ភ្នំពេញ៖ សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ហៅកាត់ថា សារមន្ទីរ ស.ស.រ) និងសមាគមធនាគារនៅកម្ពុជា (ABC) បានបន្តអនុស្សរណៈនៃការយោគយល់គ្នា (MoU) ដើម្បីបន្តភាពជាដៃគូប្រកបដោយជោគជ័យ ក្នុងការលើកកម្ពស់អក្ខរកម្មសេដ្ឋកិច្ច ក្នុងចំណោមយុវជនកម្ពុជា។
ពិធីចុះហត្ថលេខានេះបានប្រព្រឹត្តិទៅនៅថ្ងៃទី១២ ខែឧសភា ឆ្នាំ២០២៦ នៅសារមន្ទីរ ស.ស.រ ក្រោមអធិបតីភាព ឯកឧត្តម យឹម លាត ទេសាភិបាលរង ធនាគារជាតិនៃកម្ពុជា តំណាងដ៏ខ្ពង់ខ្ពស់លោកជំទាវ បណ្ឌិត ជា សិរី ទេសាភិបាល ធនាគារជាតិនៃកម្ពុជា។
ផ្អែកលើសមិទ្ធផលដែលទទួលបានក្នុងរយៈពេលពីរឆ្នាំកន្លងមក ការបន្តចុះអនុស្សរណៈនៃការយោគយល់គ្នាស្តីអំពី «កម្មវិធីវិស័យធនាគារសម្រាប់អក្ខរកម្មសេដ្ឋកិច្ច» បញ្ជាក់សាជាថ្មីពីការប្តេជ្ញាចិត្តយ៉ាងមុតមាំរបស់វិស័យធនាគារ ក្នុងការលើកកម្ពស់ការអប់រំសេដ្ឋកិច្ច។ គំនិតផ្តួចផ្តើមនេះបង្កើនលទ្ធភាពឱ្យសិស្សានុសិស្សមកពីគ្រឹះស្ថានអប់រំរដ្ឋអាចមកទស្សនាសារមន្ទីរ ស.ស.រ របស់ធនាគារជាតិនៃកម្ពុជា បានកាន់តែច្រើន ដោយមានជំនួយពីដៃគូធនាគារ និងគ្រឹះស្ថានហិរញ្ញវត្ថុសំខាន់ៗ ដើម្បីលើកកម្ពស់ការយល់ដឹងបន្ថែមអំពីប្រវត្តិសាស្ត្រសេដ្ឋកិច្ចនិងរូបិយវត្ថុជាតិ។
មកទល់បច្ចុប្បន្ន តាមរយៈគំនិតផ្តួចផ្តើមនេះ ធនាគារឯកជនកម្ពុជាបានរួមចំណែកក្នុងមូលនិធិសម្រាប់ចំណាយលើថ្លៃដឹកជញ្ជូននិងថ្លៃទស្សនា និងបានផ្តល់ឱកាសដល់សិស្សានុសិស្សប្រមាណ ១៥,០០០នាក់ ដែលមកពីគ្រឹះស្ថានអប់រំរដ្ឋក្នុងរាជធានីភ្នំពេញ ពីតំបន់ជាយរាជធានីភ្នំពេញ និងពីខេត្តកំពង់ធំ រតនគិរី ស្ទឹងត្រែង ក្រចេះ និងកំពង់ចាម អាចមកទស្សនាសារមន្ទីរ ស.ស.រ។ ឱកាសអប់រំដ៏មានតម្លៃនេះ បានជួយពង្រីកទស្សនវិស័យផ្នែកវប្បធម៌របស់សិស្សានុសិស្ស ស្របពេលដែលពួកគេទទួលបានចំណេះដឹងកាន់តែស៊ីជម្រៅអំពីប្រវត្តិសាស្ត្ររូបិយវត្ថុ និងសេដ្ឋកិច្ចជាតិ។
លោក រ័ត្ន សោភ័ណ ប្រធានសមាគមធនាគារនៅកម្ពុជា បានមានប្រសាសន៍ថា ការបន្តចុះអនុស្សរណៈនៃការយោគយល់គ្នានេះ ធ្វើឡើងផ្អែកលើលទ្ធផលប្រកបដោយផ្លែផ្កាដែលយើងសម្រេចបាន ក្នុងរយៈពេលពីរឆ្នាំកន្លងមក និងស្របតាមគោលការណ៍ហិរញ្ញវត្ថុប្រកបដោយនិរន្តរភាពរបស់សមាគមធនាគារនៅកម្ពុជា (CSFPs) ក្នុងការកសាងសមត្ថភាព និងលើកកម្ពស់អក្ខរកម្មសេដ្ឋកិច្ច។ ដំណើរស្វែងយល់នៅសារមន្ទីរ ស.ស.រ ផ្តល់ឱ្យសិស្សានុសិស្សនូវចំណេះដឹងដ៏មានតម្លៃ និងឱកាសក្នុងការរៀនសូត្រពីប្រវត្តិសាស្ត្ររបស់យើង ក៏ដូចជាតម្លៃនៃរូបិយវត្ថុផងដែរ។
លោក ប្លែស គីលីយ៉ង់ សហប្រធានសារមន្ទីរ ស.ស.រ បានមានប្រសាសន៍ថា យើងខ្ញុំពិតជារីករាយនឹងភាពជាដៃគូដ៏ជោគជ័យនេះ ដែលបានអនុញ្ញាតឱ្យសិស្សានុសិស្សមកពីគ្រឹះស្ថានអប់រំរដ្ឋ រាប់ពាន់នាក់បានមកសិក្សារៀនសូត្រអំពីប្រវត្តិសេដ្ឋកិច្ច និងរូបិយវត្ថុរបស់ប្រទេសកម្ពុជា ព្រមទាំងពង្រឹងបរិយាបន្ននៃសារមន្ទីរ ស.ស.រ ផងដែរ។ យើងខ្ញុំសូមថ្លែងអំណរគុណដល់សមាគមធនាគារនៅកម្ពុជា និងសមាជិកទាំងអស់ ចំពោះការប្តេជ្ញាចិត្តដ៏សប្បុរស ហើយយើងខ្ញុំរង់ចាំបន្តពង្រឹងកិច្ចសហប្រតិបត្តិការរបស់យើង និងពង្រីកអត្ថប្រយោជន៍នៃភាពជាដៃគូនេះ ទៅដល់គ្រឹះស្ថានអប់រំជាច្រើនទៀតនៅទូទាំងប្រទេស។
ដោយសម្ដែងការអបអរសាទរដល់ភាគីពាក់ព័ន្ធទាំងអស់ ឯកឧត្តម យឹម លាត ទេសាភិបាលរងធនាគារជាតិនៃកម្ពុជា បានប្រកាសថា អនុស្សរណៈនៃការយោគយល់គ្នាក្នុងឆ្នាំទី៣នេះ បង្ហាញពីការប្តេជ្ញាចិត្តយ៉ាងមុតមាំ និងយូរអង្វែង ក្នុងការជំរុញបរិយាបន្នហិរញ្ញវត្ថុ ក៏ដូចជាការបណ្តុះបណ្តាលចំណេះដឹងផ្នែកហិរញ្ញវត្ថុដល់យុវជនកម្ពុជា តាមរយៈកម្មវិធីទស្សនកិច្ចសិក្សានៅសារមន្ទីរ ស.ស.រ។ ការបន្តអនុស្សរណៈនៃការយោគយល់គ្នានេះ មានសុពលភាពភ្លាមៗ រហូតដល់ថ្ងៃទី១២ ខែឧសភា ឆ្នាំ២០២៧ និងអាចបន្តសាជាថ្មីនាពេលខាងមុខ។
សារមន្ទីរ ស.ស.រ បង្កើតឡើងដោយធនាគារជាតិនៃកម្ពុជា សារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន (ដែលគេស្គាល់ជាទូទៅថា សារមន្ទីរ ស.ស.រ) ផ្ដោតលើការអប់រំសាធារណជនអំពីប្រវត្តិសាស្រ្តសេដ្ឋកិច្ច និងរូបិយវត្ថុរបស់ប្រទេសកម្ពុជា តាមរយៈការលាយបញ្ចូលគ្នារវាងវត្ថុបុរាណនានា ជាមួយនឹងការរៀបចំតាំងបង្ហាញពិព័រណ៍ដោយប្រើបច្ចេកវិទ្យាទំនើប។ នៅក្នុងរយៈពេល ២ឆ្នាំកន្លងមក សារមន្ទីរបានទទួលភ្ញៀវឱ្យចូលទស្សនាប្រមាណជាង ១០០,០០០នាក់ ហើយសារមន្ទីរក៏បានទទួលពានរង្វាន់ TripAdvisor Travelers’ Choice Award ផងដែរ។
សមាគមធនាគារនៅកម្ពុជា តំណាងឱ្យវិស័យធនាគារឯកជននៅក្នុងប្រទេសកម្ពុជា។ គោលបំណងរបស់សមាគមគឺដើម្បីលើកកម្ពស់កិច្ចសន្ទនាក្នុងន័យស្ថាបនា នៅក្នុងចំណោមធនាគារជាសមាជិក ក៏ដូចជាលើកកម្ពស់ហិរញ្ញវត្ថុប្រកបដោយនិរន្តរភាព និងប្រតិបត្តិការវិស័យធនាគារប្រកបដោយទំនួលខុសត្រូវនៅក្នុងប្រទេសកម្ពុជា និងក្នុងគោលបំណងលើកកម្ពស់ការរួមចំណែករបស់វិស័យនេះ ដើម្បីអភិវឌ្ឍសេដ្ឋកិច្ចរបស់ប្រទេសជាតិ៕
ដោយ៖khmerhome
