ភ្នំពេញ៖ មន្ត្រីជំនាញក្រសួងសាធារណៈការនិងដឹកជញ្ជូនបានថ្លែងឲ្យដឹងជាថ្មីថា គំរោងសាងសង់ផ្លូវល្បឿនលឿនភ្នំពេញ ក្រុងព្រះសីហនុនឹងចាប់ផ្តើមនៅកំឡុងខែវិច្ឆិកាខាងមុខនេះ មិនមានការប្រែប្រួលនោះទេ។
លោក វ៉ា ស៊ីមសូរិយា អ្នកនាំពាក្យក្រសួងសាធារណៈការ និងដឹកជញ្ជូនបានថ្លែងឲ្យដឹងតាមទូរស័ព្ទកាលពីថ្ងៃទី១ តុលាកន្លងមកថា គំរោងសាងសង់ផ្លូវល្បឿនលឿន នឹងចាប់ផ្តើមចេញពីតំបន់ទំនប់កប់ស្រូវ ដែលស្ថិតនៅផ្នែកខាងស្តាំផ្លូវជាតិលេខ៤ និងរត់ស្របតាមផ្លូវជាតិនេះប្រវែងប្រមាណ៣០គីឡូម៉ែត្រ មុនពេលផ្លូវនេះបែកទៅខាងឆ្វេងផ្លូវជាតិនេះ រហូតជិតដល់ក្រុងព្រះសីហនុ ទើបផ្លូវនេះងាកមកខាងស្តាំដៃនៃផ្លូវជាតិលេខ៤វិញ។
លោកបន្តថា “គំរោងសាងសង់ផ្លូវល្បឿនលឿននេះ នឹងមានផ្លូវរត់បួនខ្សែសម្រាប់រថយន្ត ដោយមានពីរគន្លងសងខាង និងមានសួនច្បារពុះចំកណ្តាលផ្លូវ។ ផ្លូវនេះនឹងមានការសាងសង់របង ដើម្បីការពារសត្វពាហនៈឆ្លងកាត់ និងមិនមានចំណុចឆ្លងកាត់ច្រើននោះទេ។លោកបន្តថា “ផ្លូវនេះមានប្រវែងប្រមាណ១៩០គីឡូម៉ែត្រពីរាជធានីភ្នំពេញ និងអាចអនុញ្ញាត្តឲ្យរថយន្តអាចបើកបរក្នុងល្បឿនលឿនបាន ព្រោះវានឹងត្រូវកសាងមានលក្ខណៈពិសេស។
យោងតាមឯកសារដែល Propertyarea.asia ទទួលបាន នៅក្នុងពិធីចុះហត្ថលេខារវាងលោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណៈការ និងដឹកជញ្ជូនជាមួយលោក Liu Gitao ប្រធានក្រុមហ៊ុនសំណង់គមនាគមន៍ចិន ក្នុងកំឡុងដំណើរទស្សនកិច្ចរបស់នាយករដ្ឋមន្ត្រីចិន លោកលី ខឺឈាងមកកម្ពុជាកាលពីឆ្នាំមុនបានបង្ហាញថា ផ្លូវល្បឿនលឿននេះ មានប្រវែង ១៩០,៦៣គីឡូម៉ែត្រ និងមានទទឹងផ្លូវទំហំ២៤ម៉ែត្រ និងធ្វើឡើងក្រោមរូបភាព BOT។
លោក វ៉ា ស៊ីមសូរិយា បានបន្តឲ្យដឹងថា ការសាងសង់ផ្លូវល្បឿនលឿននេះ នឹងមានទីតាំងចំណុចឆ្លងកាត់ប្រមាណ១០កន្លែង ជាផ្លូវដែលលោកគិតថានឹងជួយដល់សេដ្ឋកិច្ចជាតិ ព្រមទាំងកាត់បន្ថយគ្រោះថ្នាក់ចរាចរណ៍ និងធ្វើឲ្យតម្លៃនៃការដឹកជញ្ជូនរបស់កម្ពុជាធ្លាក់ចុះផងដែរ។លោកបន្តថា តាមគំរោងការសាងសង់ផ្លូវនេះ គ្រោងចំណាយរយៈពេល៤ឆ្នាំ ទើបបញ្ចប់ការសាងសង់ ហេតុនេះ យើងរំពឹងថា ការសាងសង់នឹងអាចធ្វើឡើងឆាប់ៗនេះ។
ទោះជាយ៉ាងណាលោកទេសរដ្ឋមន្ត្រី ស៊ុន ចាន់ថុល បានឲ្យដឹងកាលពីពេលថ្មីៗនេះថា ការដោះស្រាយផលប៉ះពាល់ នៃគំរោងផ្លូវល្បឿនលឿននេះបានបញ្ចប់រួចហើយ។
ក្រោយការសាងសង់ផ្លូវល្បឿនលឿននេះបញ្ចប់ ផ្លូវនេះនឹងជួយសម្រួលការធ្វើដំណើរទៅខេត្តព្រះសីហនុកាន់តែខ្លី ជួយសម្រួលដល់ការដឹកជញ្ជូនទំនិញ ធ្វើឲ្យសេដ្ឋកិច្ចជាតិ មានការរីកចម្រើនកាន់តែល្អប្រសើរថែមទៀត។
រដ្ឋាភិបាលបានដាក់ខេត្តព្រះសីហនុទាំងមូល ជាតំបន់ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥ ២០១៥ ដែលជាគោលនយោបាយមួយត្រូវបានអនុម័ត និងដាក់ឲ្យប្រើប្រាស់ជាផ្លូវការនៅខែតុលា ឆ្នាំ២០១៦កន្លងមកនេះ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា បញ្ហាប្រឈមក្នុងសេដ្ឋកិច្ចរបស់យើង គឺការដឹកជញ្ជូនមានតម្លៃថ្លៃ ដោយសារកង្វះហេដ្ឋារចនាសម្ព័ន្ឋ ដែលរដ្ឋាភិបាលបាននិងកំពុងគិតគូវិនិយោគ ប៉ុន្តែការសាងសង់អ្វីមួយ វាមិនចំណាយពេលមួយថ្ងៃឬមួយឆ្នាំទេ ហេតុនេះរដ្ឋាភិបាលគួរពន្លឿនការវិនិយោគលើផ្លូវល្បឿនលឿន និងហេដ្ឋារចនាសម្ព័ន្ឋដទៃទៀត។
លោកបន្តថា “ការសាងសង់ផ្លូវល្បឿនលឿន ឬហេដ្ឋារចនាសម្ព័ន្ឋនានា ជាការបង្កើនកំណើនសេដ្ឋកិច្ចជាតិ ព្រោះបើចង់ជំរុញកំនើនសេដ្ឋកិច្ចជាតិ ត្រូវតែវិនិយោគលើហេដ្ឋារចនាសម្ព័ន្ឋ”៕
ប្រភព : Property area
