ភ្នំពេញ៖ កម្ពុជាបានស្វាគមន៍ចំពោះកិច្ចព្រមព្រៀងដែលសម្រេចបានរវាងសហរដ្ឋអាម៉េរិក និងសាធារណរដ្ឋអ៊ីស្លាមអ៊ីរ៉ង់ ក្នុងគោលបំណងពង្រឹងបទឈប់បាញ់ កាត់បន្ថយភាពតានតឹង និងបើកច្រកសមុទ្រ Hormuz ឡើងវិញ។ នេះបើយោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ចេញផ្សាយនៅថ្ងៃទី១៩ ខែមិថុនា ឆ្នាំ២០២៦។
តាមសេចក្តីថ្លែងការណ៍ កម្ពុជាបានបញ្ជាក់ជាថ្មីនូវជំហរគាំទ្រការដោះស្រាយជម្លោះដោយសន្តិវិធី តាមរយៈការសន្ទនាការទូត និងការគោរពគ្នាទៅវិញទៅមក។ កម្ពុជាក៏បានកោតសរសើរចំពោះកិច្ចខិតខំប្រឹងប្រែងរបស់ភាគីពាក់ព័ន្ធដែលបានជួយសម្របសម្រួលឱ្យមានកិច្ចព្រមព្រៀងនេះ និងសង្ឃឹមថា កិច្ចព្រមព្រៀងនឹងត្រូវបានអនុវត្តដោយសុចរិត និងនាំទៅរកសន្តិភាពយូរអង្វែង និងប្រកបដោយចីរភាព។
សេចក្តីថ្លែងការណ៍បានគូសបញ្ជាក់ថា សន្តិភាព ស្ថិរភាព និងសេរីភាពនៃការធ្វើនាវាចរណ៍នៅតំបន់មជ្ឈិមបូព៌ា មានសារៈសំខាន់ចំពោះសន្តិសុខតំបន់ និងសកល កំណើនសេដ្ឋកិច្ច ពាណិជ្ជកម្មអន្តរជាតិ និងវិបុលភាពរួម។ ការបើកច្រកសមុទ្រ Hormuz ឡើងវិញ នឹងជួយស្តារទំនុកចិត្តលើខ្សែសង្វាក់ផ្គត់ផ្គង់សកល និងរួមចំណែកដល់ស្ថិរភាពទីផ្សារថាមពលអន្តរជាតិ។
គួរបញ្ជាក់ថា ការស្វាគមន៍របស់កម្ពុជា ធ្វើឡើងបន្ទាប់ពីសហរដ្ឋអាម៉េរិក និងសាធារណរដ្ឋអ៊ីស្លាមអ៊ីរ៉ង់ បានឈានដល់កិច្ចព្រមព្រៀងមួយ ដើម្បីបន្ធូរបន្ថយភាពតានតឹងនៅតំបន់មជ្ឈិមបូព៌ា ក្រោយពីមានការប្រឈមមុខដាក់គ្នា និងការវាយប្រហារទៅវិញទៅមក ដែលបានបង្កការព្រួយបារម្ភពីសហគមន៍អន្តរជាតិ ចំពោះសន្តិសុខក្នុងតំបន់ និងការរំខានដល់ការដឹកជញ្ជូនថាមពល និងពាណិជ្ជកម្មសកល តាមច្រកសមុទ្រ Hormuz។
កម្ពុជាក៏បានលើកទឹកចិត្តឱ្យគ្រប់ភាគីបន្តកសាងលើសន្ទុះវិជ្ជមាននេះ តាមរយៈការសន្ទនា និងកិច្ចសហការប្រកបដោយស្ថាបនភាព ដើម្បីជំរុញសន្តិភាព និងស្ថិរភាពយូរអង្វែងនៅតំបន់មជ្ឈិមបូព៌ា និងលើសពីនេះទៅទៀត៕
ដោយ៖khmerhome
