ភ្នំពេញ៖ ការនាំចេញគ្រាប់ស្វាយចន្ទីឆៅរបស់កម្ពុជា បានបង្ហាញពីភាពរឹងមាំនៅបួនខែនៃឆ្នាំ២០២៦ ដោយបានកើនឡើង ២៤% បើធៀបនឹងរយៈពេលដូចគ្នាកាលពីឆ្នាំ២០២៥ លទ្ធផលនេះផ្ទុយស្រឡះពីការព្រួយបារម្ភកាលពីដើមឆ្នាំ អំពីផលប៉ះពាល់អវិជ្ជមាននៃការប្រែប្រួលអាកាសធាតុមកលើទិន្នផលចន្ទី។

កំណើននេះ​កើត​ឡើងចំពេលមានលក្ខខណ្ឌអាកាសធាតុប្រឈម រួមមាន អាកាសធាតុត្រជាក់អូសបន្លាយ ភ្លៀងកក់ខែ និងកម្ដៅខ្លាំងលើសពី ៤០អង្សាសេ ដែលដំបូងឡើយបានបង្ករឱ្យមានការភ័យខ្លាចក្នុងចំណោមអ្នកជំនាញឧស្សាហកម្ម អំពីការធ្លាក់ចុះនៃទិន្នផល និងគុណភាព។

ការគាំទ្រពីរដ្ឋាភិបាល និងវិស័យកសិឧស្សាហកម្ម រុញច្រានឱ្យមានកំណើនការកើនឡើងនៃការ​នាំចេញនេះ ត្រូវបានមើលឃើញថា ភាគច្រើនដោយសារវិធានការសកម្មរបស់ក្រសួងកសិកម្ម រុក្ខាប្រមាញ់ និងនេសាទ ដែលបានដាក់ពង្រាយមន្ត្រីកសិកម្មឃុំ ដើម្បីជួយកសិករដោយផ្ទាល់។ មន្ត្រីទាំងនេះបានដើរតួនាទីយ៉ាងសំខាន់ក្នុងការជួយកសិករវាយតម្លៃហានិភ័យ និងបន្ស៊ាំខ្លួនទៅនឹងការប្រែប្រួលអាកាសធាតុ តាមរយៈការគាំទ្រផ្ទាល់នៅតាមកសិដ្ឋាន។

ទន្ទឹមនឹងនេះ សមាគមស្វាយចន្ទីកម្ពុជា (សសក) បានពង្រឹងកិច្ចខិតខំប្រឹងប្រែងចុះជួយកសិករឱ្យកាន់តែខ្លាំងក្លា។ ក្នុងអំឡុងរដូវប្រមូលផលដើមឆ្នាំ២០២៥ និង ២០២៦ សសក បានរៀបចំវគ្គបណ្តុះបណ្តាល ស្តីពីការបន្ស៊ាំនឹងការប្រែប្រួលអាកាសធាតុចំនួន ៤០ វគ្គ ដោយមានកសិករចូលរួមប្រមាណ ៨,៤០០ នាក់នៅទូទាំងប្រទេស។ គំនិតផ្តួចផ្តើមទាំងនេះគឺជាឧបករណ៍ដ៏សំខាន់ ក្នុងការបំពាក់បំប៉នកសិករនូវចំណេះដឹងជាក់ស្តែង ដើម្បីសម្របខ្លួនទៅនឹងស្ថានភាពអាកាសធាតុដែលកាន់តែពិបាកទាយទុកជាមុន។

ប្រឈមមុខនឹងសម្ពាធបរិស្ថាន កសិករជាច្រើនបានងាកមកប្រើប្រាស់ដំណោះស្រាយ ដែលមានប្រសិទ្ធភាពកាត់បន្ថយថ្លៃដើមផលិត និងប្រកបដោយនិរន្តរភាព។ ជាពិសេស ការទទួលយកការប្រើប្រាស់ធាតុចូលសរីរាង្គតាមរយៈស្លឹក ដូចជា HEM និង IMOBs ​ដែលកសិករអាចផលិតដោយខ្លួនឯង បានជួយកាត់បន្ថយថ្លៃដើមផលិតកម្ម ព្រមទាំងជួយបង្កើនសុខភាពដី និងភាពធន់នៃដំណាំ។ ការអនុវត្តបែបបន្ស៊ាំទាំងនេះ បានអនុញ្ញាតឱ្យកសិកររក្សាផលិតភាព ទោះបីជាមានកត្តាអាកាសធាតុអាក្រក់ក៏ដោយ ដែលរួមចំណែកយ៉ាងសំខាន់ដល់កំណើននៃការនាំចេញសរុបរបស់វិស័យនេះ។

យោងតាមទិន្នន័យនាំចេញក្រៅផ្លូវការ កម្ពុជាបាននាំចេញគ្រាប់ស្វាយចន្ទីឆៅសរុបចំនួន ៨៣១,១៧៩ តោន ទៅកាន់ប្រទេសវៀតណាម ក្នុងរយៈពេល ៤ ខែដំបូងនៃឆ្នាំ ២០២៦ ដោយបង្កើតចំណូលបានប្រមាណ ១,៤៤ ពាន់លានដុល្លារ ដែលកើនឡើង ២៤.១៧% ធៀបនឹងឆ្នាំមុន។

ទោះបីជាមានការចាប់ផ្ដើមដ៏ល្អក្នុងឆ្នាំនេះក៏ដោយ លោក អួន ស៊ីឡុត ប្រធានសមាគមស្វាយចន្ទីកម្ពុជា បានដាស់តឿនឱ្យមានការប្រុងប្រយ័ត្នចំពោះការបកស្រាយលទ្ធផលទាំងនេះ។ លោកបានកត់សម្គាល់ថា ទោះបីជា​សកម្មភាពក្នុងត្រីមាសទីមួយមានភាពគួរឱ្យលើកទឹកចិត្តក៏ដោយ ប៉ុន្តែវានៅលឿនពេកក្នុងការកំណត់ថា តើនិន្នាការកើនឡើងនេះនឹងបន្តពេញមួយឆ្នាំឬយ៉ាងណា ជាពិសេសដោយសារភាពមិនច្បាស់លាស់នៃអាកាសធាតុដែលកំពុងបន្តកើតមាន។

ជោគជ័យដំបូងនៃវិស័យស្វាយចន្ទីកម្ពុជា បានបង្ហាញឱ្យឃើញពីសារៈសំខាន់នៃកិច្ចខិតខំប្រឹងប្រែងសម្របសម្រួលគ្នារវាងស្ថាប័នរដ្ឋាភិបាល សមាគមក្នុងវិស័យឧស្សាហកម្មនេះ និងកសិករ។ ខណៈដែលបញ្ហាប្រឈមនៃអាកាសធាតុនៅតែបន្តកើតមាន ការវិនិយោគប្រកបដោយនិរន្តរភាពលើយុទ្ធសាស្ត្របន្ស៊ាំ និងការគាំទ្រដល់កសិករ នឹងក្លាយជាកត្តាសំខាន់បំផុតដើម្បីរក្សាកំណើន និងធានានូវភាពធន់រយៈពេលវែងនៅក្នុងវិស័យនេះ៕

ដោយ៖khmerhome