទៅនឹងការកើនឡើងរបស់ប្រជាពលរដ្ឋ ក្នុងនោះសម្រាប់តំបន់រាជធានី ក្រុង និងទីប្រជុំជនមានតម្រូវការប្រមាណ៨០ម៉ឺនលំនៅដ្ឋាន ហើយបើគិតជាមធ្យមមានតម្រូវការប្រមាណ ៥ម៉ឺនលំនៅឋានក្នុងមួយឆ្នាំ។
លោកបន្តថា បច្ចុប្បន្ននេះកម្ពុជាមានទីក្រុងរណប បុរីលំនៅឋាន និងលំនៅឋានមានលក្ខណៈជាបុរីចំនួន២៣០ទីតាំង និងមានសំណង់អគារខ្ពស់ចាប់ពី ៥ជាន់ឡើងទៅចំនួន ១,១០០អគារ។
លោកឧកញ៉ាលី ហួរប្រធានសមាគមអ្នកសាងសង់លំនៅដ្ឋានបានយល់ស្របនឹងការលើកឡើងខាងលើ ដោយលោកបានមានប្រសាសន៍ថា ទីផ្សារលំនៅដ្ឋាននៅតែមានភាពល្អប្រសើរ ដោយសារការរីកចម្រើនសេដ្ឋកិច្ច និងប្រាក់ចំណូលរបស់ប្រជាពលរដ្ឋ ហេតុនេះហើយ ទើបអ្នកអភិវឌ្ឈន៍ដែលជាសមាជិកសមាគម បានពង្រីកការវិនិយោគរបស់ពួកគេដល់តាមបណ្តាខេត្ត បន្ថែមលើគំរោងអភិវឌ្ឍន៍នៅរាជធានីភ្នំពេញ។
លោកបន្តថា “ការរីកចម្រើនក្នុងវិស័យនេះ នឹងបន្តរីកចម្រើនរយៈពេលវែងបន្តទៀតដរាបណា ប្រទេសនេះនៅតែមានសន្តិភាព ស្ថិរភាពនយោបាយ និងកំនើនសេដ្ឋកិច្ចដ៏ល្អប្រសើរបែបនេះ”៕
ប្រភព : www.propertyarea.asia
