ភ្នំពេញ៖ ការមន្ត្រីជាន់ខ្ពស់ក្រសួងសាធារណៈការ និងដឹកជញ្ជូនបានឲ្យដឹងថា កម្ពុជានឹងបង្កើនល្បឿនឱ្យបានលឿនបន្ថែមទៀត ដោយអាចរត់បានចន្លោះពី៨០ទៅ១០០គីឡូម៉ែត្រក្នុងមួយម៉ោង ឱ្យដូចទៅនឹងប្រទេសជិតខាង។
អនុរដ្ឋលេខាធិការ ក្រសួងសាធារណការ និងដឹកជញ្ជូនលោក លី បូរិន បានមានប្រសាសន៍ឲ្យដឹងនាថ្ងៃទី១១ តុលាកន្លងមកថា បច្ចុប្បន្ន ខ្សែរថភ្លើងត្រូវបានតភ្ជាប់ឡើងវិញហើយ តាមរយៈថវិកា ADB និងថវិការាជរដ្ឋាភិបាល រួមទាំងក្រុមហ៊ុន Royal Railway តែមិនទាន់មានល្បឿនលឿននៅឡើយទេ គឺត្រឹមតែ៣០ទៅ៦០គីឡូម៉ែត្រប៉ុណ្ណោះ ក្នុង១ម៉ោង ប៉ុន្តែទៅថ្ងៃខាងមុខ ឆាប់ៗនេះរថភ្លើងនឹងអាចរត់បានល្បឿនលឿន ដូចប្រទេសជិតខាងដែរគឺពី៨០ទៅ១០០ គីឡូម៉ែត្រ ក្នុង១ម៉ោង។
លោកបន្តថា កំឡុងពេលបុណ្យភ្ជុំបិណ្ឌ ខ្សែរត់ទាំងបីខ្សែ ដែលត្រូវបានអនុញ្ញាតឱ្យពលរដ្ឋ ជិះទៅមកដោយមិនគិតថ្លៃនោះ គឺពុំមានអ្នកជិះច្រើនកុះករទេ ដោយសារតែទន្ទឹមគ្នានោះ ក៏មានរថយន្តជិះដោយ មិនគិតថ្លៃ ចំនួនជាង២០០គ្រឿងដែរ។
លោកលី បូរិន បានអំពាវនាវ ឱ្យប្រជាពលរដ្ឋ គាំទ្របន្តទៅទៀត និងមានទំនុកចិត្តខ្ពស់ ព្រោះរាជរដ្ឋាភិបាល កំពុងខិតខំកែលម្អ នូវគ្រប់ខ្សែរថភ្លើងទាំងអស់ ឱ្យ កាន់តែប្រសើរឡើង និងមានល្បឿនលឿនជាងមុន ហើយធ្វើឲ្យបានក្នុងពេលឆាប់ៗនេះ។
ទោះជាយ៉ាងណាមន្ត្រីជំនាញក្រសួងនេះបានឲ្យដឹងថា រថភ្លើងកម្ពុជាមិនអាចរត់បានល្បឿនលឿននោះទេ ដោយសារផ្លូវរថភ្លើងកម្ពុជាមិនទាន់មានស្តង់ដា ស្របតាមស្តង់ដាអន្តរជាតិ ពិសេសផ្លូវរថភ្លើងមានចំណុចឆ្លងកាត់ច្រើន ដែលធ្វើឲ្យរថភ្លើងមិនអាចរត់បានលឿននៅឡើយ៕
ប្រភព : Property area
