ភ្នំពេញ៖ លោក អួន ស៊ីឡុត ប្រធានសមាគមស្វាយចន្ទីកម្ពុជា លើកឡើងថា អូស្ត្រាលីកំពុងសហការជាមួយរោងចក្រកែច្នៃគ្រាប់ស្វាយចន្ទីចំនួន ២ ដើម្បីគាំទ្រក្នុងការសាងសង់ទីធ្លាសម្ងួត បំពាក់ម៉ាស៊ីនចាត់ថ្នាក់ និងកន្លែងស្តុកទុក ព្រមទាំងផ្តល់ការបណ្តុះបណ្តាលបន្ទាប់ពីការប្រមូលផលដល់កសិករដាំស្វាយចន្ទី។ 

លោកបន្តថា អូស្ត្រាលីប្តេជ្ញាសហការជាមួយកសិ-ពាណិជ្ជកម្មកម្ពុជា ដើម្បីពង្រឹងសមត្ថភាពរបស់ពួកគេ ទាក់ទាញវិនិយោគ និងអភិវឌ្ឍវិស័យកសិ-ចំណីអាហារឲ្យកាន់តែរឹងមាំ និងចីរភាព ស្របពេលដែលកម្ពុជា គឺជាប្រទេសផលិតគ្រាប់ស្វាយចន្ទីឆៅធំជាងគេលំដាប់ទី២ លើពិភពលោក ប៉ុន្តែមានតិចជាង ១០ភាគរយប៉ុណ្ណោះនៃផលិតផលសរុបត្រូវបានកែច្នៃក្នុងស្រុក។ គម្រោងនេះនឹងបង្កើតការងារថ្មីប្រហែល ១០០កន្លែង និងជួយបង្កើន ឬរក្សាស្ថិរភាពប្រាក់ចំណូលសម្រាប់គ្រួសាររហូតដល់ ១ពាន់គ្រួសារ នៅខេត្តកំពង់ធំ និងខេត្តព្រះវិហារ។

លោកគូសបញ្ជាក់ថា ការសហការជាមួយរោងចក្រកែច្នៃគ្រាប់ស្វាយចន្ទីក្នុងស្រុកនេះ គឺជាយុទ្ធសាស្ត្រគន្លឹះដ៏សំខាន់ក្នុងការចូលរួមប្រែក្លាយកម្ពុជាឱ្យទៅជា «អធិរាជស្វាយចន្ទី» តាមរយៈការបង្កើនតម្លៃបន្ថែម និងកាត់បន្ថយការនាំចេញគ្រាប់ស្វាយចន្ទីឆៅទៅក្រៅប្រទេស។ កន្លងមក កម្ពុជាបាននាំចេញគ្រាប់ស្វាយចន្ទីឆៅក្នុងបរិមាណដ៏ច្រើនលើសលប់ទៅកាន់ទីផ្សារអន្តរជាតិ ជាពិសេសប្រទេសវៀតណាម។

លោកសង្កត់ធ្ងន់ថា ការបង្កើតរោងចក្រកែច្នៃកាន់តែច្រើននៅក្នុងស្រុក នឹងអនុញ្ញាត​ឱ្យកម្ពុជាកាត់បន្ថយការនាំចេញគ្រាប់ឆៅទៅជាការនាំចេញផលិតផលសម្រេច ដែលមានតម្លៃខ្ពស់ជាងមុន កាត់បន្ថយហានិភ័យនៃការធ្លាក់ចុះថ្លៃនៅពេលទីផ្សារខាងក្រៅមានការប្រែប្រួល។ ជាងនេះទៅទៀត ការបង្កើនរោងចក្រកែច្នៃបានកាន់តែច្រើន មិនត្រឹមតែជួយដល់ម្ចាស់ចំការប៉ុណ្ណោះទេ ប៉ុន្តែថែមទាំងបង្កើតឱកាសការងារយ៉ាងច្រើនដល់ប្រជាពលរដ្ឋខ្មែរផងដែរ។

លោកលើកឡើងថា ស្របតាមគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ រាជរដ្ឋាភិបាលបាន និងកំពុងផ្តល់ការលើកទឹកចិត្តដល់វិនិយោគិន តាមរយៈការសម្រួលនីតិវិធី និងផ្តល់អាទិភាពលើការកែច្នៃ។ គោលដៅចម្បងគឺបង្កើនសមត្ថភាពកែច្នៃឱ្យបានយ៉ាងតិច ២៥% នៅឆ្នាំ២០២៧ និងឈានទៅដល់ ៥០%នៅឆ្នាំ២០៣​២​។ យ៉ាងណាក៏ដោយ ទោះជាមានសក្តានុពលខ្លាំង ប៉ុន្តែវិស័យនេះនៅប្រឈមនឹងបញ្ហាមួយចំនួនដូចជា ថ្លៃដើមផលិតកម្ម, តម្លៃអគ្គិសនី និងតម្លៃដឹកជញ្ជូននៅមានកម្រិតខ្ពស់ ខណៈផ្នែកបច្ចេកទេសតម្រូវការម៉ាស៊ីនទំនើបៗ និងស្តង់ដារអនាម័យសម្រាប់នាំចេញភាគច្រើននៅមានកម្រិត។

យោងតាមរបាយការណ៍របស់ក្រសួងពាណិជ្ជកម្ម បានបង្ហាញថា ការនាំចេញគ្រាប់ស្វាយចន្ទី នៅ​ក្នុង​រយៈ​ពេល ​៣ខែ​ ឆ្នាំ២០២៦នេះ មានទំហំទឹកប្រាក់សរុបប្រមាណ ៣៥៨ លានដុល្លារអាមេរិក កើនជាង ២២% ចំពោះទីផ្សារ គាំទ្រដល់ការនាំចេញ រួមមាន ទីផ្សារវៀតណាម មានទឹកជាង ៣៥៦​លានដុល្លារ កើនជាង ២២​ភាគរយ, តៃវ៉ាន់ និងខេត្តមួយចំនួន នៃប្រទេសចិន មាន​ទឹក​ប្រាក់​ជាង ៤១​ម៉ឺនដុល្លារ កើន ២១៨ ភាគរយ, ទួកគី ជាង ៣៦ ម៉ឺនដុល្លារ ជាទីផ្សារថ្មី, អារ៉ាប់​អេមីរ៉ាត ជាង ២២ ម៉ឺនដុល្លារ កើនជាង ៥ ម៉ឺនភាគរយ ធៀបរយៈពេលដូចគ្នានិងឆ្នាំមុន ក្រៅ​ពី​នេះ​នៅ​មាន​ទីផ្សារផ្សេងៗដែលជួយគាំទ្រដល់ កំណើននៃការនាំ​ចេញ​គ្រាប់​ស្វាយ​ចន្ទី​របស់​កម្ពុជា​។

លោកអះអាងថា ការជំរុញឱ្យមានរោងចក្រកែច្នៃស្វាយចន្ទីកាន់តែច្រើន គឺជាជំហានមិនអាចខ្វះបាន ដើម្បីធានានូវនិរន្តរភាពសេដ្ឋកិច្ចកសិ-ឧស្សាហកម្ម។ នៅពេលដែលកម្ពុជាមានសមត្ថភាពកែច្នៃកាន់តែខ្លាំង វានឹងក្លាយជាកម្លាំងទាក់ទាញអ្នកវិនិយោគបរទេសបានកាន់តែច្រើន ទាំងវិស័យដាំដុះ និងកែច្នៃបន្ថែមទៀត។

លោកបន្ថែមថា នៅ​ក្នុង​ពេល ​២​ឆ្នាំ​ចុងក្រោយនេះ អាកាសធាតុមានការប្តូរផ្លាស់ គិតមកដល់រយៈពេល ៤ខែ ដើម​ឆ្នាំ​២០២៦​ ​កសិករទើបប្រមូលផលសម្រេចបានក្នុងរង្វង់ប្រមាណ ៦០ ប៉ុណ្ណោះ ខណៈ​ការ​ព្យាករ​នៅ​ក្នុង​ឆ្នាំ​នេះ ​កម្ពុជានឹងអាចប្រមូលផលគ្រាប់ស្វាយចន្ទីបានចន្លោះពី ៨០ ម៉ឺនតោន ទៅ ១លាន​តោន​។ ចំណែកតម្លៃវិញ លោកថា តម្លៃគ្រាប់ស្វាយចន្ទីសើម នៅ​ក្នុង​រយៈ​ពេល ២០​ឆ្នាំកន្លងមកនេះ គឺគ្មានឆ្នាំណា ដែលល្អដូចឆ្នាំ២០២៦នេះឡើយ ទំាងទិន្ន​ផល​ និង​តម្លៃ​ ​ដោយឆ្នាំនេះអាចធ្វើឱ្យកសិករទទួលបានប្រាក់ចំណេញច្រើន។

លើសពីនេះ លោក អួន ស៊ីឡុត បញ្ជាក់ឱ្យដឹងថា តម្លៃការនាំចេញគ្រាប់ស្វាយចន្ទីសើមនេះ កាលពីខែមករា ឆ្នាំ២០២៦ មានតម្លៃក្នុងរង្វង់ ៧.២០០ រៀល ក្នុងមួយគីឡូក្រាម, នៅក្នុងខែកុម្ភៈ មានតម្លៃ ៦.១០០ រៀល, ខែ មីនា តម្លៃ ៦.៣០០ រៀល, ខែមេសា ៦.២០០ រៀល និងនៅក្នុងឧសភានេះ មានតម្លៃក្នុងរង្វង់ ៥.៦០០ រៀល ក្នុងមួយគីឡូក្រាម៕

ដោយ៖khmerhome