ភ្នំពេញ៖ រាជដ្ឋាភិបាលបានបង្កើន​ការអនុម័តគម្រោងបង្កើតតំបន់សេដ្ឋកិច្ចពិសេស កើនឡើងគួរកត់​សសម្គាល់​​ផងដែរ ដោយក្នុងរយៈ​ពេលជាង ២ឆ្នាំនេះ តំបន់សេដ្ឋកិច្ចពិសេសបានបង្កើតមានចំនួន ២០តំបន់ ខណៈបច្ចុប្បន្នមន្រ្តី​ជំនាញ​កំពុងសិក្សានៅ​តាមបណ្តា​ខេត្តនានា ដើម្បីជំរុញបង្កើតតំបន់សេដ្ឋកិច្ច ពិសេសឱ្យឆ្លើយតបទៅនិង​តម្រូវការវិនិយោគនានា​របស់វិស័យឯកជន។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ក្រុមប្រឹក្សាអភិវឌ្ឍន៍កម្ពុជា លើកឡើង​នៅក្នុង​វេទិកាវិនិយោគកម្ពុជាឆ្នាំ២០២៦ នៅចុងសប្តាហ៍កន្លងមកថា នៅក្នុងរយៈពេលជាង ២ឆ្នាំចុង​ក្រោយនេះ កំណើនវិនិយោគនៅក្នុងតំបន់សេដ្ឋកិច្ចពិសេស បានកើនឡើងយ៉ាងគំហុក ស្របពេលរាជ​រដ្ឋាភិបាលបានអនុម័តបង្កើតតំបន់សេដ្ឋកិច្ចពិសេសកើនឡើងជាបន្តបន្ទាប់ ដើម្បីឆ្លើយតបនិង​តម្រូវការវិនិយោគទាំងក្នុងនិងក្រៅប្រទេស។

ឯកឧត្តម ជា វុទ្ធី បានបន្តថា នៅក្នុងរយៈពេលជាង ២ឆ្នាំចុងក្រោយនេះ មានកំណើនវិនិយោគនៅក្នុងតំបន់ សេដ្ឋកិច្ចពិសេសបានកើនឡើងយ៉ាងគំហុក ជាក់ស្តែងនៅឆ្នាំ២០២៣ ការវិនិយោគនៅក្នុងតំបន់សេដ្ឋកិច្ចពិសេសមានចំនួន ៧១គម្រោង, ឆ្នាំ២០២៤ មាន ១៥០គម្រោង និងនៅឆ្នាំ២០២៥ កើនដល់ ២៤៣គម្រោង។

ឯកឧត្តម ជា វុទ្ធី គូសបញ្ជាក់ថា គម្រោងវិនិយោគ​ដែលកម្ពុជា​ទទួល​បានមានកំណើនកើនឡើងគួរកត់សម្គាល់ ជាក់ស្តែងនៅឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័ត​គម្រោងវិនិយោគមាន ៦៣០គម្រោង ក្នុងទុនវិនិយោគសរុបប្រមាណ ១០ប៊ីលានដុល្លារអាមេរិក ខណៈនៅ​ក្នុងរយៈ ៤ខែដំបូង ក្នុងឆ្នាំ២០២៦នេះ អនុម័តបានមានចំនួន ១៨៧ គម្រោង មានទុនវិនិយោគជាង ២,៦ពាន់លានដុល្លារអាមេរិក បើធៀបរយៈពេលដូចគ្នានិងឆ្នាំមុន គឺមានការថយចុះ ក៏ប៉ុន្តែមានកំណើន​នៃការវិនិយោគនៅតាមបណ្តាខេត្តមានចំនួនច្រើនជាងមុន។

ឯកឧត្តម ជា វុទ្ធី បន្ថែមទៀតថា នៅក្នុងចំណោមទាំង ៦២គម្រោងនេះ មានចំនួន ៣៥ គម្រោងកំពុងដំណើរការ ហើយមួយចំនួនកំពុងធ្វើការសាងសង់ និងមានប្រមាណជាង ១០ ក្រុមហ៊ុន ដែលវិនិយោគបង្កើតតំបន់សេដ្ឋកិច្ចពិសេស នៅក្នុងរយៈពេលជាង ១០ ទៅ ២០ឆ្នាំ មកនេះ អត់ដំណើរនោះឡើយជាកម្មវត្ថុ ដែលក្រុមប្រឹក្សាអភិវឌ្ឍន៍កម្ពុជា នឹងជំរុញឱ្យពួកគេត្រូវតែធ្វើការអភិវឌ្ឍបន្ថែមទៀត ឬមួយក៏ត្រូវលុបចោលវិញបើសិនជាមិនធ្វើការអភិវឌ្ឍ ខណៈដែលគិតមកដល់ពេលនេះ តំបន់សេដ្ឋពិសេសដែលអនុម័តមានចំនួន ៦២ គម្រោង ក្រោមអនុក្រិត្យរបស់រាជរដ្ឋាភិបាល៕

ដោយ៖khmerhome