ភ្នំពេញ៖ បរិមាណកុងតឺន័រសរុបក្នុងឆ្នាំ២០២៥ មានចំនួនជាង ៦០ម៉ឺន TEU កើនឡើងចំនួន ២៤.៩៥% ធៀបនឹងការអនុវត្តឆ្នាំ២០២៤ ជាង ៤៨ម៉ឺន TEU សម្រាប់ឆ្នាំ២០២៥ នេះ ក.ស.ភ. សម្រេច បាន ១១៥,២៨% ធៀបនឹងផែនការឆ្នាំ២០២៥ ចំនួន៥២ម៉ឺន TEU។ នេះបើយោងតាមការបញ្ជាក់ឲ្យដឹងពីប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកនៃកំពង់ផែស្វយ័តភ្នំពេញ។
ឯកឧត្តម ហ៊ឺ បាវី ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកនៃកំពង់ផែស្វយ័តភ្នំពេញ លើកឡើងក្នុងមហាសន្និបាតភាគហ៊ុនិកលើកទី១១ របស់កំពង់ផែស្វយ័តភ្នំពេញ នៅថ្ងៃទី១២ ខែឧសភា ឆ្នាំ២០២៦ នេះថា ប្រាក់ចំណេញសុទ្ធក្នុងការិយបរិច្ឆេទ២០២៥ សរុបមានចំនួនជាង ១៩លានដុល្លារអាម៉េរិក សម្រេចបាន ១៤៣,១៩% នៃផែនការឆ្នាំ២០២៤ ហើយធៀបនឹងឆ្នាំ២០២៤ កើនឡើងជាង ៦លានដុល្លារអាម៉េរិក ឬស្មើនឹង ៤៧,០២%។
ឯកឧត្តម ហ៊ឺ បាវី បានសង្កតធ្ងន់ថា សម្រាប់ឆ្នាំ២០២៥ តម្លៃភាគហ៊ុនរបស់ ក.ស.ភ. នៅលើផ្សារមូលបត្រកម្ពុជា (CSX) មានស្ថិរភាពក្នុងតម្លៃប្រហែល ១៣ ៨០៥ រៀលក្នុងមួយភាគហ៊ុន ហើយបរិមាណជួញដូរជាមធ្យមមាន ប្រមាណ ៦៩៦ ភាគហ៊ុនក្នុងមួយថ្ងៃ។ សម្រាប់ឆ្នាំ២០២៦ គិតត្រឹមបច្ចុប្បន្ន តម្លៃភាគហ៊ុនរបស់ ក.ស.ភ. មានស្ថិរភាពក្នុងតម្លៃប្រហែល ១៤ ២៤៧ រៀលក្នុងមួយភាគហ៊ុន ហើយបរិមាណជួញដូរជាមធ្យមមានប្រមាណ ៨២៩ ភាគហ៊ុនក្នុងមួយថ្ងៃ៕
ដោយ៖khmerhome
