ភ្នំពេញ៖ នាឱកាសពិធីបុណ្យចូលឆ្នាំប្រពៃណីជាតិខ្មែរ រយៈពេល៣ថ្ងៃ និងថ្ងៃអាទិត្យ១ថ្ងៃទៀត ពោលគឺចាប់ពីថ្ងៃទី១៤-១៧ ខែមេសា ឆ្នាំ២០២២ នៅទូទាំងប្រទេសកម្ពុជា មានភ្ញៀវទេសចរជាតិ-អន្តរជាតិសរុបចំនួន ៥,១៧៥,៧៥៤នាក់ ក្នុងនោះ ភ្ញៀវជាតិ ៥,១៤០,៤៩៥នាក់ និងភ្ញៀវបរទេសផ្ទៃក្នុង ៣៥,២៥៩នាក់ បានដើរកម្សាន្ត និងចំណាយថវិកាផ្ទាល់ប្រមាណ ២៧៥,៣៦៧,១១៥ដុល្លារ (ចំណាយទេសចរជាតិប្រមាណ ២៦៤លានដុល្លារ និងទេសចរបរទេសផ្ទៃក្នុងប្រមាណ ១១,៧លានដុល្លារ)។
ភ្ញៀវទេសចរដើរកម្សាន្តក្នុងពិធីបុណ្យចូលឆ្នាំខ្មែរ បានទាញចំណូលយ៉ាងច្រើន ចូលក្នុងសេដ្ឋកិច្ចជាតិ។ ផ្ទះសំណាក់ សណ្ឋាគារ និងភោជនីយដ្ឋាន តាមរមណីយដ្ឋាននានា មានភ្ញៀវពេញស្ទើរ ១០០ភាគរយ។ តាមរយៈដំណើរកម្សាន្តរបស់ទេសចរ បានផ្ដល់ចំណូលឱ្យអ្នករកស៊ីក្រៅប្រព័ន្ធ ដូចជាអ្នកដឹកជញ្ជូន និងអ្នកលក់ដូរតូចតាចជាដើម។
បើតាមរបាយការណ៍ការចំណាយរបស់ទេសចរ របស់ក្រសួងទេសចរណ៍ បានឱ្យដឹងថា ទេសចរបានធ្វើដំណើរកម្សាន្តទូទាំងប្រទេស គឺមានទេសចរស្នាក់នៅចាប់ពី ១យប់ (Overnight visitors) ស្មើនឹង ៤០% (ក្នុងនោះធ្វើដំណើរលក្ខណៈគ្រួសារ ២៨%, ជាក្រុម ៥% និងបុគ្គល ៦%) និងទេសចរកម្សាន្តវិលល្ងាច (Same-day visitors) ស្មើនឹង ៦០%។
ទេសចរស្នាក់នៅចាប់ពី ១យប់ (Overnight visitors) ចំណាយសរុបប្រមាណ ១៨៦លានដុល្លារ រដែលធ្វើដំណើរជាគ្រួសារចំណាយជាមធ្យមប្រមាណ ១៦១ដុល្លារ/ថ្ងៃ ស្មើនឹង ៤០២ដុល្លារ/trip, ទេសចរជាក្រុមចំណាយជាមធ្យមប្រមាណ ២៩៤ដុល្លារ/ថ្ងៃ ស្មើនឹង ៧៣៥ដុល្លារ/trip, ទេសចរបុគ្គលចំណាយជាមធ្យមប្រមាណ ៤៥ដុល្លារ/ថ្ងៃ ស្មើនឹង ១០៨ដុល្លារ/trip) រីឯទេសចរកម្សាន្តវិលល្ងាច (Same-day Visitors) ចំណាយសរុបប្រមាណ ៧៨លានដុល្លារ (ចំណាយម្នាក់ជាមធ្យមប្រមាណ ២៤ដុល្លារ/ថ្ងៃ)។
ខេត្ត ដែលមានទេសចរចំណាយច្រើនជាងគេ គឺខេត្តកំពង់ចាម ៥៤លានដុល្លារ, ខេត្តព្រះសីហនុ ៤៨លានដុល្លារ, ខេត្តបាត់ដំបង ៣១លានដុល្លារ, ខេត្តសៀមរាប ៣០លានដុល្លារ។ បើគិតពីមេគុណសេដ្ឋកិច្ច ការចំណាយរបស់ទេសចរផ្ទៃក្នុង ក្នុងឱកាសបុណ្យចូលឆ្នាំខ្មែរនេះអាចបង្កើតនូវចំណូលហូរចូលចរន្តសេដ្ឋកិច្ចជាតិ ប្រមាណ ៥៥០លានដុល្លារ (ជាមួយមេគុណប្រសិទ្ធភាព២)។
សូមបញ្ជាក់ផងដែរថា ចូលឆ្នាំខ្មែរ៣ថ្ងៃ បូកនឹងថ្ងៃអាទិត្យ ទេសចរជាតិ-អន្តរជាតិ ដើរកម្សាន្តទូទាំងប្រទេសសរុប ៥,១៧៥ ៧៥៤នាក់ ក្នុងនោះទេសចរអន្តរជាតិ ៣៥,២៥៩នាក់។ ចូលឆ្នាំថ្ងៃទីមួយ ទេសចរចេញដើរកម្សាន្តចំនួន ៨៦២,៨៩៧នាក់, ចូលឆ្នាំថ្ងៃទី២ មានទេសចរ ១,៥៧៩,២៥១នាក់ និងចូលឆ្នាំថ្ងៃទី៣ មានទេសចរ ២,១៤៨,១៧៨នាក់។ ចំណែកថ្ងៃអាទិត្យបន្ទាប់ពីចូលឆ្នាំ មានទេសចរដើរកម្សាន្ត ៥៨៥,៤២៨នាក់៕
ដោយ៖ មឿន ឌីណា (Moeun Dyna)
