ភ្នំពេញ៖ ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា បានបង្ហាញក្តីរំពឹងថា ការនាំចេញអង្កររបស់កម្ពុជាទៅកាន់ប្រទេសហ្វីលីពីន នឹងបន្តកើនឡើងដល់ជាង ១០ម៉ឺនតោននៅចុងឆ្នាំ២០២៦នេះ ខណៈក្នុងរយៈពេល ៥ខែដំបូងនៃឆ្នាំនេះ ទីផ្សារហ្វីលីពីនបាននាំចូលអង្ករកម្ពុជាប្រមាណពី ៦ម៉ឺន ទៅ ៧ម៉ឺនតោនរួចហើយ ដែលបង្ហាញពីកំណើនគួរឱ្យកត់សម្គាល់។
ឧកញ៉ា ឡាយ ឈុនហួ បានអះអាងថា ការនាំចេញអង្ករកម្ពុជាទៅកាន់ហ្វីលីពីនត្រូវបានរំពឹងថានឹងបន្តកើនឡើងខ្លាំង ដោយសារប្រទេសនេះកំពុងបង្កើនការស្តុកបម្រុងស្បៀង និងមានតម្រូវការនាំចូលអង្ករខ្ពស់។ ជាមួយគ្នានេះ ទីផ្សារហ្វីលីពីនក៏បានក្លាយជាទិសដៅនាំចេញដ៏សំខាន់មួយរបស់កម្ពុជា ក្នុងចំណោមទីផ្សារអាស៊ានផ្សេងៗទៀតផងដែរ។
ឧកញ៉ាបានបញ្ជាក់ថា សហព័ន្ធស្រូវអង្ករកម្ពុជា កំពុងខិតខំពង្រីកទីផ្សារនាំចេញអង្ករទៅកាន់ប្រទេសហ្វីលីពីនបន្ថែមទៀត ដើម្បីសម្រេចគោលដៅនាំចេញលើស ១០ម៉ឺនតោននៅឆ្នាំ២០២៦។ ឧកញ៉ាបន្តថា កំណើននៃការនាំចេញនេះ បានឆ្លុះបញ្ចាំងពីជោគជ័យនៃយុទ្ធសាស្ត្រពិពិធកម្មទីផ្សារ និងការទទួលស្គាល់គុណភាពអង្ករកម្ពុជានៅលើទីផ្សារអន្តរជាតិ ដោយសារអង្ករប្រណិតកម្ពុជា ពូជផ្ការំដួល ក្រោមម៉ាក «ម្លិះអង្គរ» បានឈ្នះពានរង្វាន់ «អង្ករល្អប្រណិតលើពិភពលោក» ក្នុងកម្មវិធី World Rice Conference ដោយកម្ពុជាបានទទួលជ័យលាភីលេខ១ នេះ សរុបចំនួន ៧លើករួចមកហើយ។
ជាមួយគ្នានេះ ហ្វីលីពីន គឺជាប្រទេសនាំចូលអង្ករដ៏ធំបំផុតមួយរបស់ពិភពលោក ដោយអ្នកផ្គត់ផ្គង់សំខាន់ៗរួមមាន វៀតណាម ថៃ ឥណ្ឌា មីយ៉ាន់ម៉ា កម្ពុជា និងប៉ាគីស្ថាន។ ក្នុងរយៈពេល ៣ខែដំបូងនៃឆ្នាំ២០២៦ ប្រទេសនេះបាននាំចូលអង្ករប្រមាណ ២,១២លានតោន។ យោងតាម S&P Global Energy CERA បានឱ្យដឹងថា ហ្វីលីពីនត្រូវបានព្យាករថានឹងនាំចូលអង្ករចំនួន ៥,៦លានតោន ក្នុងឆ្នាំទីផ្សារ ២០២៦-២០២៧ ចាប់ពីខែកក្កដា ដល់ខែមិថុនា កើនឡើងប្រមាណ ៦០% ធៀបនឹងឆ្នាំមុន។ កំណើននេះកើតឡើងចំពេលមានហានិភ័យចំពោះការផលិតស្រូវក្នុងស្រុក ដោយសារថ្លៃជីកសិកម្មខ្ពស់ និងផលប៉ះពាល់ពីបាតុភូតអែលនីញ៉ូ។
ក្រសួងកសិកម្មហ្វីលីពីន បានព្យាករថា ទិន្នផលស្រូវរបស់ប្រទេសនេះនៅឆ្នាំ២០២៦ អាចធ្លាក់ចុះពី ២០,២៨លានតោន មកនៅត្រឹម ១៩,៨៧លានតោន ដោយសារវិបត្តិនៅមជ្ឈិមបូព៌ា និងបញ្ហាគ្រោះរាំងស្ងួត។សូមបញ្ជាក់ថា យោងតាមទិន្នន័យរបស់សហព័ន្ធស្រូវអង្ករកម្ពុជា ក្នុងរយៈពេល ៥ខែដំបូង ឆ្នាំ២០២៦ កម្ពុជា បាននាំចេញអង្ករជាង ៥៦ម៉ឺនតោន មានតម្លៃសរុបជាង ៣២៧លានដុល្លារអាម៉េរិក។ ទន្ទឹមនឹងនេះ កម្ពុជា ក៏បាននាំចេញស្រូវប្រមាណ ២,៧៥លានតោន ដែលមានតម្លៃជាង ៥៩១លានដុល្លារអាម៉េរិកផងដែរ៕
ដោយ៖khmerhome
